3
Le nnaꞌ xque ca nazríꞌile̱ꞌe̱ Dios dxiꞌu laweꞌ da nazí ladxu bi chee̱ Dios,
ne caní nácadxu.
Chee̱ le̱ naꞌ quebe zaj neze bénneache lu xe̱zr la xu nigá da nácadxu laweꞌ da quebe belúnbeꞌe̱ Jesús.
2 Leꞌe,
bi nazríꞌite̱ lazraꞌ,
naꞌa nácadxu bi chee̱ Dios.
Quebe ne guléꞌe laweꞌ da gácadxu.
Nezdxu gate xeláꞌ Le̱ꞌ,
gácadxu ca naca Le̱ꞌ laweꞌ da léꞌedxu Le̱ꞌ ca nácaqueze Le̱ꞌ.
3 Nu benneꞌ dxebeza lazre̱ꞌ gaque̱ꞌ ca naca Jesús dxue lazre̱ꞌ gaque̱ꞌ du lazreꞌ ca naca Jesús,
naque̱ꞌ du lazreꞌ.
4 Nu benneꞌ dxune̱ꞌ dul-la quebe dxuzúe̱ꞌ dizraꞌ ca naca da bdxixruj beꞌe Dios laweꞌ da naca dul-la da dxedábaga da bdxixruj beꞌe Dios.
5 Ba nézele blaꞌ Jesucristo chee̱ gudúe̱ꞌ dul-la nabágadxu,
ne Le̱ꞌ quebe bi dul-la be̱ne̱ꞌ.
6 Xúgute̱ benneꞌ zaj zúatequeze̱ꞌ tuze nen Jesús quebe dxelune̱ꞌ dul-la,
naꞌ xúgute̱ benneꞌ dxelune̱ꞌ dul-la quebe ne xeleléꞌene̱ꞌ Cristo,
ne quebe ne xelúnbeꞌe̱ Le̱ꞌ.
7 Leꞌe,
zríꞌinaꞌdauꞌ,
quebe güele lataj nu si xe̱ leꞌe.
Bénneaꞌ dxune̱ꞌ da xlátaje̱,
xlátaje̱ naque̱ꞌ,
ca naca Dios,
naque̱ꞌ xlátaje̱.
8 Benneꞌ dxune̱ꞌ dul-la naque̱ꞌ chee̱ da xriwe̱ꞌ laweꞌ da dxun da xriwe̱ꞌ dul-la nédxudaute̱.
Chee̱ le̱ naꞌ blaꞌ Zriꞌine Dios,
chee̱ bzria xiꞌe̱ xúgute̱ da nun da xriwe̱ꞌ lu xe̱zr la xu nigá.
9 Xúgute̱ benneꞌ zaj naca bi chee̱ Dios quebe dxelune̱ꞌ dul-la laweꞌ da zúale̱tequeze Beꞌ chee̱ Dios benneꞌ caꞌ.
Chee̱ le̱ naꞌ québedxa gaca xelezúe̱ꞌ xelune̱ꞌ dul-la laweꞌ da zaj naque̱ꞌ bi chee̱ Dios.
10 Naca bea nu naca bi chee̱ Dios ne nu naca bi chee̱ da xriwe̱ꞌ.
Bénneaꞌ quebe dxune̱ꞌ da xrlátaje ne quebe nazriꞌine̱ꞌ le saꞌ ljwezre̱ꞌ quebe naque̱ꞌ bi chee̱ Dios.
Dxal-laꞌ zriꞌidxu tu xetudxu
11 Da nigá naca na dizraꞌ da ba bénequezle nédxudaute̱,
da dxenná na:
Dxal-laꞌ zriꞌidxu tudxu xetudxu.
12 Quebe gundxu ca be̱n Caín,
bi naꞌ gúcabeꞌ chee̱ da xriwe̱ꞌ,
naꞌ bé̱tebeꞌ bi bíchebeꞌ.
¿Bizr chee̱ naꞌ bé̱tebeꞌ le̱beꞌ?
Bé̱tebeꞌ le̱beꞌ laweꞌ da naca da zrinnaj da be̱n Caín,
naꞌ da be̱n bi bíchebeꞌ naca na da xrlátaje.
13 Leꞌe,
benneꞌ bíchaꞌdauꞌ,
quebe xebánele che bénneache lu xe̱zr la xu nigá dxuluzúe̱ꞌ leꞌe chaláꞌala.
14 Nezdxu ba bdxúajdxu lu naꞌ xel-laꞌ gute,
ne ba guxúꞌudxu lu xel-laꞌ nabán laweꞌ da nazriꞌidxu bíchedxu caꞌ.
Bénneaꞌ quebe nazriꞌine̱ꞌ bíchedxu caꞌ zúaqueze̱ꞌ lu xel-laꞌ gute.
15 Bénneaꞌ dxuzúe̱ꞌ chaláꞌala bíchedxu caꞌ naque̱ꞌ ca tu benneꞌ dxute benneꞌ,
naꞌ ba nézquezle leꞌe nu benneꞌ dxute benneꞌ quebe nape̱ꞌ xel-laꞌ nabán zeajlí canna.
16 Ba nezdxu da naca xel-laꞌ zriꞌi lazreꞌ laweꞌ da bzanne Jesucristo xel-laꞌ nabán chee̱ꞌ,
naꞌ gutie̱ꞌ waláz chee̱dxu.
Cáꞌanqueze dxiꞌu dxal-laꞌ guzúadxu xel-laꞌ nabán chee̱dxu chee̱ gácale̱dxu bíchedxu caꞌ.
17 Che tu benneꞌ nape̱ꞌ xel-laꞌ gunníꞌa da naca na chee̱ xe̱zr la xu nigá,
ne che dxeléꞌene̱ꞌ le saꞌ ljwezre̱ꞌ dxexázrjene̱ꞌ,
naꞌ che quebe xexache lazre̱ꞌ le̱ꞌ,
benneꞌ nigá quebe nazriꞌine̱ꞌ Dios.
18 Leꞌe,
zríꞌinaꞌdauꞌ,
dxal-laꞌ zriꞌidxu tudxu xetudxu,
quegá nen dízraꞌze,
ne quegá nen da nné̱zedxu.
Dxal-laꞌ gúntequezdxu na,
naꞌ gaca bea na da li nazríꞌidxu bíchedxu caꞌ.
Zua zri lázrdaudxu lau Dios
19 Che gundxu caní ba nezdxu nácadxu chee̱ da li,
naꞌ sua zri lázrdaudxu lau Dios,
20 gate zua tu da dxagu na zria lu lázrdaudxu,
laweꞌ da nezdxu naca Dios zrendxa ca lázrdaudxu.
Le̱ꞌ nézquezne̱ꞌ ca naca da dxundxu.
21 Caꞌan naca,
bi nazríꞌite̱ lazraꞌ,
che quebe zua tu da dxagu na zria lu lázrdaudxu,
waca sua zrize lázrdaudxu lau Dios,
22 naꞌ Le̱ꞌ gunne̱ꞌ dxiꞌu xúgute̱ da nábadxu lawe̱ꞌ.
Caꞌan gaca laweꞌ da dxuzúadxu dizraꞌ da bdxixruj beꞌe Dios,
ne dxundxu da dxezaca ba lazreꞌ Le̱ꞌ.
23 Da bdxixruj beꞌene̱ꞌ dxiꞌu naca na chéajle̱dxu chee̱ Jesucristo,
Zriꞌine Dios,
ne zriꞌidxu tudxu xetudxu ca bdxixruj beꞌe Le̱ꞌ.
24 Bénneaꞌ dxuzúe̱ꞌ dizraꞌ da bdxixruj beꞌe Le̱ꞌ zúale̱queze̱ꞌ Dios,
naꞌ Dios zúale̱queze̱ꞌ bénneaꞌ.
Ba nezdxu Le̱ꞌ zúale̱queze̱ꞌ dxiꞌu laweꞌ da bache be̱nne̱ꞌ dxiꞌu Beꞌ chee̱ꞌ.