Dabi rgyiiñ yu gyel fushtiz lo Ñgyoozh
10
Ñgyoozh, ¿lagu dzi zet zur?¿Lagu rcach lor lat nu rac deet?
2 De mbecy a̱ꞌ nap leꞌ ricy dey,
nunu raloc la dey nu zaab yu ich de mbecy zi.
Bicy nu gyet lag dey laab nañ caa nu ub yu rzuy.
3 Gun de mbecy a̱ꞌ nap ricy leꞌy nu nac de coz a̱ꞌ nap nu rlagy dey gyicy yu.
Mbecy ye rzac rnii ziy ni Ñgyoozh nunu rzat naañ yum.
4 Mbecy a̱ꞌ nap zeꞌ gya la rzuub loy.
Orzeꞌ rniiy: “Sac Ñgyoozh.
Sac cyu lo zeed cuena̱ de coz nu ricya̱”, rniiy.
Se ndeꞌ ziꞌl coz nu rnii tooy nu nac Ñgyoozh.
5 De yu zeꞌ dub laa tiem ricy dey gan de coz nu ricy yu.
A̱ꞌ nii la too dey ti ru gri beer niy.
De yu zeꞌ rgyich la ruꞌ dey nu rgubdzaay losaꞌ yuuy.
6 De yu zeꞌ rnii tooy: “Rila wanit lo den.
Nunu se cyu la gyicy nu zac deet den”, rnii dey.
7 Du ub riidz a̱ꞌ nap la driib ruꞌ dey.
Rzaa lagy dey ni losaꞌy.
Rnii dey riidz rguu.
Nunu rniiy nu dzi shet ziy losaꞌy.
Dza la ruꞌy yuꞌ riidz dañ nu gyicy nu gatow.
8 De yu zeꞌ rcach lo dey lat gyedz miꞌ
nu rsiiñ yu ni de mbecy nu sac falt ni nu cut yuy.
Se nu ca ziꞌl lo dey
nu rsiiñ yu ni de mbecy nu sac falt ni.
9 Ngach rsiiñ dey gal nu ricy tub biidz nu rsiiñ ma ni bañcyug nu gow ma.
Rsiiñ dey ni de mbecy shni,
gun ornu gyet lag yu nañ caa ni dey,
orzeꞌ cha nu tuñ la dey yu.
10 Orzeꞌ de mbecy shni drong la dey, nunu yabe dey.
Orzeꞌ yes saa dey lo de mbecy a̱ꞌ nap zeꞌ.
11 De mbecy a̱ꞌ nap zeꞌ rnii too dey nu Ñgyoozh rnit lagy mi de coz nu ricy dey.
Rnii too dey nu psoow mi lom.
Orzeꞌ rila wazac mi coz nu ricy dey, rziiy.
12 A̱ Ñgyoozh, bicy lal briic cashtig ni dey.
Cueꞌ nit lagy ru de mbecy nu rzac zi.
13 ¿Lagu rzu chu de mbecy a̱ꞌ nap zeꞌ Ñgyoozh?
Orzeꞌ rnii dey nañ lardooy:
“Walagy ñi zeed cuen na coz nu ricy na lo Ñgyoozh”, rnii dey.
14 Tees rishli ru la rzac ru nu deet ricy yu
nunu ricy dey nu rzac zi de mbecy.
Orzeꞌ ru cuic ru cashtig nu yad ñi nu gad ni dey.
Tees lo ru ryiid de mbecy shni.
Ru nac ru biñ nu rlocyuub de yu nguzh zi.
15 Bloo gyidz de mbecy a̱ꞌ nap, gal nu de mbecy nu shiñ ricy.
Bicy nu zeed cuen dey dela de coz nu bicy yu
gashtal cueꞌ gaꞌ la gyiyeeñ nat ni tub lañ.
16 Ñgyoozh riib ic mi par tub la.
Orzeꞌ de yu nu a̱ꞌ yuꞌ lo ru, de yu zeꞌ nit dey lo yu nir.
17 A̱ Ñgyoozh ru rzuub gyidag ru
ornu mbecy shni rnii nu dey ru.
Orzeꞌ ru rbic ru fers ni dey, nunu ricy cuen ru dey.
18 Ru ricy ru gyel fushtiz nu de yu nguzh zi, gal nu de mbecy nu rzac zi,
gun orzeꞌ ni tub la mbecy nu yuꞌ gyishlombecy cueꞌ gaꞌ chiib dey losaꞌy par lo.