Ñgyoozh rñam de mbecy nu rdzib lagy lom: tub riidz ni Dabi
34
Ya̱ zaab dric la̱ gras ni Ñgyoozh,nunu dublaa tiem gyabica̱ gyel mbecy nim.
2 Ya̱ gyicy le̱ꞌ nu nac Ñgyoozh.
Zeꞌ de ru, mbecy nu rzac zi, bzuub gyidag der ne̱, nunu bet lagy der.
3 Gyabic den gyel mbecy ni Ñgyoozh,
nunu lo dela den tub ziꞌl niin nu dzi zily nac mi.
4 Ya̱ byuba̱ Ñgyoozh.
Orzeꞌ mnii num ya̱,
nunu bicy mi nu wanchiba̱ lo ni tub la coz.
5 De mbecy nu rcaa lo lo Ñgyoozh, de yu zeꞌ yarigy rgüii dey.
De yu zeꞌ rila waruu toꞌ loy.
6 Zeꞌ pro ya̱ brishti du̱ Ñgyoozh.
Orzeꞌ Ñgyoozh bzuub gyidag mi ne̱.
Orzeꞌ bloo chum ya̱ lo dela coz deet.
7 De anc ni Ñgyoozh yuꞌ seꞌ la dey dub yub la lo de mbecy nu rdzib lagy lom
nu rñay de mbecy nim.
8 “O” mnii ni Ñgyoozh.
Orzeꞌ gad lagy ru nu dzi nap mi.
Dzi ni mbecy nu rza nu laa lagy lom.
9 De ru mbecy ni Ñgyoozh, bicy der nu dzib lagy der lom,
gun de yu nu rdzib lagy lom rila wayicy falt de coz cyiiñ niy.
10 De mbecy guaniꞌñ, yuꞌ nu yagyel zi zuy.
Orzeꞌ ryan yu.
Tees de yu nu ryub Ñgyoozh rila wayicy falt coz nap niy.
11 De ru mbecy nu rsyaꞌ lo̱, da der.
Bzuub gyidag ne̱.
Orzeꞌ ya̱ lyu̱u̱ ni der lac mod dzib lagy ru lo Ñgyoozh.
12 ¿Walab gaal walagy ru nu tuñ tiem gzur gyishlombecy?
¿Walab gaal walagy ru nu dub gusht cyiiñ ru?
13 Orzeꞌ bicy cuidad ruꞌr nu cueꞌ niir riidz a̱ꞌ nap,
nunu rila cueꞌ niir riidz rguu.
14 Bruu chu lo de coz a̱ꞌ nap.
Bicy de coz nap.
Byub mod par nu cheti ye lagy mbecy.
Nunu gua ca ich mod nap zeꞌ.
15 Ñgyoozh ca lom lo de mbecy nap,
nunu rzuub gyidag mi ni dey
ornu rnii dey riidz shni.
16 Tees de mbecy nu shiñ ricy, rzam contr niy,
gun ornu gat dey,
orzeꞌ wayezaꞌ gaꞌ lagy mbecy nu bzu dey gyishlombecy.
17 Ornu mbecy nap rbedz yu Ñgyoozh nu locyuub miy,
orzeꞌ rzuub gyidag mi niy,
nunu rboo chum yu lo de coz deet nu rzac yu.
18 Ñgyoozh gaab ga zum
par nu co nap mi de mbecy nu rshiꞌñ baloor gal nu de mbecy nu blazh consuel ni.
19 Mbecy nap rzac yu zañ coz deet.
Tees Ñgyoozh ricy mi nu druu nap yu lat delañ.
20 Ñgyoozh nap rñam yu.
Wazaan mi nu gach ni tub rit yu.
21 De mbecy dañ gat dey nu nac de coz a̱ꞌ nap nu ricy yu.
Nunu de yu nu rzi lagy lo de mbecy nap, Ñgyoozh cuic mi cashtig ni dey.
22 Tees Ñgyoozh co mbañ mi de mbecy nu ricy coz nu rlagy mi.
Se la la zac dey benu chay lom nu laa lagy yu.