Coz nu rlagy Ñgyoozh nu gyicy mbecy: tub riidz ni Dabi
15
Ñgyoozh,
¿cyu gac chuꞌ nañ yuꞌ nu driib zily mbecy ru?
¿Cyu gac gzu bicy Sión,
bicy nu bzu chur nu gac nir?
2 Yu zeꞌ mbecy nu gush nez nu sac falt ni.
Nunu ricy yu coz nu seꞌñ.
Nunu rniiy coz nu rishli nu dutuub la lardooy.
3 Yu zeꞌ wacsat ziy losaꞌy.
Rila wagyicy yu coz a̱ꞌ nap nu losaꞌy.
Ni wacsuub ruꞌy yu.
4 Yu zeꞌ wayet lagy yu de mbecy nu wagüii nap Ñgyoozh lo,
tees rca lagy yu lo mbecy nu rdzib lagy lom.
Yu zeꞌ dub laa tiem ricy paay dub gal nu rniiy
mas la ziꞌl be nu shuub ñi niy.
5 Yu zeꞌ benu cuic yu tiñ co mbecy,
waniiy nu zub iꞌñ ñi niy.
Ni wagash yu tiñ par nu niiy nu yuꞌ falt ni mbecy mas sac falt niy.
Yu nu ricy de coz zeꞌ,
rila wayagash yu.