Tub mbecy nu sac falt ni rgyiiñ yu gyel fushtiz lo Ñgyoozh: Tub riidz ni Dabi
17
A̱ Ñgyoozh, bzuub gyidag ne̱ornu rdiña̱ gyel fushtiz lor.
Bduꞌ cuen de riidz nu drish ti̱ lor.
Siñ bzuub gyidag ornu ya̱ rne̱e̱ du̱ ru,
gun ya̱ a̱ꞌ gu̱u̱.
2 ¡Ru gyicy ru nu gruu caacya̱,
gun ru rad lagy ru ca na coz nu seꞌñ!
3 Ru rad lagy ru la na nañ lardo̱o̱.
Ru ryiid güiir ya̱ rel.
Ru bicy ru preb ya̱
gal nu ricy dey preb or lo lyush gyi.
Orzeꞌ wangyap ru coz a̱ꞌ nap nañ lardo̱o̱.
Ya̱ wane̱e̱ coz a̱ꞌ nap,
4 gal nu ricy renaꞌ mbecy.
Ya̱ bruu chu̱ lo de mod nu ricy mbecy nu rshet zi losaꞌ.
Bicya̱ dub gal mod nu pcaar ya̱ nu gyicya̱.
5 Ya̱ bicya̱ dub gal mod nu rlagy ru nu gyicya̱.
Rila wanruu chu̱ lo mod zeꞌ.
6 A̱ Ñgyoozh, ya̱ rne̱e̱ du̱ ru gun ru locyuub ru ya̱.
Nap bzuub gyidag nunu bduꞌ cuen de riidz nu rne̱e̱.
7 Bicy nu gabe nu dzi rcar mbecy nir.
Ru biñ nu rboo mbañ mbecy yaa losaꞌy
benu cyid dey lor par nu ñar yu.
8 Mña ya̱ gal nu rña mbecy yu miꞌ nu ri urloy.
Pcach ya̱ gal nu rcach tub chigyiñ mdoo ni ma nañ loweꞌ ma,
9 gun orzeꞌ de mbecy a̱ꞌ nap wazac dey ya̱.
Orzeꞌ washet yaay ya̱.
10 De yu zeꞌ sac gyel rashni lagy nañ lardooy,
nunu leꞌ rnii dey.
11 Bri loꞌ la dey ya̱.
Na sacaꞌ nez nu deda̱.
Ca laa lo dey ben la or gad mod nu neꞌy ya̱ lo yu.
12 Na dey gal nu na biidz dañ nu mbish rsiiñ ma,
gun rlal ma shet yaa ma ya̱.
13 A̱ Ñgyoozh bicy lal.
Lo nu lo la gua lo dey.
Orzeꞌ gyicy ru gan yu.
Bloo mbañ ya̱ yaa de mbecy a̱ꞌ nap
nu nac nu dzi fert ru.
14 Ñgyoozh, bicy nu gla̱ lo dey nu nac fers nir.
¡Bloo de mbecy zeꞌ gyishlombecy ii,
de mbecy nu rzu bich nu nac gyishlombecy ziꞌl!
Goow ru dey gal gac laa nañ yu.
Goow ru iꞌñ dey gal tush cya lañ niy.
Nunu gyicy ru gal rusub lañ par nu gow de yag yu.
15 Zeꞌ ya̱ zaca̱ ru lo nu loo la,
gun ya̱ sac falt ne̱.
¡Ya̱ cheti ri añ ne̱ ornu zaca̱ ru ornu risha̱ yaa!