Coz nu mnii Dabi ornu rlagy yu gyel fushtiz
7
A̱ Ñgyoozh,
lo ru yapa̱ nu laa lagya̱.
Blocyuub ya̱ nunu bloo mbañ ya̱
nu nac de mbecy nu zaab icha̱
2 nis gayu dey ya̱ gal nu ricy tub biidz.
Cha nu dey ya̱ tub lugaar zeꞌ nu wac co mbañ mbecy ya̱.
Orzeꞌ zeꞌ sug dey ya̱.
3 A̱ Ñgyoozh,
benu ni bicya̱ nu ca na mbecy,
benu la zi coz a̱ꞌ nap bicy du̱ tub mbecy,
4 benu ya̱ bish cya̱ ich mbecy nu nap yuꞌ du̱,
benu ya̱ pshet zi̱ tub mbecy nu sac falt ni,
mas nac yu losaꞌ yu̱u̱,
5 benu ni bicya̱,
orzeꞌ bzaan nu zab losaꞌ yu̱u̱ icha̱,
nunu cub dey ya̱.
Orzeꞌ guchuꞌ dey ya̱ lo yu.
Orzeꞌ nu co dey bi zu̱.
Zeeñ yu ya̱ lat yu.
6 A̱ Ñgyoozh,
bicy lal.
Pchaꞌ ic ni de losaꞌ yu̱u̱.
Gua contr ni de coz dañ nu ricy yu nuy ya̱.
Ru,
biñ nu mnii nu gac coz nu seꞌñ,
gua faboor ne̱.
7 Orzeꞌ lo ru bicy tublaazh de lo la mbecy nu yuꞌ gyishlombecy.
Orzeꞌ bzub seꞌr nu zu gal gya.
Byub ic dey.
8 Ñgyoozh,
ru ri beer ni dela mbecy.
Orzeꞌ bloo caacy ya̱ nu nac coz seꞌñ nu ricya̱,
nunu mnii nu gruu caacya̱,
gun ya̱ sac falt ne̱.
9 Ñgyoozh,
biñ nu ricy gyel fushtiz ni,
ru se mbi la rgüiir la na de coz nu yuꞌ nañ shcab ni mbecy
nunu la na coz nu yuꞌ nañ lardooy.
Bicy nu checa de mbecy a̱ꞌ nap nu shiñ ricy.
Zeꞌ mbecy nap,
bicy nu a̱ꞌ rishdzidz cyiiñ dey.
10 Ñgyoozh nac mi biñ nu rña ya̱,
nunu mi zeꞌ rboo mbañ mi de mbecy nu nap na lardoo.
11 Ñgyoozh nac mi tub biñ nu ri bee mod nu seꞌñ.
Orzeꞌ niim nu yuꞌ falt ni mbecy a̱ꞌ nap dub laa tiem.
12 Benu de mbecy a̱ꞌ nap wayeca dey nu ricy yu coz cyi,
orzeꞌ Ñgyoozh bi bzu lily mi nu cuic mi cashtig ni dey.
Ricy mi gal nu ricy mbecy nu bi gub mandzicy ni,
o tub yu nu bi rgayu duu lyaar ni guaz.
13 Bi rsaap yu nu guaz niy.
Bi ca gyi lo gyech niñ,
nunu bi zu lily yu nu dela suu dañ yu nu cut yu mbecy.
Ni ricy mi.
14 Güii lac rboo ic mbecy a̱ꞌ nap coz a̱ꞌ nap.
Nay gal na ñaa de coz a̱ꞌ nap.
Lo yu zeꞌ ral gyel gurfeñ.
Lo yu zeꞌ druu zac riidz rguu.
15 De coz nu rboo ic yu nañ gal na caa nu rzuy ni reñaꞌ mbecy.
Orzeꞌ laab yu gyet lag yu nañ caa zeꞌ niy.
16 Orzeꞌ de gyel gurfeñ niy,
laab ndeꞌ cush cyañ tooy.
Nunu zac ziy nu nac nu rshet ziy losaꞌy.
17 Orzeꞌ ya̱ rica̱ gras ni Ñgyoozh nu nac gyel fushtiz nim.
Nunu dula̱ lom nu gyabica̱ gyel mbecy ni ub mi,
biñ nu gya zir zu.