Dzi ni mbecy benu Ñgyoozh gyicy sulagy mi niy: tub riidz ni Dabi
32
Dzi ni mbecy benu Ñgyoozh gyicy sulagy mi niynu nac dela coz a̱ꞌ nap gal nu dela cyi nu bicy yu.
2 Dzi ni mbecy benu a̱ꞌ nac yu mbecy rguu,
nunu benu wanii Ñgyoozh ti yuꞌ falt niy.
3 Lat nu wanshuub ru̱ꞌ de cyi̱,
cuerp ne̱ gugyidz ñi nu nac nu gua la dzi bduna̱.
4 Dzi rel la briic ru cashtig ne̱.
Blazh la fers ne̱ gal nu rzac gyee nu rzi̱i̱ñ tiem zig.
5 Tees ya̱ pshuub ru̱ꞌ de cyi nu bicya̱ lor.
Wancacha̱ ni tub la coz a̱ꞌ nap nu bicya̱,
sinu ya̱ pcab ru̱ꞌ nu shuub ru̱ꞌ dela cyi̱ lor.
Orzeꞌ ru bicy sulagy ru ne̱ nu nac dela cyi.
6 Ndeꞌ nu tiem nu deet rac, orzeꞌ dela mbecy nu ricy paa rlagy ñi nu nii nu dey ru.
Orzeꞌ de coz deet nañ gal nu na nis yu ily.
Ndeꞌ waruꞌñañ gal lo dey.
7 Ru nar gal na tub lugaar nu cha̱ cach lo̱ lo de losaꞌ yu̱u̱.
Ru güiir ya̱ lat nu cyid coz rishdzidz.
Orzeꞌ de mbecy nu yuꞌ dub yub la lo̱ cush tiy
nu gyet lagy yu nu nac nu bicy ru nu bicya̱ gan.
8 Ñgyoozh nam: “Ya̱ ca ga lo̱ lor.
Ya̱ du̱ꞌ riiñ yaar, nunu rica̱ consef nir.
Nunu ya̱ ne̱e̱ lor lac mod rlagy ñi nu gyicy ru.
9 Cueꞌ gac ru mbecy cyigy too gal nu na cuay, o bañ ruub,
gun de ma zeꞌ rlagy ñi nu gyicy dey mandaar ma nu fren o nu bosaal,
gun orzeꞌ O nii ma”, na Ñgyoozh.
10 De mbecy a̱ꞌ nap tonaꞌ la zac zi dey.
Tees de mbecy nu ricy cup consuel lo Ñgyoozh, wazaan mi nu zac dey ni tub la coz
nu nac nu zaab rca lam yu.
11 De ru mbecy nap, de ru mbecy nu rdzib lagy lo Ñgyoozh, gucyit lagy der
nu nac de coz nu ricy Ñgyoozh.
Brish ti der nu nac nu yet lagy ru.