Ñgyoozh cuic mi lugaar nu cha de mbecy nim nu laa lagy dey: Tub riidz ni Dabi
31
A̱ Ñgyoozh, lo ru ryuba̱ lugaar nu laa lagya̱.Cueꞌ zaan ru nu ruu toꞌ lo̱.
Bloo mbañ ya̱,
gun ru dub laa tiem ricy ru coz nu seꞌñ.
2 Bzuub gyidag ne̱.
Dzach bloo mbañ ya̱.
Gac ru gal na gyitaꞌ nu cha laa lagya̱.
Gac ru gal na tub yuꞌ fert nu cach lo̱ lo de losaꞌ yu̱u̱.
3 Laab ru nar gal na gyitaꞌ nu laa lagya̱,
nunu nar gal nu na yuꞌ fert nu chu̱ꞌ nu cach lo̱ lo de losaꞌ yu̱u̱.
Blyuu nez ne̱
nunu cueꞌ zaan ru nu de losaꞌ yu̱u̱ shiñ gyicy nuy ya̱
dub gal nu mniir nu gyicy ru.
4 Cueꞌ zaan ru gyet laga̱ nañ caa nu bzu mbecy ne̱,
gun nac ru biñ nu rbic lugaar nu laa lagya̱.
5 Ñgyoozh, Shuaana̱, ya̱ rzeeña̱ uba̱ yaar.
Ru rboo mbañ ru ya̱, gun ru nac ru biñ nu ricy paa.
6 Ya̱ rzi lagya̱ lo de mbecy nu driib zily de nab wacyiiñ nu nac ñgyoozh fals.
Tees ya̱ ricy cupa̱ consuel lo ru.
7 Ya̱ racyit lagya̱ nunu yet lagya̱,
gun ru dub laa tiem rcar ya̱.
Ru rzac ru ornu rzac zi̱,
nunu rad lagy ru ornu rzac deeta̱.
8 Ru wanzaan ru nu gyet laga̱ yaa de losaꞌ yu̱u̱,
sinu zur ya̱ lugaar nu a̱ꞌ rishdzidz.
9 Ñgyoozh, Shuaana̱, gushni lagy ya̱,
gun na zu̱ lo rishdzidz.
Bi ran urlo̱ tantaꞌ nu rduna̱.
Blazh dela fers ne̱.
10 Tantaꞌ deet rac nañ lardo̱o̱, nunu ricy shni.
Ndeꞌ nu gal yashub la lo yu̱.
Tantaꞌ nu blazh la fers ne̱
nunu byagyidz la cuerp ne̱.
11 De losaꞌ yu̱u̱ gyigy nu naañ dey ya̱.
De mbecy nu rcyiiñ du̱ gaab ga gubdzaa dey ya̱.
De mbecy nu yuꞌ lo̱ rdzib dey lo̱.
Ornu rdzeela̱ de mbecy gyernez, orzeꞌ druu chuy lo̱.
12 Dela mbecy mniit la lagy yu ya̱
gal nu rnit lagy dey tub mbecy gut.
Ya̱ na gal nu na tub psiꞌñ laꞌ ni gyis nu bduneꞌ.
13 Ya̱ reña̱ nu mbecy rniiy dze ga.
Dutuub la yuꞌ coz ily nu rcyaag ñi ya̱.
Tub ziꞌl riidz ricy dey nu lac gyicy nuy ya̱.
Ryub dey mod nu cut yu ya̱.
14 Tees ya̱ ricy cupa̱ consuel lo ru, Ñgyoozh,
gun ru nac ru Ñgyoozh ne̱.
15 Ru rñar ya̱ dub laa tiem.
Bloo mbañ ya̱ yaa de losaꞌ yu̱u̱ gal nu de yu nu rshet zi ya̱.
16 Nap bicy nu ya̱, yu nu ricy coz nu rlagy ru.
Bloo mbañ ya̱ nu nac nu dub laa tiem rcar ya̱.
17 A̱ Ñgyoozh, cueꞌ zaan ru nu ruu gyel mbecy ne̱,
gun rne̱e̱ du̱ ru nu locyuub ru ya̱.
De mbecy a̱ꞌ nap gruu gyel mbecy niy.
Shet lag ru dey zeꞌ nu yuꞌ de mbecy gut.
Orzeꞌ wad la ruꞌ dey niiy.
18 Orzeꞌ gyow ruꞌ rguu ni dey,
gun leꞌy nunu ñgyay.
Orzeꞌ gubdzaa dey,
nunu rzat naañ dey de mbecy nap.
19 Dzi ga nap de coz nap nu ricy nur de mbecy nu rdzib lagy lor.
Rñar coz nap zeꞌ gal nu rñar tub coz nu tonaꞌ la ñgyup sac.
Lo rgüii la dela mbecy, orzeꞌ rtush las ru de coz zeꞌ lat de mbecy nu rza lor nu zaab ic ru dey.
20 Ru cuic ru lor cach lo dey ni de mbecy nu rboo ic de coz a̱ꞌ nap zeꞌ.
Cuic ru tub lugaar nu sac rishdzidz nu cach lo dey ni de riidz a̱ꞌ nap nu rnii de losaꞌ yuuy.
21 ¡Gyabic na gyel mbecy ni Ñgyoozh!
Gun tonaꞌ la coz ily bicy num ya̱ nu nac nu rcam ya̱
lat nu deet guc nañ lardo̱o̱.
22 Lat nu deet guc nañ lardo̱o̱,
mnii to̱o̱ nu ru bloo chur ya̱ lor.
Tees ornu ya̱ mne̱e̱ du̱ ru nu locyuub ru ya̱,
orzeꞌ bzuub gyidag ru de coz nu mne̱e̱ lor.
23 De ru mbecy ni Ñgyoozh, pca der mi.
Gun Ñgyoozh wazaan mi nu shiñ zac de mbecy nu ricy paa nim.
Tees cuic mi cashtig ni de mbecy leꞌ dub gal mod nu yad ñi nu dugyiy.
24 Dela de ru mbecy nu ricy cup consuel lo Ñgyoozh, briic der fers,
nunu briic der baloor.