Gyabic na gyel mbecy ni Ñgyoozh nu nac nu zily nac mi
33
De ru, mbecy nap, brishti der nu nac nu yet lagy ru de coz nu bicy Ñgyoozh.Dzi ga cyit ornu de mbecy nap ryabicy dey gyel mbecy nim.
2 Briic der gras ni Ñgyoozh nu di ni beeñ.
Biily der lom nu de lo la coz ni musiic nu ricy cup duu gyiib lo.
3 Biily der tub riidz cub lom.
Nap ñuu pshet der lo beeñ,
nunu brishti der nu yet lagy ru.
4 Gun de riidz nu rnii Ñgyoozh nac ñii coz rishli.
Rabee nu ricy paam nu nac de coz nu ricy mi.
5 Ñgyoozh rcam de coz nu seꞌñ gal nu de coz nap,
nunu dutuub la nañ gyishlombecy rabee gyel rca nim.
6 Baa nu dela coz nu taꞌ baa, Ñgyoozh psaꞌ lagy mi de nu ndeꞌ
nu nac riidz nu mniim.
Psaꞌ lagy mi de coz zeꞌ
nu nac riidz nu briib ruꞌm mniim.
7 Bicy tublaazh mi de nis,
nunu bicy mi nu guti seꞌ de nis sheñ ni nisyudoo.
8 Bicy nu dzib lagy der lo Ñgyoozh, dela de ru mbecy gyishlombecy.
De ru mbecy nu rcyiiñ gyishlombecy, bicy der nu dzib lagy ru lom.
9 Ornu mi zeꞌ mniim, orzeꞌ psaꞌ lagy mi dela coz.
Ornu bicy mi mandaar, orzeꞌ dela coz gusu cyigy ñi.
10 Ñgyoozh ricy mi nu wagruu nap de coz nu rboo ic de mbecy nu walab mbecy nim.
11 Tees de coz nu rboo ic ub mi, ndeꞌ zuñ tub la.
12 Dzi ni tub nac mbecy benu Ñgyoozh nac mi Shuaan yu.
Dzi ni dey benu pcuim yu nu gac yu nim.
13 Ñgyoozh rgüiim nese gal gyibaa.
Orzeꞌ rzac mi dela de mbecy.
14 Nese gal zeꞌ nu zub mi nu riib ic mi,
nese gal zeꞌ rgüiim lo dela mbecy nu yuꞌ gyishlombecy.
15 Mi zeꞌ psaꞌ lagy mi shcab ni dey,
nunu rad lagy mi dela coz nu ricy yu.
16 Ornu tub rey rzay gyel yuu,
walab nu ricy yu gan nu nac nu dzi fert de soldad niy.
Ornu tub soldad rshet yaay losaꞌ yuuy,
walab nu ricy yu gan nu nac nu dzi ruub yu.
17 Cuay ni gyel yuu wacyiiñ la ma
nu locyuub ma nu gyicy mbecy gan lat gyel yuu.
Mas tonaꞌ la ruub de ma, tees wayicy dey gan nu nac fers ni ma.
18 Tees Ñgyoozh dub laa tiem rñam de yu nu rdzib lagy lom.
Rñam de yu nu ricy cup consuel lom nu nac nu rcam dey.
19 Ricy mi nu wagat dey.
Rbic mi coz nu gow dey lat nu ryeed cubiñ.
20 Tees de ub na ricy cup na consuel lo Ñgyoozh.
Mi zeꞌ rlocyuub mi de ub na,
nunu wacsaan mi nu zac na ni tub la coz.
21 Racyit lagy na nu nac mi.
Nunu fert ricy cup na consuel lom
nu nac nu dzi yon mi.
22 Ñgyoozh, pca de̱ ya̱ dub laa tiem dub
gal mod nu drish lo̱ de̱ nu gyicy ru.