Dabi rnii nuy Ñgyoozh nu locyuub mi yu
12
Ñgyoozh,
bloo mbañ de̱ ya̱,
gun sacaꞌ mbecy nu nap ricy.
Sacaꞌ mbecy nu ricy paa.
2 Dela mbecy rguu tub rguu tub ziꞌl dey losaꞌy.
Riidz cyudz nu rnii dey driib zily ñi mbecy,
tees nañ lardooy rguuy.
3 Ñgyoozh,
psoow ruꞌ de yu nu dzi dziñ rnii.
Psoow ruꞌ de yu driib zily ub,
4 de yu nu rnii:
“Nu nac riidz nu driib ruꞌn gyicy na gan.
Gac niin la ziꞌl coz nu rlagy na,
gun ni tub la mbecy a̱ꞌ nac yu shuaan na”,
na dey.
5 Orzeꞌ na nii coz nu rnii Ñgyoozh:
“Mbecy a̱ꞌ nap rshet zi dey de mbecy shni nu de mbecy gyidz.
Orzeꞌ ndeꞌ nu ya̱ lueg la locyuuba̱ dey gal mod nu rlagy yu”,
nam.
6 Gac gyicy cup na consuel lo de riidz nu rnii Ñgyoozh.
Riidz zeꞌ nañ gal nu na plat nu gua nañ yo mas gashtal gagy tir nu gyafin ñi.
7 Ru,
Ñgyoozh,
rñar de̱ ya̱.
¡Dub laa tiem wazaan ru nu shiñ gyicy nu mbecy de̱!
8 De mbecy a̱ꞌ nap yuꞌy dub yub la lo de̱.
Nunu dutuub la gyishlombecy driib zily mbecy coz a̱ꞌ nap.