Ñgyoozh nac mi biñ nu rbic gyel mbañ ne̱ nunu nac mi biñ nu co mbañ ya̱: Tub riidz ni Dabi
27
Ñgyoozh, ru nac ru biñ nu rbic gyel mbañ ne̱,nunu nac ru biñ nu co mbañ ya̱.
Orzeꞌ, ¿cyu lo dziba̱?
Ñgyoozh, ru rzaab ic ru ya̱ lo de coz rishdzidz.
¿Orzeꞌ cyu lo dziba̱?
2 Ornu de mbecy a̱ꞌ nap yatublaazh dey
par nu shet yaay ya̱ nu cut yu ya̱,
orzeꞌ laab de ub yu glagy gyiꞌy gyes saay.
3 Mas de losaꞌ yu̱u̱ nac dey tub nac mbecy zigy,
nunu yuꞌ seꞌ dey dub yub la lo̱, tees ya̱ wadziba̱.
Mas de losaꞌ yu̱u̱ shet yaa dey ya̱,
tees ya̱ niꞌ ziꞌl gyicy cupa̱ consuel lo Ñgyoozh.
4 Ya̱ bdiña̱ tub coz lo Ñgyoozh.
Tub zi coz rlagya̱.
Coz nu rlagya̱ zeꞌ, ndeꞌ nu cyiiña̱ yuꞌm dub laa lat nu mbaña̱,
gun orzeꞌ zaca̱ nu dzi cyit nam,
nunu ne̱e̱ du̱m nañ yuꞌ nim.
5 Ornu shuub dzi nu cyid coz deet,
orzeꞌ nañ yuꞌ nim gyicy mi nu glaa lagya̱ ni coz deet.
Orzeꞌ nañ yuꞌ zeꞌ güiim ya̱.
Mi zeꞌ zum ya̱ tub lugaar nu a̱ꞌ rishdzidz gal na tub too gyitaꞌ gya.
6 Orzeꞌ ya̱ gyicya̱ gan de losaꞌ yu̱u̱ nu yuꞌ dub yub la lo̱.
Orzeꞌ ya̱ grica̱ bañcyug nu cha gun nañ yuꞌ wedz ni Ñgyoozh.
Nunu grish ti̱ nu gyet lagya̱,
nunu dula̱ nu gyabica̱ gyel mbecy nim.
7 Ñgyoozh, bzuub gyidag ne̱ ornu rne̱e̱ du̱ ru.
Gushni ñuu lagy ya̱, nunu blocyuub ya̱ ornu rne̱e̱ du̱ ru.
8 Ya̱ rne̱e̱ nañ lardo̱o̱ nu rlagy ñi yuba̱ ru.
Ndeꞌ nu ryuba̱ ru, Ñgyoozh.
9 Orzeꞌ cueꞌ cach lor lo̱.
Ñgyoozh, biñ nu rboo mbañ ya̱, ya̱ naca̱ tub yu nu ricy coz nu rniir.
Orzeꞌ cueꞌ co chur ya̱ lor nu nac nu rzi lagy ru ne̱.
Tub zi la ru nac ru biñ nu rlocyuub ya̱.
Cueꞌ zeeñ ru ya̱, nunu cueꞌ zaan ru ya̱.
10 Mas uza̱, nu ña̱a̱ zaan dey ya̱, tees ru gyash ru ya̱.
11 Ñgyoozh, blyuu ne̱ de coz nu rlagy ru nu gyicya̱.
Nunu gua nu ya̱ tub nez nu sac rishdzidz,
gun yuꞌ zañ losaꞌ yu̱u̱.
12 Cueꞌ zaan ru gyet laga̱ yaa de losaꞌ yu̱u̱.
De yu zeꞌ rshet yaa dey ya̱ nu riidz fals, gal nu riidz dañ.
13 Tees ya̱ neña̱ nu waded la gzaca̱ nu dzi nap Ñgyoozh
lat nu zu̱ gyishlombecy ii.
14 Bicy cup consuel lo Ñgyoozh.
Briic fers nunu cueꞌ shiꞌñ ru baloor.
Bicy cup consuel lo Ñgyoozh.