Mbecy nu dzi bzac zi byabic yu gyel mbecy ni Ñgyoozh: Tub riidz ni Dabi
22
Ñgyoozh ne̱, Ñgyoozh ne̱, ¿lagu bzaan ru ya̱?¿Lagu wacyid güiir ya̱?
¿Lagu wayicy cuen ru de riidz shni nu mne̱e̱ lor?
2 Ñgyoozh ne̱, dzi rel la mne̱e̱ du̱ ru,
tees ru wayicy cuen ru de riidz nu mne̱e̱.
¡Rila wagad nu zu lagya̱!
3 Tees ru nac ru biñ yon.
Ru riib ic ru gal lugaar zeꞌ nu driib zily mbecy Israeel ru.
4 De gyitoo bel ne̱ de̱ bicy cup dey consuel lor.
Bicy cup dey consuel lor,
nunu ru bloo mbañ ru dey.
5 Mnii nu dey ru nu locyuub ruy.
Orzeꞌ ru bloo mbañ ru dey.
Bicy cup dey consuel lor,
nunu ru bicy ru gal nu rlagy yu.
6 Nañ gal na nu ya̱ a̱ꞌ naca̱ mbecy,
sinu na̱ gal na tub gula.
Tonaꞌ la rigy nu naañ mbecy ya̱.
7 De mbecy nu rzac ya̱ rgubdzaay ya̱.
Shiñ ricy gyidiꞌñ dey lo̱,
nunu rca chu yeñ dey.
8 Orzeꞌ rnii dey: “Yu re bicy cup yu consuel lo Ñgyoozh.
Na rlagy ñi locyuub mi yu.
Benu Ñgyoozh yet lagy mi yu,
orzeꞌ na co mbañ mi yu”, rnii dey.
9 Ru bloo nap ru ya̱ ornu gula̱ ni ña̱a̱,
nunu mñar ya̱ lat nu pca̱ lyush mi.
10 Nese anzir nu gala̱, ru mñar ya̱.
Nese nañ ña̱a̱ ru nac ru Ñgyoozh ne̱.
11 Cueꞌ gyazet ru lo̱,
gun gaab ga yuꞌ coz deet,
nunu sac cyu nu locyuub ya̱.
12 De losaꞌ yu̱u̱ na dey gal na de tor nu bri loꞌ ya̱.
Na dey gal na tor dañ nu yuꞌ Basan nu bri loꞌ ma ya̱.
13 Rshuu dey gal nu rshuu biidz dañ.
Rshaa ruꞌ dey nunu rlagy yu gzab yu nu cha tib yu to̱o̱.
14 Blazh fers ne̱ gal nu rac nu nis nu rshu lo yu.
Rze̱e̱ nu na̱ gal nu na mbecy nu bruu za ruꞌ rit.
Rze̱e̱ nu añ ne̱ rchiiñ ñi gal nu rchiiñ za gyergyiñ.
15 Fers ne̱ byac ñi gal na tub psiꞌñ laꞌ guwach.
Lyudza̱ gush lañ nañ mba̱.
Nañ gal na nu bi bduꞌ chuꞌr ya̱ lo yu nu sñumiiñ ziꞌl bi guta̱.
16 De mbecy a̱ꞌ nap nu yechaꞌ lo̱ na dey gal na tub nac che̱ꞌ nu dri loꞌ ya.
Pcad güii dey ya̱a̱ nu gyi̱ꞌ.
17 Se rit ziꞌl la̱ nu gugyidza̱.
De losaꞌ yu̱u̱ se lo̱ ziꞌl ca lo dey.
18 Bleez dey de shaba̱ lat losaꞌy,
nunu bloo dey suert ben ca nay dugyiy tub gañ.
19 Tees ru Ñgyoozh cueꞌ gyazet ru lo̱.
Ru biñ nu rbic fers ne̱.
Dzach ru, da güiir ya̱.
20 Cueꞌ zaan ru nu gata̱ nu mandzicy.
Cueꞌ zaan ru nu de mbecy nu na gal nu na che̱ꞌ zeꞌ cut yu ya̱.
21 Bloo ya̱ ruꞌ biidz zeꞌ.
Pca ya̱ nu cueꞌ cub de tor show ya̱.
22 Orzeꞌ ya̱ zata̱ de coz nu bicy nur ya̱ lat de losa̱ꞌ,
nunu gyabica̱ gyel mbecy nir zeꞌ nu yuꞌ tublaazh dey.
23 De ru mbecy nu rdzib lagy lo Ñgyoozh, ¡byabic der gyel mbecy nim!
De ru nez Jacob, ¡briib zily der mi!
De ru nez Israeel, ¡pca der mi!
24 Gun mi zeꞌ wayicy gyidz mi de mbecy zi,
nunu rgüiim dey ornu rzac ziy,
nunu watush cya ich mi lo dey,
sinu “O” rniim ornu rnii dey nu locyuub mi yu.
25 Orzeꞌ lat de mbecy zigy nir gyabica̱ gyel mbecy nir
nu nac de coz nu bicy nur ya̱.
Ya̱ gyicya̱ de coz nu mne̱e̱ nu gyicya̱ lor
lat de mbecy nu rdzib lagy lor.
26 De ru mbecy nu rzac zi, bdow gyel la der.
Orzeꞌ de ru, mbecy nu ryub Ñgyoozh, byabic der gyel mbecy nim.
Orzeꞌ tuñ cyiiñ ru gyishlombecy.
27 Orzeꞌ de mbecy nu rcyiiñ gal zeꞌ nu byazet zir ni gyishlombecy, gyezaꞌ lagy dey Ñgyoozh,
nunu cyid dey lom tuubaꞌ tir.
Orzeꞌ de lo la nez mbecy ca dey mi.
28 Gun Ñgyoozh nac mi rey,
nunu riib ic mi de lo la nez mbecy.
29 De yu lily gzaab tiily dey lo Ñgyoozh nu cay mi.
De la mbecy nu nil ca lo cuen nu gat, de yu zeꞌ gzaab tily dey lom,
gun wac cui mbañ dey nu nac ub ziꞌl yu.
30 De neza̱ nu yad par lo zu bich dey nu nac Ñgyoozh,
nunu zat dey mi lo de nez yu nu yad par lo.
31 De mbecy nu gal par lo, de yu zeꞌ gyeñ dey nu Ñgyoozh ricy mi de coz nu seꞌñ,
nunu gyeñ dey de coz nu bicy mi.