Dabi ryabic yu gyel mbecy ni Ñgyoozh nu nac nu ca ic mi de mbecy
8
A̱ Ñgyoozh, Shuaan de̱, dutuub la gyishlombecy rabee nu ru zily nac ru.De mbecy zaab tiꞌ dey nu ryabic yu gyel mbecy nir gashtal gyibaa.
2 De yu nguzh nu de mdoo ryabic dey gyel mbecy nir.
Ru rcyiiñ ru lugaar nu se la la gac gyicy losaꞌ yuur.
Gun orzeꞌ gyicy ru nu checa de losaꞌ yuur gal nu de yu nu rbish cya ich ru.
3 Ornu ya̱ rgüi̱i̱ baa zeꞌ nu psaꞌ lagy ru,
ornu rgüi̱i̱ beey nu de bel baa nu ptaꞌr,
4 orzeꞌ rsaꞌ lagya̱: ¿Cyu guc mbecy par nu caa ic ruy?
¿Cyu guc de yu nu briich mbecy par nu güiir yu?
5 Ru bicy ru nu sñuu ga ziꞌl ñgyac dey gal nu na ru.
Ru bicy zily ru dey gal na tub rey lily nu zily nac.
6 Ru bicy ru nu gyub ic yu de coz nu psaꞌ lagy ru,
nunu bguꞌr dela coz yaay.
7 Bguꞌr de shily yaa dey, de tor,
de bañ gyish nu yuꞌ ngush,
8 nu de chigyiñ nu zaab lo bi,
gal nu de bel nu dela deꞌ zir bañcyug nu yuꞌ lo nisyudoo.
9 A̱ Ñgyoozh, Shuaan de̱, dutuub la gyishlombecy rabee nu ru zily nac ru.
De mbecy zaab tiꞌ dey nu ryabic yu gyel mbecy nir gashtal gyibaa.