Ñgyoozh zam part ni de yu nu ricy coz nu rlagy mi: Tub riidz ni Dabi
35
Ñgyoozh gua contr ni de mbecy nu za contr ne̱.Gucoo nu de mbecy nu rucoo nu ya̱.
2 Gush gyiib she nu rsoow cuerp nir.
Orzeꞌ da locyuub ru ya̱.
3 Pshet yaa yag too lyuch nir nu gyibag nu rup chu laꞌ la ruꞌ riꞌñ nir.
Gua cheel de yu nu zaab icha̱.
Mnii lo̱ nu ru nac ru biñ nu co mbañ ya̱.
4 De yu nu rlagy cut ya̱ gash dey carer nu gat loy.
Nunu de yu nu rlagy shiñ gyicy nu ya̱, niꞌ ziꞌl gash der carer nu gat loy.
5 Gac dey gal nu na toop ni trig
nu za nu bi lat nu zaab anc ni Ñgyoozh ich dey.
6 Nez ni dey gac ñii nez cow,
nunu gac ñii nez cyudz
lat nu zaab anc ni Ñgyoozh ich yu.
7 Sac la la gyiꞌ bzu dey tub caa nu gyet laga̱.
Sac la la gyiꞌ bduuñ dey gyeegy nu gyet laga̱.
8 Laab ub la dey lorgut lay nit loy,
nunu laab ub dey gyet lag yu nañ caa nu bzuy.
Orzeꞌ nit loy.
9 Gazeꞌ nu ya̱ gacyit lagya̱ lo Ñgyoozh,
gun mi zeꞌ bloo mbañ mi ya̱.
10 Nu dutuub la lardo̱o̱ ne̱e̱: “Ñgyoozh, ¿cyuꞌ zir na gal nu na ru?”
De mbecy shni, nu de mbecy nu ricy falt coz ni,
mi zeꞌ rboom dey yaa de mbecy nu fert zir gazeꞌ de ub yu,
nunu rboom dey yaa de yu nu ricy gan losaꞌ.
11 De mbecy a̱ꞌ nap rac dey teshtig nu za cont ne̱.
Driib dey coz fals ica̱.
Zeꞌ ya̱ rila wagad lagya̱ la coz ndeꞌ.
12 Ya̱ nap ricy du̱ dey.
Zeꞌ de yu zeꞌ, ca nu shiñ ricy nuy ya̱.
Ndeꞌ zi coz nu rgyish dey ne̱.
Orzeꞌ ndeꞌ ricy ñi nu rshiꞌña̱ baloor.
13 Ornu de yu zeꞌ gurat yu, orzeꞌ ya̱ bicy shi̱ nu nac dey.
Bzu̱ negy dzech, nunu pca̱ ni uba̱ nu cueꞌ da̱w gyit.
Nunu wancheca̱ nu rne̱e̱ du̱ Ñgyoozh nañ lardo̱o̱ nu nac dey.
14 Shni bicya̱ gusa̱.
Bzu̱ negy nu rzu mbecy nu zu rishsulagy,
gal nu rzaca̱ ornu gat ña̱a̱, o tub amig ne̱, o bicya̱.
15 Tees ornu ya̱ bzac deeta̱,
orzeꞌ dela dey tublaazh la bigy nu naañ yu ya̱.
Guc dey gal nu na mbecy nu walab losa̱ꞌ, o mbecy nu a̱ꞌ yuꞌ lo̱.
Wancheca la dey nu shiñ ricy nuy ya̱.
16 Bicy dey nu bzac zi̱, nunu rgubdzaa dey ya̱.
Zi la rgüii dey lo̱ tantaꞌ nu rzi lagy yu.
17 Ñgyoozh, ¿laꞌ zir be tiem nu güii ziꞌl ru de coz ii?
Bloo mbaña̱ yaa de yu nu na gal nu na biidz nu rded rshuu.
18 Gazeꞌ nu grica̱ gras nir lat de mbecy zigy nir nu yuꞌ tublaazh.
Gyabica̱ gyel mbecy nir lat nu yuꞌ tublaazh de mbecy zigy.
19 Cueꞌ zaan ru nu gyigy naañ de losaꞌ yu̱u̱ nuy ya̱ mas se la la bicya̱.
Cueꞌ zaan ru nu güi̱i̱ ted dey lo̱,
benu wacabee la gyiꞌ rzi lagy yu lo̱.
20 De yu zeꞌ wagyub dey mod nu chesu ri lat losaꞌy,
sinu rboo ic dey mod nu zuub yu gyiꞌ gyel yuu lat de mbecy nu walagy gyel yuu ledz de̱.
21 Rshaa ruꞌ dey rniiy riidz nu rzañ contr ne̱.
Orzeꞌ rnii dey: “Güii la na coz nu bzaac de̱ nu ricy yu”, rniiy.
22 Ñgyoozh, ru bzaac ru de nu ndeꞌ.
Orzeꞌ cueꞌ soow ruꞌr, nunu cueꞌ gyazet ru lo̱.
23 Ñgyoozh, cueꞌ nu zu rir, sinu char faboor ne̱.
Bicy nu gruu caacya̱ dub gal nu yad ñi ne̱.
24 Ñgyoozh, Shuaana̱, mnii nu sac falt ne̱ nu nac nu dub laa tiem ricy ru coz nu seꞌñ.
Cueꞌ zaan ru nu gyigy nu mbecy ya̱.
25 Cueꞌ zaan ru nu nii dey nañ lardooy: “Guc ñi gal nu rlagy na.
Mnit lon yu tub tir ziꞌl.”
26 De mbecy nu yet lagy nu rzac deeta̱, de yu zeꞌ gruu toꞌ lo dey.
De mbecy nu rzii nu gya zir zu par ya̱, de yu zeꞌ nu blaazhaꞌ la toꞌ lo gruu dey.
27 De mbecy nu rlagy nu gruu caacya̱, de yu zeꞌ cush ti dey nu gyet lagy yu,
nunu zaab nii la dey: “Ñgyoozh zily nac mi.
Ornu de mbecy nu ricy coz nu rlagy mi, chesu nap yu,
nunu mi zeꞌ yet lagy mi”, nii dey.
28 Orzeꞌ nu ru̱ꞌ ne̱e̱ nu dzi nap ru, Ñgyoozh,
nunu dub laa dzi gyabica̱ gyel mbecy nir.