Ñgyoozh rzuub gyidag mi nin ornu rnishbaan lom: Tub riidz ni Dabi
28
Ñgyoozh,
Shuaana̱,
ru nac ru biñ nu rgüii ya̱.
Ndeꞌ nu ya̱ dredza̱ ru.
Benu ru wanii nur ya̱,
orzeꞌ gyaca̱ gal nu na mbecy nu bi ya zeꞌ nu yuꞌ mbecy gut.
2 Bzuub gyidag ne̱ ornu rne̱e̱ du̱ ru
nu locyuub ru ya̱ lat nu shes nañ ya̱a̱ nañ yuꞌ yon nir.
3 Cueꞌ zeed ru ya̱ lo cashtig tublaazh la nu de mbecy a̱ꞌ nap.
Cueꞌ gyicy ru zaca̱ gal nu gzac de mbecy shiñ ricy,
de yu nu cyudz rnii,
tees nañ lardoo dey tonaꞌ la yuꞌ coz a̱ꞌ nap.
4 Briish ni dey dub gal na coz a̱ꞌ nap nu bicy yu.
Briish ni dey laabaꞌ gal nu na coz nu bicy yu.
Briish ni dey gal nu yad ñi.
5 De yu zeꞌ rila wagyicy cuen dey de coz nu bicy Ñgyoozh.
Ni wayicy cuen dey de coz nu psaꞌ lagy mi.
Ndeꞌ nu cuic mi cashtig ni dey.
Nit lom dey par tub la.
6 Gyabic na gyel mbecy ni Ñgyoozh,
gun mi zeꞌ bzuub gyidag mi ornu mnishba̱a̱ lom.
7 Ñgyoozh fert mi,
nunu wazaan mi nu shiñ zaca̱.
Ya̱ ricy cupa̱ consuel lom.
Mi zeꞌ rlocyuub mi ya̱,
nunu ricy mi nu zu cyit lagya̱.
Orzeꞌ drica̱ gras nim ornu rdula̱ lom.
8 Ñgyoozh,
nac mi fers ni de mbecy nim.
Mi zeꞌ rlocyuub mi mbecy nu pcuim nu gac rey,
nunu wazaan mi nu shiñ zac yu.
9 Ñgyoozh,
bloo mbañ de mbecy nir.
Bicy coz nap nu de yu nu nac nir.
Mña dey gal nu rña mbecy shily.
Nap bgüii dey tub la.