Dela de coz nap druuñ lo Ñgyoozh: tub riidz ni Dabi
16
A̱ Ñgyoozh, mña ya̱,gun lo ru ricy cupa̱ consuel nu se la la zaca̱.
2 Ya̱ mne̱e̱ lo Ñgyoozh: “Ru nac ru Shuaan de̱.
Ti cueꞌ ru, ya̱ sac ni tub la coz nap ne̱”, rugya̱m.
3 Zeꞌ de mbecy ni Ñgyoozh nu yuꞌ Israeel, tonaꞌ la lily na dey,
nunu tonaꞌ la racyit lagya̱ nu nac dey.
4 Zeꞌ de yu nu rzu bich nu nac reñaꞌ ñgyoozh, orzeꞌ zañ zir coz deet rzac dey.
¡Ya̱ rila wac du̱ dey ornu rbic dey gun nu rshuy reñ bañcyug lo ñgyoozh niy!
¡Ni warib nu la ñgyoozh ni dey ru̱ꞌ!
5 Ñgyoozh, tub zi la ru rbic ru dela coz nu rcyiiñ ne̱.
Nunu ru nac ru gyaꞌn nu rdugyi̱,
nunu ru ricy cup yaar de coz nu zaca̱ par lo.
6 Tonaꞌ la coz cyit bdugyi̱.
Nunu tonaꞌ la cyit na coz nu bzeeñ ru ya̱a̱.
7 Gyabica̱ gyel mbecy ni Ñgyoozh,
gun mi zeꞌ rbic mi consef ne̱,
nunu de coz nu yuꞌ nañ lardo̱o̱ rlyuuñ ne̱ rel.
8 Ya̱ dub laa tiem ca ica̱ Ñgyoozh.
Orzeꞌ se la la zaca̱,
gun mi zeꞌ nac num ya̱.
9 Ndeꞌ nu ya̱ zu cyit lagya̱ nañ lardo̱o̱.
Nunu rila a̱ꞌ zu̱ lo rishdzidz.
10 Gun wazeen ru ya̱ zeꞌ nu yuꞌ mbecy gut.
Wazaan ru ya̱ lat de mbecy gut,
gun ya̱ naca̱ mbecy nir.
11 Ru lyuur ne̱ lac mod gyicya̱ par nu cui mbaña̱.
Ornu zu̱ lor, orzeꞌ racyit lagy gyela̱.
Nunu tonaꞌ la yet lagya̱,
gun ru nac nur ya̱.