Dabi rul yu lo Ñgyoozh nu nac nu bicy yu gan de losaꞌ yuuy
18
Ya̱ tonaꞌ la rca̱ ru, Ñgyoozh, biñ nu rbic fers ne̱.¡Ya̱ tonaꞌ la rca̱ ru!
2 Ñgyoozh nac mi biñ nu rña ya̱.
Mi zeꞌ nam gal nu na tub lugaar nu cach lo̱ ni losaꞌ yu̱u̱.
Mi zeꞌ gyicy mi nu gla̱ lo dey,
nunu nac mi Ñgyoozh ne̱.
Nam gal nu na tub gyitaꞌ nu cach ñi ya̱.
Nam gal nu na tub gyiib she nu soow cuerp ne̱,
gun orzeꞌ se la la zaca̱.
Mi zeꞌ biñ nu gac co mbañ ya̱.
Nam gal nu na tub lugaar nu rila wayada̱ ni de losaꞌ yu̱u̱.
3 Ya̱ Rnishbaa lo Ñgyoozh.
Orzeꞌ rboo mbañ mi ya̱ yaa de losaꞌ yu̱u̱.
¡Mi zeꞌ yad ñi nu gyabic na gyel mbecy nim!
4 Ya̱ bzu̱ lo rishdzidz nu gata̱.
Gudziba̱ gal nu rdzib mbecy lo nis yu nu nit lo.
5 Tonaꞌ la rishdzidz nu ñgyata̱.
Dub yub la lo̱ bzu de losaꞌ yu̱u̱ caa nu cut.
6 Lat nu deet bzaca̱, ya̱ mnishba̱a̱ lo Ñgyoozh.
Mnishba̱a̱ lom nu locyuub mi ya̱.
Orzeꞌ gal nañ yuꞌ wedz nim güeñ mi de riidz nu mne̱e̱.
Bzuub gyidag mi ornu mnishba̱a̱ lom nu locyuub mi ya̱.
7 Gazeꞌ nu briib tub duru ily.
Orzeꞌ pcueñ de bicy gashtal zeꞌ nu zub la gyiꞌñ,
gun Ñgyoozh guzi lagy mi.
8 Gazeꞌ nu briib dzeeñ gyidiꞌñ mi.
Zeꞌ ruꞌm briib gyi nu nit lo.
Nunu briib boo rely ruꞌm.
9 Orzeꞌ pshaal mi roꞌ ni baa bet mi.
Zub gyiꞌm too tub za cas ornu bet mi.
10 Gusub mi ich tub mbecy nu zub loweꞌ wes nañ mi.
Dzach za nu bim gal nu ricy tub chigyiñ.
11 Nu zu cow, ndeꞌ psoow mi ub mi.
Zeꞌ za nan ni gyey zeꞌ nu dza laa lat ñi yuꞌ nis, ndeꞌ yuꞌm.
12 Lom byaal tub gyi gal nu ricy gyi ni guzii.
Lat za bruu gyey gye, nunu bruu boo rely.
13 Ñgyoozh, biñ nu gya zir zu, gal baa mniim lat guzii.
Orzeꞌ bet gyey gye, nunu bruu boo rely.
14 Orzeꞌ bzeed mi yag too lyuch too de losaꞌ yuum.
Orzeꞌ brush las dey.
Nu gyi ni guzii blochum dey lom.
15 Ornu ru pshuu nur losaꞌ yuur Ñgyoozh,
ornu ru brish ti nur dey,
orzeꞌ byaal lo nisyudoo,
nunu bruu zac gal zeꞌ nu gyi niñ.
Zeꞌ bruu zac zeꞌ nu gyi ni gyishlombecy,
16 Ñgyoozh bzaab yaam ya̱ nese zeꞌ nu gya.
Orzeꞌ bloom ya̱ lo nis nu dzi gyi.
17 Bloo mbañ mi ya̱ yaa de losaꞌ yu̱u̱ nu dzi fert, gal nu de yu nu guzi lagy lo̱,
gun wagye̱e̱ lo dey nu tantaꞌ fert dey.
18 Pshet yaa dey ya̱ tiem nu dzi deet bzaca̱,
tees Ñgyoozh briic mi fers ne̱.
19 Bloom ya̱ lugaar zeꞌ nu rishdzidz.
¡Bloo mbañ mi ya̱ gun rcam ya̱!
20 Ñgyoozh byabic mi i̱ dub gal nu na coz seꞌñ nu ricya̱.
Nap ricy num ya̱, gun ya̱ sac falt ne̱ lom.
21 Gun ya̱ bicy pa̱a̱ nu de coz nu rlagy mi.
¡Rila wanruu chu̱ lom!
22 Ya̱ bicy pa̱a̱ nu dela coz nu mniim nu gyicya̱.
¡Rila wanruu chu̱ lo ley nim!
23 Ya̱ sac falt ne̱ par lom.
Wanshet ica̱ nu gyicya̱ coz a̱ꞌ nap.
24 Ndeꞌ nu Ñgyoozh byabic mi i̱ dub gal nu na coz seꞌñ nu ricya̱.
Nap ricy num ya̱, gun ya̱ sac falt ne̱ lom.
25 Ñgyoozh, ru ricy paar nu de mbecy nu ricy paa nu ru,
nunu nap ricy nur de yu nu sac falt ni.
26 Sac falt ni coz nu ricy ru nur de mbecy nu sac falt ni.
Tees ru zu gaa la lagy ru lac ricy nur de mbecy a̱ꞌ nap.
27 Ru co mbañ ru de mbecy shni,
tees cor gyel mbecy ni de mbecy leꞌ.
28 Ñgyoozh, ru pcaar gyi nañ lardo̱o̱.
Orzeꞌ bruu chu nu cow nañ ñi.
29 Nu nac ru gac shet ya̱a̱ de losaꞌ yu̱u̱.
Nu nac ru gac deda̱ loꞌ nu rsoow ruꞌ gyedz ni dey.
30 Mod nu ricy Ñgyoozh, ndeꞌ sac falt niñ.
Gac gyicy cup na consuel lo riidz nim.
¡Ni wazaan mi nu se la la zac de mbecy nu rza lom nu laa lagy!
31 Gun sac cyuꞌ zir Ñgyoozh, sinu tub zi la ub mi.
Nunu sac reñaꞌ ñgyoozh nu na gal nu na tub gyitaꞌ nu chan lo nu cach lon lo de losaꞌ yu̱u̱n.
32 Mi zeꞌ biñ nu rbic fers ne̱.
Mi zeꞌ ricy mi nu sac falt ne̱.
33 Bicy mi nu zu cyigy gyi̱ꞌ gal nu zu cyigy gyiꞌ dziñ.
Ricy mi nu a̱ꞌ rishdzidz rdeda̱ de logyiꞌ.
34 Mi zeꞌ rlyuum ne̱ lac mod gyicya̱ lat gyel yuu.
Briic mi fers ne̱ nu shaca̱ duu lyaar ni guaz fert.
35 Ñgyoozh, ru rzaab ic ru ya̱,
nunu rboo mbañ ru ya̱.
Nunu nu nac ru guud fers ne̱ nu chesa̱.
Nunu ya̱ bicya̱ gan nu nac nu dzi nap bicy nur ya̱.
36 Ru bicy ru nu wangada̱ ni de losaꞌ yu̱u̱,
nunu dub laa tiem gugye̱e̱ loy.
37 Bzaba̱ ich losaꞌ yu̱u̱ gal bruꞌña̱ la̱ lo dey.
Gal mnit lo̱ la̱ dey, gazeꞌ nu bish cya̱.
38 Orzeꞌ bzeeda̱ ni dey.
Orzeꞌ wangacaꞌ gyeshtey.
Wes saa dey yeñ gyi̱ꞌ.
39 Gun briic ru fers ne̱ par nu chuco̱o̱,
nunu bicy ru nu bicya̱ gan de losaꞌ yu̱u̱.
40 Bicy ru nu bruu chu de losaꞌ yu̱u̱ lo̱.
Orzeꞌ bduta̱ de yu nu rzi lagy lo̱.
41 Bredz dey cyu nu locyuub yu,
tees se cyu la bloo mbañ dey.
Mas ru, Ñgyoozh wansuub gyidag ru ni dey
ornu bredz yu ru.
42 Psuuna̱ dey.
Byac yu gal nu na yu gyedz nu rza nu bi.
Bzuub gyi̱ꞌ too dey gal nu rzuub gyi̱ꞌ too biñ nu nguaa gyernez.
43 Ñgyoozh, ru bloo mbañ ru ya̱ yaa de mbecy rnid ruꞌ.
Bicy ru nu gyub ica̱ zañ lo mbecy.
Mas de mbecy nu a̱ꞌ yuꞌ lo̱ bicy dey coz nu mne̱e̱.
44 De mbecy yad byabe dey lo̱ nu pca lagy dey lo̱.
Ornu güeñ dey de coz nu mne̱e̱,
orzeꞌ bzuub gyidag dey ne̱.
45 Blazh baloor ni dey.
Orzeꞌ rash la bis yu bruuy nañ de yuꞌ fert ni niy.
46 ¡Ya̱ rad lagya̱ nu Ñgyoozh mbañ mi!
¡Gyabic na gyel mbecy ni biñ nu na gal nu na tub gyitaꞌ nu chan cach lon lo de losaꞌ yuun!
¡Dzi ga gya zu Ñgyoozh, biñ nu rboo mbañ ya̱!
47 De coz nu ricy de losaꞌ yu̱u̱, mi zeꞌ rtush cyam ni dey.
Bicy mi nu riib ica̱ de lo la mbecy.
48 Bloo mbañ mi ya̱ yaa de losaꞌ yu̱u̱.
Ñgyoozh, ru bicy ru nu bicya̱ gan de losaꞌ yu̱u̱,
nunu wansaan ru nu shiñ gyicy nu mbecy rut losaꞌ ya̱.
49 Ndeꞌ nu ya̱ gyabica̱ gyel mbecy nir lat de lo la mbecy,
nunu dula̱ lor nu gyabica̱ gyel mbecy nir.
50 Ñgyoozh ricy mi nu ya̱, yu nu nac rey nim, gyicya̱ gan de losaꞌ yu̱u̱.
Ricy mi nu rabee nu rcam ya̱, yu nu pcuim.
Ni ricy num ya̱, Dabi, gal nu de neza̱ nu ruu zac par lo,
nunu ni ricy mi par tub la.