Ñgyoozh niim ca na nez gash de mbecy nim: Tub riidz ni Dabi
25
Ñgyoozh, Shuaana̱, lo ru rdiña̱ de coz nu rlagya̱.2 Lo ru ricy cupa̱ consuel.
Cueꞌ zaan ru nu gruu gyel mbecy ne̱.
Cueꞌ zaan ru nu losaꞌ yu̱u̱ gyicy nuy ya̱.
3 Ni tub la mbecy nu ricy cup consuel lor, waruu gyel mbecy niy.
Zeꞌ de mbecy nu sac la la gyiꞌ rnid ruꞌy lor, de yu zeꞌ gruu gyel mbecy niy.
4 Ñgyoozh blyuu ne̱ ca na nez nu rlagy ru nu rusha̱.
Blyuu ne̱ lac mod rlagy ru nu chesa̱.
5 Blyuu lo̱ lac mod rlagy ru nu gyicy de mbecy nir,
gun ru nac ru Ñgyoozh ne̱ nu rboo mbañ ya̱.
Ya̱ dub laa tiem ricy cupa̱ consuel lor.
6 Ñgyoozh, byezaꞌ lagy nu rcar de mbecy nir,
nunu dzi gugy nar guc ru nu de̱ ya̱.
Ni bicy nur de̱ nese gulas.
7 Bicy sulagy ne̱ nu nac de coz a̱ꞌ nap nu de cyi nu bicya̱ lat nu gufeña̱.
Ñgyoozh, gyezaꞌ lagy ru ya̱ nu nac nu zaab rca lar ya̱,
nunu zaab nap la ricy nur ya̱.
8 Ñgyoozh nac mi biñ nu nap,
nunu ricy mi coz nu seꞌñ.
Rlyuum lo de mbecy cyi nez nu rlagy ñi chay.
9 Mi zeꞌ rlyuum nez ni de mbecy shni
par nu gad lagy dey coz nu seꞌñ,
nunu rlyuum ni dey lac mod rlagy mi nu gyicy yu.
10 Ornu rlyuum ni mbecy lac mod gyicy dey,
orzeꞌ riidz rishli rniim nunu rcam dey.
Ni gyicy num de yu nu gyicy yac nu de riidz ni trat nim, de yu nu rzuub gyidag nim.
11 Ñgyoozh, ya̱ tonaꞌ la zañ cyi bicya̱.
Orzeꞌ bicy sulagy ne̱ nu nac ñii dub gal mod nu mniir nu gyicy ru.
12 Mbecy nu rdzib lagy lo Ñgyoozh, yu zeꞌ lyuum niy lac mod rlagy ñi nu chesay.
13 Dub laa tiem gyicy mi nu nap cyiiñ yu,
nunu yaa de nez yu gyiyeeñ de yu ni ledz na.
14 Ñgyoozh nac mi amig ni de mbecy nu rdzib lagy lom,
nunu gyicy mi nu gad lagy dey la na trat nu bicy mi num dey.
15 Ya̱ drish lo̱ lo Ñgyoozh dub laa tiem nu locyuub mi ya,
nunu co chum ya̱ lo rishdzidz.
16 Ñgyoozh, bicy cuen ya̱, nunu gush shni lagy ya̱,
gun ub zi̱ zesu̱, nunu rshet zi mbecy ya̱.
17 Ya̱ dzi deet rac nañ lardo̱o̱.
Orzeꞌ bicy nu cheti ye lagya̱,
nunu bloo chu ya̱ lo de coz deet nu rzaca̱.
18 Bduꞌ cuen de coz shni nu de coz deet nu rzaca̱,
nunu bicy sulagy ne̱ nu nac de cyi̱.
19 Bduꞌ cuen nu tonaꞌ la yuꞌ zañ losaꞌ yu̱u̱.
Bduꞌ cuen nu tonaꞌ la wayet lagy dey ya̱.
20 Ñar ya̱ nunu co mbañ ru ya̱.
Cueꞌ zaan ru nu gruu gyel mbecy ne̱ lo losaꞌ yu̱u̱.
Lo ru yapa̱ nu laa lagy ya̱.
21 Nu nac nu naca̱ mbecy nap, nunu naca̱ mbecy sac falt ni,
ndeꞌ nu cueꞌ zaan ru nu zac deeta̱,
gun lo ru ricy cupa̱ consuel.
22 Ñgyoozh ne̱, bloo chu de mbecy Israeel lo de coz deet nu rzac yu.