Dabi mniiy lo Ñgyoozh nu locyuub mi yu
30
Ñgyoozh, ya̱ ryabica̱ gyel mbecy nir,gun ru bloo mbañ ru ya̱,
nunu wansaan ru nu de losaꞌ yu̱u̱ ngubdzaay ya̱.
2 Ñgyoozh, Shuaana̱, ya̱ mnishba̱a̱ lor nu locyuub ru ya̱.
Orzeꞌ bicy yac ru ya̱.
3 Ru wansaan ru nu gata̱, sinu bicy ru nu cui mbaña̱.
Bicy ru nu wancha̱ zeꞌ nu rza mbecy gut.
4 De ru mbecy ni Ñgyoozh, biily der lom
nu gyabic der gyel mbecy nim.
Byabic der gyel mbecy nim
nu gyezaꞌ lagy ru nu dzi yon mi.
5 Gun Ñgyoozh tub miiñ ziꞌl dzaꞌm,
tees nap ricy num mbecy dub laa lat nu mbañ yu.
Benu dun na rel,
or zaꞌ yu, bi gusu cyit lagy na.
6 Ya̱ gud lagya̱ nu a̱ꞌ zu̱ lo rishdzidz.
Orzeꞌ mne̱e̱ nañ lardo̱o̱: “Rila wanit lo̱.”
7 Ñgyoozh, ru tonaꞌ la nap bicy nur ya̱.
Ru bicy fert ru ya̱.
Tees despuees ru wangalagy ru locyuub ru ya̱.
Orzeꞌ pcan laa shcab ne̱ nu tantaꞌ gudziba̱.
8 Ñgyoozh, orzeꞌ ya̱ brish ti̱ du̱ ru.
Mnishba̱a̱ lor nu locyuub ru ya̱.
9 Mne̱e̱ lor: “¿La coz gyicy ru gan benu ya̱ gata̱?
¿La rusub nir benu ya̱ cha̱ lat de mbecy gut?
¿Walab gaal gac gyabic de mbecy gut gyel mbecy nir?
¿Walab gaal gac nii dey nu ru dzi ricy paar?
10 Ñgyoozh, bzuub gyidag coz nu rne̱e̱,
nunu gushni lagy ya̱.
Blocyuub ya̱”, mne̱e̱ lor.
11 Orzeꞌ lugaar nu gyicy shni̱, orzeꞌ ru bicy ru nu wes naña̱
nu dzi bet lagya̱.
Ru bicy ru nu wangyicyaꞌ sentiir,
sinu dub laa tiem su cyit lagya̱.
12 Ndeꞌ nu, Ñgyoozh, Shuaana̱, ya̱ wasoow ru̱ꞌ,
sinu dula̱ lor nu gyabica̱ gyel mbecy nir.
Nunu dub laa tiem rica̱ gras nir.