Dabi ryabic yu gyel mbecy ni Ñgyoozh nu nac nu blocyuub mi yu ornu guꞌ deet yu nu losaꞌ yuuy
9
A̱ Ñgyoozh, ya̱ rica̱ gras nir nu dutuub la lardo̱o̱,nunu zata̱ de coz cyit na nu ricy ru.
2 A̱ Ñgyoozh ru nac ru biñ nu gya zir zu.
Ya̱ tonaꞌ la racyit lagya̱ nu nac ru.
Ya̱ dula̱ de riidz nu gyabica̱ gyel mbecy nir.
3 De losaꞌ yu̱u̱ gyaꞌ ich dey lor.
Orzeꞌ gyes saa dey.
Gat yu.
4 Gun ru nu seꞌñ dri beer.
Ru gusub ru seꞌr nu gyicy ru gyel fushtiz nir par ya̱.
5 ¡Ru mniir nu yuꞌ falt ni de mbecy nu a̱ꞌ yuꞌ lo ru,
nunu mnit lor de mbecy a̱ꞌ nap!
¡Bicy ru nu rila wagyezaꞌ lagy mbecy dey!
6 De losaꞌ yuu den bi gut yu.
Nunu niꞌ ziꞌl mnit lor gyedz nu pcyiiñ dey.
Ni wagyezaꞌ gaꞌ la lagy mbecy nu guꞌ dey.
7 Tees Ñgyoozh nac mi rey par tub la.
Mi zeꞌ bzum seꞌm nu gri beem.
8 Orzeꞌ mi zeꞌ gri beem ni dela mbecy nu yuꞌ gyishlombecy nu mod nu seꞌñ.
Nu mod nu seꞌñ gri beem de lo la nez mbecy nu yuꞌ gyishlombecy.
9 Ñgyoozh nam gal nu na tub yuꞌ fert nu laa lagy mbecy ornu shiñ ricy nu losaꞌy yu.
Rñam dey tiem nu rac deet.
10 Ñgyoozh, de yu nu yuꞌ lo ru ricy cup dey consuel lor,
gun ru waglaa yaar de yu nu ryub ru.
11 Biily der lo Ñgyoozh, biñ nu rcyiiñ Sión [Sión, ndeꞌ yaruuñ gyedz Jerusaleeng, o bicy nu zub yuꞌ yon ni Ñgyoozh lat gyedz Jerusaleeng.], gyedz nim.
Bzat de coz nap nu bicy mi lat de mbecy.
12 Gun Ñgyoozh yezaꞌ lagy mi de mbecy nu rzac zi,
nunu wanit lagy mi de riidz shni nu rnii dey.
Orzeꞌ rbic mi cashtig ni de yu nu rshet zi dey.
13 Ñgyoozh, gushni ñuu lagy ya̱.
Bduꞌ cuen ñuu lac mod rshet zi de mbecy nu rzi lagy lo̱ ya̱.
Ñgyoozh, ¡bloo ya̱ yaa gyel gut!
14 Orzeꞌ ya̱ gzu̱ roꞌ ni gyedz Sión.
Orzeꞌ ne̱e̱ lo dela mbecy nu ru yad ñi nir nu gyed gyel mbecy nir.
Nunu ya̱ zu cyit lagya̱, gun ru bloo mbañ ru ya̱.
15 De mbecy nu a̱ꞌ yuꞌ lo Ñgyoozh, laab ub dey gyet lag yu nañ gyeegy nu rguuñ yu.
De yu zeꞌ yet lag dey nañ caa nu rzu laab ub yu.
16 Ñgyoozh bicy mi nu gud lagy mbecy cyu nac mi,
nu nac nu byub ic mi mbecy mod nu seꞌñ.
Zeꞌ de mbecy a̱ꞌ nap bet lag dey laab nañ caa nu bzu ub yu.
17 De mbecy a̱ꞌ nap, de yu nu waca lagy lo Ñgyoozh, de yu nu nit lagy mi.
Dela de yu zeꞌ chay zeꞌ nu yuꞌ mbecy gut.
18 Gun Ñgyoozh waded la gyezaꞌ lagy mi de mbecy zi,
nunu cyid tiem nu gyicy mi dub gal mod nu rgyish lo dey.
19 Ñgyoozh, bicy lal cueꞌ zaan ru nu ded lo mbecy lor.
¡Bredz de mbecy nu a̱ꞌ yuꞌ lo ru!
¡Orzeꞌ gri beer ni dey!
20 Ñgyoozh, bicy nu gash bis dey.
¡Bicy nu gad lagy dey nu tub lo ziꞌl nu nac yu mbecy gat!