Mbecy nu ricy coz nu seꞌñ dub gusht la rcyiiñ yu: Tub riidz ni Dabi
26
Ñgyoozh,
mnii nu sac falt ne̱,
gun ya̱ wagyicya̱ coz a̱ꞌ nap,
nunu ya̱ nu blaazh la ricy cupa̱ consuel lor.
2 Ñgyoozh,
nap bgüii la mbecy na̱,
nunu bicy preb ya̱.
Bicy nu gabe nu coz nap yuꞌ nañ shcab ne̱,
nunu bicy nu gabe nu coz nap yuꞌ nañ lardo̱o̱.
3 Gun ya̱ ca ica̱ nu ru zaab rca lar ya̱,
nunu ya̱ ricy pa̱a̱ ni ru.
4 Ya̱ rila wacsuba̱ tublaazh nu mbecy rgu̱u̱,
nunu wagyatublaazha̱ nu de mbecy rzuu lo.
5 Ya̱ riñ lagya̱ gyatublaazh du̱ mbecy a̱ꞌ nap,
nunu wacsuba̱ tublaazh nu de mbecy shiñ ricy.
6 Ñgyoozh,
ya̱ rna̱a̱ par nu gabe nu sac falt ne̱,
nunu yecha̱ꞌ zeꞌ nu driib zily mbecy ru.
7 Ya̱ rdula̱ lor nu rica̱ gras nir,
nunu rzata̱ de coz ily nu bicy ru.
8 Ñgyoozh,
ya̱ dzi yet lagya̱ yuꞌ zeꞌ nu zur,
lugaar zeꞌ nu yuꞌ gyel lily nir.
9 Cueꞌ cuic ru cashtig ne̱ tublaazh la nu de mbecy cyi.
Cueꞌ zaan ru nu zaca̱ gal nu rzac mbecy nu rut losaꞌ.
10 De mbecy zeꞌ dub laa tiem shiñ ricy dey.
Dub laa tiem “O” rnii dey rash yu tiñ
par nu gyicy yu mod nu walab seꞌñ.
11 Zeꞌ ya̱ ricya̱ coz nu seꞌñ.
Orzeꞌ gushni lagy ya̱,
nunu bloo mbañ ya̱.
12 Orzeꞌ zu̱ tub lugaar nu sac rishdzidz.
Orzeꞌ gyabica̱ gyel mbecy ni Ñgyoozh lat de mbecy nu yuꞌ tublaazh nim.