De coz nu psaꞌ lagy Ñgyoozh ricy ñi nu rabee gyel lily nim: tub riidz ni Dabi
19
Baa ricy ñi nu naal la rabee gyel lily ni Ñgyoozh.De coz nu psaꞌ lagy mi baa ricy ñi nu rabee nu cyit ricy mi.
2 Dzi nu dzii la rabee gyel lily ni Ñgyoozh.
Nunu gazaꞌ rel la rabee nu dzi zily nac mi.
3 A̱ꞌ zaab tiꞌ mbecy rniiy, nunu sac la riidz,
4 tees raso̱o̱ ni gyel lily nim drush las ñi dutuub la gyishlombecy,
nunu reñ mbecy ñi gal zeꞌ nu guca gyiꞌ gyishlombecy.
Orzeꞌ baa Ñgyoozh pcaam seꞌ doo güidz.
5 Or napor driib doo güidz
gal nu ricy tub nob ornu druuy zeꞌ nu pchelaay.
Ricy ñi gal nu ricy tub mbecy nu rash carer.
Yet lagy yu zay nez niy.
6 Driib doo güidz tub laꞌ cuit gyishlombecy.
Zeꞌ tub laꞌ gaꞌ cuit ñi za doo.
Ni tub la coz wagac cach loñ lo ba nu rbic doo.
7 De riidz ni leey nu bzeeñ Ñgyoozh sac la falt niñ.
Rbic ñi gyel mbañ ni mbecy.
De riidz nu rnii Ñgyoozh, ndeꞌ coz nu gyicy cup na consuel lo.
Gac cuic ñi shcab ni mbecy shni.
8 De coz nu rnii Ñgyoozh nu gyicy mbecy, ndeꞌ coz nu seꞌñ.
Ricy ñi nu racyit lagy yu.
De mandaar ni Ñgyoozh nac ñii coz cacy.
Ricy ñi nu gyal shcab ni mbecy.
9 Nu rdzib lagy mbecy lo Ñgyoozh, ndeꞌ coz caacy.
Gzuñ tub la.
De gyel fushtiz ni Ñgyoozh, ndeꞌ coz nu seꞌñ.
Dub laa tiem nac ñii coz nu laab ñi.
10 ¡De riidz zeꞌ dzi zir sac ñi gazeꞌ or ga ub!
¡Nap zir chetiñ nin gazeꞌ dziñ doo!
11 Nunu niꞌ ziꞌl ryooñ rishlo ya̱, yu nu ricy coz nu rlagy ru, Ñgyoozh,
nunu rusub ñi ne̱ nu nac nu ricy yaca̱ niñ.
12 Ni tub la mbecy wagad lagy yu ornu rzuꞌ falt ni ub yu.
Ñgyoozh, bicy sulagy ne̱ nu nac de falt nu wagad lagya̱ nu guꞌ ne̱.
13 Nunu cueꞌ zaan ru nu se mbi la rgüi̱i̱ gyicya̱ cyi.
Cueꞌ zaan ru nu de cyi zeꞌ gyub ic ñi ya̱.
Gun orzeꞌ gaca̱ mbecy nu sac falt ni.
Orzeꞌ gla̱ lo de cyi a̱ꞌ nap.
14 A̱ Ñgyoozh, ya̱ drish lo̱ nu güii nap ru lo de riidz nu driib ru̱ꞌ,
nu de coz nu rnii to̱o̱,
gun ru nar gal na gyitaꞌ nu cach lo̱ lo losaꞌ yu̱u̱,
nunu nac ru biñ nu brish cyi̱ꞌ.