Naca bea Beꞌ chee̱ Dios
4
Leꞌe,
bi nazríꞌite̱ lazraꞌ,
quebe chéajle̱le chee̱ xúgute̱ benneꞌ dxelenné̱ꞌ zúale̱ Beꞌ chee̱ Dios le̱ꞌ.
Le nnaꞌ xque ca naca da dxulusé̱dene̱ꞌ chee̱ nézele che zúale̱ꞌ Beꞌ chee̱ Dios le̱ꞌ.
Caní dxal-laꞌ gunle laweꞌ da ba beleláꞌ benneꞌ zante̱,
benneꞌ we̱n lazreꞌ,
dxelenné̱ꞌ dxuluchálaje̱ꞌ waláz chee̱ Dios.
2 Caní gaca nézele che zúale̱ Beꞌ chee̱ Dios tu benneꞌ.
Xúgute̱ benneꞌ dxelexeche̱be̱ꞌ ba blaꞌ Jesucristo,
ne guque̱ꞌ bénneache,
benneꞌ caní zaj naque̱ꞌ chee̱ Dios.
3 Xúgute̱ benneꞌ quebe dxelexeche̱be̱ꞌ ca guca Jesucristo quebe zaj naque̱ꞌ chee̱ Dios.
Zaj naque̱ꞌ chee̱ bénneaꞌ dxedábague̱ꞌ Jesucristo.
Ba bénele guléꞌe lawe̱ꞌ bénneaꞌ,
naꞌ naꞌa ba zue̱ꞌ lu xe̱zr la xu nigá.
4 Leꞌe,
bi nazriꞌite̱ lazraꞌ,
nácale chee̱ Dios,
ne bache bzúale chaláꞌala benneꞌ caꞌ dxelezí xe̱ꞌe̱ laweꞌ da szrendxa naca Beꞌ zúale̱ na leꞌe ca beꞌ zua na lu xe̱zr la xu nigá.
5 Benneꞌ caꞌ zaj naque̱ꞌ chee̱ xe̱zr la xu nigá.
Chee̱ le̱ naꞌ dxuluchálaje̱ꞌ chee̱ da naca na chee̱ xe̱zr la xu nigá,
naꞌ benneꞌ zaj zre̱ꞌe̱ xe̱zr la xu nigá dxelenne̱ꞌ da dxuluchalaj benneꞌ caꞌ.
6 Dxiꞌu nácadxu chee̱ Dios.
Benneꞌ zaj núnbeꞌe̱ Dios dxuluzé̱ nague̱ꞌ chee̱dxu.
Benneꞌ quebe zaj naque̱ꞌ chee̱ Dios quebe dxuluzé̱ nague̱ꞌ chee̱dxu.
Chee̱ le̱ naꞌ nezdxu nu benneꞌ zúale̱ Beꞌ chee̱ xel-laꞌ li le̱ꞌ,
ne nu benneꞌ zúale̱ beꞌ chee̱ da dxezí xe̱ na le̱ꞌ.
Tu dxúnzqueze Dios da naca chee̱ xel-la nazríꞌi lazreꞌ
7 Leꞌe,
bi nazríꞌite̱ lazraꞌ,
dxal-laꞌ zriꞌidxu tudxu xetudxu laweꞌ da dxunna Dios dxiꞌu xel-laꞌ nazríꞌi lazreꞌ naꞌ.
Xúgute̱ benneꞌ zaj naque̱ꞌ zriꞌi lazreꞌ caní zaj naque̱ꞌ zriꞌine Dios ne zaj núnbeꞌe̱ Dios.
8 Bénneaꞌ quebe naque̱ꞌ zriꞌi lazreꞌ caní quebe núnbeꞌe̱ Dios laweꞌ da tu dxúnzqueze Dios da naca chee̱ xel-la nazríꞌi lázreꞌ.
9 Naca béaqueze Dios nazríꞌile̱ꞌe̱ne̱ꞌ dxiꞌu laweꞌ da gusel-le̱ꞌ Zríꞌine̱ꞌ tu lichaꞌ lu xe̱zr la xu nigá chee̱ zruéꞌedxu xel-laꞌ nabán da naca na chee̱ Zríꞌine̱ꞌ naꞌ.
10 Xel-laꞌ zriꞌi lazreꞌ li naca na caní:
Quegá dxiꞌu naꞌ bzriꞌidxu Dios.
Le̱ꞌ bzriꞌine̱ꞌ dxiꞌu,
ne gusel-le̱ꞌ Zríꞌine̱ꞌ chee̱ guque̱ꞌ da gudúa na da nabágadxu lau Dios laweꞌ da nabágadxu dul-la.
11 Leꞌe,
bi nazríꞌite̱ lazraꞌ,
che Dios bzriꞌine̱ꞌ dxiꞌu caní,
dxiꞌu dxal-laꞌ zriꞌidxu tudxu xetudxu.
12 Quebe nu ne leꞌe Dios,
san che zriꞌidxu tudxu xetudxu,
Dios zúaqueze̱ꞌ lu xichaj lázrdaudxu,
naꞌ xel-laꞌ zriꞌi lazreꞌ chee̱ꞌ dxun na li lazreꞌ xel-laꞌ zriꞌi lazreꞌ chee̱dxu.
13 Nezdxu nácadxu tuze nen Dios,
naꞌ Dios naque̱ꞌ tuze nen dxiꞌu laweꞌ da bzue̱ꞌ Beꞌ chee̱ꞌ lu lázrdaudxu.
14 Ba bléꞌentuꞌ,
ne dxuzentuꞌ leꞌe ca naca da be̱n Xradxu Dios,
gusel-le̱ꞌ Zríꞌine̱ꞌ chee̱ bedajselé̱ꞌ bénneache chee̱ xe̱zr la xu nigá.
15 Bénneaꞌ dxexeche̱be̱ꞌ naca Jesús Zriꞌine Dios,
Dios zúale̱queze̱ꞌ bénneaꞌ,
naꞌ le̱ꞌ zúale̱queze̱ꞌ Dios.
16 Ba núnbeadxu ca nazríꞌi Dios dxiꞌu,
ne ba guxéajle̱dxu nazriꞌine̱ꞌ dxiꞌu.
Tu dxúnzqueze Dios da naca chee̱ xel-la nazríꞌi lazreꞌ,
naꞌ bénneaꞌ naque̱ꞌ zriꞌi lazreꞌ caní zúale̱queze̱ꞌ Dios,
naꞌ Dios zúale̱queze̱ꞌ le̱ꞌ.
17 Caní dxaca li xel-laꞌ zriꞌi lazreꞌ chee̱dxu,
chee̱ sua zrize lázrdaudxu lu zra guzría xiꞌ Dios bénneache,
benneꞌ caꞌ dxelune̱ꞌ da cale̱la,
laweꞌ da nácadxu lu xe̱zr la xu nigá ca nácaqueze Jesucristo.
18 Bénneaꞌ naque̱ꞌ zriꞌi lazreꞌ caní quebe dxezrebe̱ꞌ da gaca na lu zra naꞌ.
Xel-laꞌ zriꞌi lazreꞌ li dxebéaj na chaláꞌala xel-laꞌ dxezrebe naꞌ.
Nu benneꞌ dxezrebeꞌ dxebeze̱ꞌ bi da saque̱ꞌ,
naꞌ bénneaꞌ dxezrebe̱ꞌ quebe dxaca li xel-laꞌ zriꞌi lazreꞌ chee̱ꞌ.
19 Dxiꞌu nazriꞌidxu Dios laweꞌ da bzriꞌi Dios dxiꞌu nédxudaute̱.
20 Che nu benneꞌ dxenné̱ꞌ:
Nazriꞌidaꞌ Dios,
ne che benneꞌ nigá dxuzúe̱ꞌ chaláꞌala le saꞌ ljwezre̱ꞌ,
dxun lazre̱ꞌ.
Che quebe nazriꞌine̱ꞌ le saꞌ ljwezre̱ꞌ,
bi dxeléꞌete̱ne̱ꞌ,
¿ájazra gune̱ꞌ,
zríꞌine̱ꞌ Dios,
ne quebe dxeléꞌene̱ꞌ Le̱ꞌ?
21 Dios ba bdxixruj beꞌene̱ꞌ dxiꞌu caní,
gunné̱ꞌ:
Bénneaꞌ nazriꞌine̱ꞌ Dios,
zríꞌiquezne̱ꞌ le saꞌ ljwezre̱ꞌ.