Ñgyoozh dzi rcam mbecy: Tub riidz ni Dabi
36
Ornu tub mbecy ricy yu coz cyi,orzeꞌ rzuub gyidag yu ni coz a̱ꞌ nap nu druu nañ lardooy.
Yu zeꞌ rila wagnii tooy nu dzib lagy yu lo Ñgyoozh.
2 Nu nac nu dzi gya zuy rziiy,
orzeꞌ wagnii tooy ti ricy yu cyi,
nunu wagazi lagy yu loñ.
3 Nac yu mbecy nu shiñ rnii, nunu rguuy.
Wagad lagyaꞌy ca na coz nap rlagy ñi nu gyicy yu,
nunu checay nu ricy yu coz nap.
4 Lat nu mbish yu lo daꞌ, orzeꞌ rboo ic yu la na coz a̱ꞌ nap nu gyicy yu.
Bzuy ub yu tub nez nu a̱ꞌ nap.
Nunu walagy yu ruu chuy lo de coz a̱ꞌ nap nu ricy yu.
5 Ñgyoozh, tonaꞌ la gya baa.
Tees ru rca zir ru de mbecy nir gazeꞌ gal nu gya baa.
Niꞌ ziꞌl tonaꞌ la gya taꞌ za baa,
tees ru dzi zir ricy paar nu de mbecy nir gazeꞌ gal nu gya taꞌ za.
6 Dzi gya de bicy ily.
Tees mod seꞌñ nu ricy ru, ndeꞌ zily zir nac ñii gazeꞌ de bicy ily.
Coz ily nisyudoo nunu gyi riñ.
Tees ru dzi zir coz ily ricy ru ornu dri beer ni mbecy.
Ru rñar de mbecy, nunu rñar de bañcyug.
7 A̱ Ñgyoozh, dzi ga cyit nu ru rcar de mbecy.
Lo ru cha mbecy nu laa lagy yu
gal nu rlaa lagy dzich nañ loweꞌ ñaa ma.
8 Lo ru gad sheñ coz nu gow dey gal rusubaꞌ lañ.
De coz nu rbic ru nañ gal na nis gyoow nu rbic ru nu do̱ꞌ de̱.
9 Gun ru nac ru biñ nu ricy nu mbañ dela coz.
Nunu ru nac ru biñ nu rbic yaa nu gac zac de̱.
10 Zaab rca lar de mbecy nu yuꞌ lo ru,
nunu nap ricy nur de mbecy nap.
11 Cueꞌ zaan ru nu de mbecy leꞌ shet yaa dey ya̱.
Nunu cueꞌ zaan ru nu cyuu nu de mbecy a̱ꞌ nap ya̱.
12 Na güii der nu wes saa de mbecy a̱ꞌ nap.
Mbish dey nunu wacaꞌ gyeshte dey.