Mbecy rnii nu Ñgyoozh nu cueꞌ zaan mi nu zac deet yu: tub riidz ni Dabi
5
A̱ Ñgyoozh bzuub gyidag de riidz nu rne̱e̱ lor,
nunu bicy cuen ñuu de riidz shni nu rne̱e̱.
2 Ñgyoozh,
biñ nu nac rey ne̱,
ornu ya̱ dredza̱ ru nu locyuub ru ya̱,
orzeꞌ bduꞌ cuen de coz nu rne̱e̱,
gun ru ziꞌl rne̱e̱ du̱.
3 A̱ Ñgyoozh,
or napor gyeñ ru nu rne̱e̱ du̱ ru.
Napor la rne̱e̱ de coz nu rlagya̱.
Orzeꞌ leza̱ ben lac niir.
4 Gun ru a̱ꞌ nac ru Ñgyoozh nu yet lagy coz a̱ꞌ nap.
Nunu de mbecy a̱ꞌ nap wac cyiiñ nuy ru tublaazh.
5 Lo ru sac lugaar nu cyiiñ mbecy leꞌ.
Ru rzi lagy ru lo dela de mbecy nu shiñ ricy.
6 Ru rnit lor de mbecy nu rnii riidz rguu,
nunu riñ lagy ru de mbecy nu rshu reñ,
gal nu de mbecy nu rzu caa ni losaꞌ.
7 Tees nu nac nu ru dzi rcar ya̱,
orzeꞌ ya̱ gac yapa̱ roꞌ ni yuꞌ nu driib zily mbecy ru.
Ya̱ riib zilya̱ ru roꞌ yon nir lat nu rdzib lagya̱ lor.
8 Ñgyoozh,
nu nac de losaꞌ yu̱u̱ blocyuub ya̱
nu gyicya̱ de coz nu seꞌñ gal nu rlagy ru.
Blocyuub ya̱ nu a̱ꞌ biigy gyicya̱ de coz nu rlagy ru.
9 Gun de losaꞌ yu̱u̱,
wactiib la riidz nu gyicy cup na consuel lo ruꞌ dey.
Nu nit lo ziꞌl dey losaꞌy rlagy yu.
Ruꞌ dey nañ gal na tub gyerbaa,
gun mas dzi cyudz za riidz nu rnii dey,
tees gyicy ñi nu gadza mbecy.
Orzeꞌ gat yu sin Ñgyoozh la.
10 Orzeꞌ Ñgyoozh,
mnii nu de yu zeꞌ chay lo cashtig.
Bicy nu de coz nu rboo ic dey gyicy ñi nu nit loy.
Bloo chu dey lor nu nac nu zañ cyi bicy yu,
nunu nu nac nu za dey contr nir.
11 De mbecy nu ryiid lor nu rlaa lagy dey,
de yu zeꞌ zu cyit lagy yu.
Dub laa tiem rul dey nu zu cyit lagy yu.
Mña dey.
De yu nu rca ru,
de yu zeꞌ racyit lagy dey nu nac ru.
12 Gun ru,
Ñgyoozh,
nap ricy nur de mbecy nu ricy coz nu seꞌñ.
Gun nu nac nu rcar dey,
orzeꞌ wazaan ru nu zac yu ni tub la coz.
Ricy ru nur dey gal nu ricy tub gyiib she nu rsoow cuerp ni soldad.