Ñgyoozh nac mi rey ni dela coz nu yuꞌ gyishlombecy: Tub riidz ni Dabi
24
Gyishlombecy nu dela coz nu yuꞌ loñ,
delañ nac ñii ni Ñgyoozh.
Dela coz mbañ nu yuꞌ loñ nac ñii nim.
2 Gun Ñgyoozh bzum cyong gyishlombecy,
nunu bzum ñii zeꞌ nu gyi ni nis.
3 ¿Cyu ricy cup rishbeey nu chup too bicy ni Ñgyoozh?
Nunu,
¿cyu ricy cup rishbeey nu chuꞌ nañ yuꞌ yon nim?
4 De mbecy nu gac chuꞌ nañ yuꞌ yon nim,
ndeꞌ de yu nu caacy yaa,
gal nu de yu nu rnii too coz caacy,
gal nu de yu nu wagriib zily ñgyoozh nab,
gal nu de yu nu ricy paa nu riidz nu nii.
De yu zeꞌ yu nu gac chuꞌ nañ yuꞌ nim.
5 Ñgyoozh,
biñ nu co mbañ dey,
nap gyicy num de yu zeꞌ,
nunu niim nu sac falt ni dey.
6 Ni mod rac nu de yu nu ryub Ñgyoozh,
de yu nu ryub mod nu chuꞌ lo Ñgyoozh ni Jacob.
7 ¡Pshaal der roꞌ ni yuꞌ wedz yon ni Ñgyoozh!
¡Pshaal der dub shee lañ!
Gun orzeꞌ gac chuꞌ rey lily.
8 ¿Cyu rey lily ndeꞌ?
Mi zeꞌ Ñgyoozh,
Shuaan na,
biñ fert nunu biñ baloor.
Mi zeꞌ tonaꞌ la fert mi ornu rucoom lat gyel yuu.
9 ¡Pshaal der roꞌ ni yuꞌ wedz yon ni Ñgyoozh!
¡Pshaal der dub shee lañ!
Gun orzeꞌ gac chuꞌ rey lily.
10 ¿Cyu rey lily nu riib ic gal gyibaa?
¡Mi zeꞌ Ñgyoozh,
biñ nu riib ic zañ nac anc!
¡Mi zeꞌ biñ nu nac rey lily!