Mbecy rnii nuy Ñgyoozh nu gyicy rey gan losaꞌ yuuy: Tub riidz ni Dabi
20
Ñgyoozh, Shuaan na, biñ nu briib zily gyitoo Jacob,mi zeꞌ gzuub gyidag mi ni der tiem nu gzac deet ru,
nunu co chum ru lo de rishdzidz.
2 Mi zeꞌ gruum gashtal nañ yuꞌ yon nim cyid mi locyuub mi ru.
Gruum nese too bicy Sión nu laagy yaam ru.
3 “O” niim gash mi de gun nu cuic ru lom.
Nunu nap rgüiim lo de bañcyug nu rbic ru nu gac gun lom.
4 Mi zeꞌ cuic mi de coz nu rbigy lagy ru lo.
Nunu gyicy mi nu gac lo de coz nu rboo ic ru.
5 Grishti̱ de̱ nu gyet lagya̱ ornu gyicy ru gan de losaꞌ yuur.
Shes nañ de̱ bander ne̱ nu gyabic de̱ gyel mbecy ni Ñgyoozh
nu nac nu ru bicy ru gan lat gyel yuu.
Orzeꞌ Ñgyoozh gyicy mi dub gal nu na coz nu rgyiiñ ru lom.
6 Na ya̱ rad lagya̱ nu Ñgyoozh locyuub mi yu nu bloo sum nu gac rey
nu gyicy yu gan lat gyel yuu.
Mi zeꞌ “O” niim gashtal gyibaa yon nim.
Gyicy mi nu coz ily gyicy yu gan nu nac nu dzi fert mi.
7 Yuꞌ mbecy ricy cup yu consuel lo caret ni gyel yuu.
Yuꞌ mbecy ricy cup yu consuel lo de cuay niy.
Tees de ub na ricy cup na consuel lo Shuaan na, biñ nu nac Ñgyoozh nin.
8 De yu nu ricy cup consuel lo de coz zeꞌ, glagy gyiꞌy.
Orzeꞌ gyes saay lat gyel yuu.
Tees de ub na fert gzun lat gyel yuu.
9 A̱ Ñgyoozh, ¡bicy nu gyicy rey gan lat gyel yuu!
¡Bzuub gyidag ornu de̱ ya̱ dredz de̱ ru nu locyuub ru ya̱!