Ñgyoozh locyuub mi rey ni mbecy Israeel nu gyicy yu gan de losaꞌ yuuy: Tub riidz ni Dabi
21
Ñgyoozh, Shuaan na, rey ne̱ de̱ zu cyit lagy yu,gun ru briic ru fers niy.
Dzi zu cyit lagy yu
gun ru bicy ru nu bicy yu gan de losaꞌ yuuy.
2 Ru bicy ru de coz nu rlagy yu.
Ru bicy ru gal nu na coz nu bdiiñ yu lor.
3 Ru “O” mniir nu biid yu lor
nunu nap bicy nur yu.
Ru bicy ru nu bzuub mbecy coron or tooy
ornu byeeñ yu riiñ.
4 Bdiiñ yu lor nu tuñ cyiiñ yu gyishlombecy.
Orzeꞌ ni bicy ru.
Bicy ru nu tuñ pcyiiñ yu,
nunu nap rcyiiñ yu.
5 Nac yu mbecy lily nu nac ru.
Bicy zily ruy nunu bicy ru nu gya bzuy.
6 Ru nap ricy nur yu dub laa tiem.
Ricy ru nu zu cyit lagy yu
nu nac nu zur zeꞌ nu zuy.
7 Orzeꞌ rey ne̱ de̱ ricy cup yu consuel lo Ñgyoozh.
Orzeꞌ waruuy riiñ,
gun Ñgyoozh, biñ nu gya zir zu, rcam yu.
8 Rey ne̱ de̱, ru cub ru de losaꞌ yuur.
Ru cub ru dela mbecy nu rzi lagy lor.
9 Ru nit lor dey
gal nu rnit lo la coz lo gyi nu ri nañ yo
ornu gruu zac ru nu gri beer ni dey.
Ñgyoozh, Shuaan na, suun mi dey
nu nac nu rzi lagy mi.
Orzeꞌ nit lo dey lo gyi.
10 Nit lor de nez yu gyishlombecy.
Nit lor de nez yu lat de nez mbecy nu yad par lo.
11 Mas rnii too dey nu shiñ gyicy nuy ru,
mas rboo ic dey lac mod shiñ na nu gyicy nuy ru,
tees wayicy dey gan.
12 Tees ru zeed ru gyech ni guaz too dey.
Orzeꞌ gyicy ru nu gruu chuy.
13 Ñgyoozh, Shuaan de̱, bicy nu gabe nu dzi zily
nac ru nu nac nu dzi fert ru.
Dul de̱ nunu gyabic de̱ gyel mbecy nir
nu nac de coz ily nu bicy ru.