Shuaan de̱ ru rñar ya̱: Tub riidz ni Dabi
23
Ya̱ na gal na tub shily.
Zeꞌ Ñgyoozh nac mi biñ nu rña ya̱.
Orzeꞌ se la la coz gyicy falt ne̱.
2 Ricy mi nu rzu lagya̱ zeꞌ nu nash gyizh caꞌ.
Cha num ya̱ zeꞌ nu gugy yeed nis.
3 Rbic mi fers ne̱ tuubaꞌ tir.
Cha num ya̱ nez nu seꞌñ,
gun orzeꞌ ca lagy mbecy lom.
4 Ñgyoozh,
Shuaana̱,
ornu deda̱ gyerlas cow,
orzeꞌ wadziba̱ lo ni tub la coz a̱ꞌ nap,
gun ru gac nur ya̱.
Garot nir,
gal nu yangar gyicy ñi nu zu ye lagya̱.
5 Ru zur gyaꞌn lo̱ nu da̱w gyit lo rgüii la de losaꞌ yu̱u̱.
Ru pcoor asecy zguul to̱o̱ par nu gabe nu yet lagy ru nu yapa̱ lor.
Nunu pchaa lar taz ne̱ gal rshu lañ.
6 Orzeꞌ ya̱ rad lagya̱ nu waded la nap ricy nur ya̱,
nunu rcar ya̱ dub laa lat nu mbaña̱,
nunu ya̱ cyiiña̱ yuꞌr tub la.