2
Leꞌe,
bi nazriꞌite̱ lazraꞌ,
dxuzúajaꞌ da nigá chee̱le chee̱ quebe gunle dul-la.
Che nu benneꞌ gune̱ꞌ dul-la,
zua wenaba chee̱dxu lau Dios,
Jesucristo,
Benneꞌ xlátaje̱.
2 Le̱ꞌ gutie̱ꞌ waláz chee̱dxu chee̱ gudúe̱ꞌ da nabágadxu lau Dios ca naca dul-la chee̱dxu,
ne quegaze da nabágadxu dxiꞌu,
san gudúe̱ꞌ da zaj nabaga xúgute̱ bénneache.
3 Che dxuzúadxu dizraꞌ ca naca da bdxixruj beꞌe Dios,
nezdxu ba núnbeadxu Le̱ꞌ.
4 Che nu dxenná:
Nedaꞌ núnbeꞌa Le̱ꞌ,
ne che quebe dxuzúe̱ꞌ dizraꞌ ca naca da bdxixruj beꞌe Dios,
benneꞌ nigá naque̱ꞌ we̱n lazreꞌ,
ne quebe dxenné̱ꞌ da li.
5 Che nu benneꞌ dxuzúe̱ꞌ dizraꞌ ca naca da bdxixruj beꞌe Dios,
benneꞌ nigá nazriꞌine̱ꞌ Dios du lazre̱ꞌ.
Che dxundxu caní nezdxu ba zúadxu tuze nen Le̱ꞌ.
6 Bénneaꞌ dxenné̱ꞌ naque̱ꞌ tuze nen Dios dxal-laꞌ gaque̱ꞌ ca guca Jesús.
Tu da cube da bdxixruj beꞌe Jesús
7 Leꞌe,
bi nazríꞌite̱ lazraꞌ,
dxuzúajaꞌ chee̱le ca naca da dxenná na dxal-laꞌ zriꞌidxu le saꞌ ljwézredxu.
Quebe naca na tu da cube da bdxixruj bea Dios.
Naca na da gula naꞌ da ba guzile nédxudaute̱.
Da gula da bdxixruj bea Dios naca na dizraꞌ da ba bénequezle.
8 Naca na ca dxuzúajaꞌ chee̱le tu da cube da dxixruj bea Dios,
da naca béaqueze na naca da li laweꞌ da be̱n Jesús ca naca na,
ne laweꞌ da dxunle leꞌe ca naca na.
Caní naca na laweꞌ da ba dxuseníꞌ xel-laꞌ naxaníꞌ li chee̱ xel-laꞌ zriꞌi lazreꞌ lu xichaj lázrdaudxu,
da dxegúa na da naca na chee̱ da chul-la.
9 Che nu benneꞌ dxenné̱ꞌ dxune̱ꞌ da naca na chee̱ xel-laꞌ naxaníꞌ,
ne che dxecuídene̱ꞌ le saꞌ ljwezre̱ꞌ,
benneꞌ nigá ne dxedé̱ꞌ lu da naca na chee̱ da chul-la.
10 Benneꞌ nazriꞌine̱ꞌ le saꞌ ljwezre̱ꞌ dxune̱ꞌ da naca chee̱ xel-laꞌ naxaníꞌ,
ne quebe dxune̱ꞌ da guzría xi na le saꞌ ljwezre̱ꞌ.
11 Bénneaꞌ quebe chaweꞌ dxeléꞌene̱ꞌ le saꞌ ljwezre̱ꞌ,
lu da naca na chee̱ da chul-la zua bénneaꞌ,
ne lu da naꞌ dxedé̱ꞌ,
ne quebe nézene̱ꞌ ga zéaje̱ꞌ laweꞌ da dxucáꞌana da chul-la le̱ꞌ ca tu benneꞌ la chul-la.
12 Leꞌe,
bi nazriꞌite̱ lazraꞌ,
dxuzúajaꞌ chee̱le laweꞌ da ba bnite lau Dios chee̱le ca naca dul-la chee̱le,
laweꞌ da gute Jesucristo waláz chee̱dxu.
13 Leꞌe,
benneꞌ nazriꞌite̱ lazraꞌ,
dxuzúajaꞌ chee̱le laweꞌ da ba núnbeale Bénneaꞌ zúaqueze̱ꞌ nédxudaute̱.
Leꞌe,
benneꞌ cuideꞌ,
dxuzúajaꞌ chee̱le laweꞌ da ba bsanle da dxenná da xriwe̱ꞌ.
Leꞌe,
bi nazriꞌite̱ lazraꞌ,
dxuzúajaꞌ chee̱le laweꞌ da ba núnbeale Xradxu Dios.
14 Leꞌe,
xruze xrnaꞌ,
dxuzúajaꞌ chee̱le laweꞌ da ba núnbeale Bénneaꞌ zúaqueze̱ꞌ nédxudaute̱.
Leꞌe,
benneꞌ cuideꞌ,
dxuzúajaꞌ chee̱le laweꞌ da nácale benneꞌ wal-la,
ne dizraꞌ chee̱ Dios nápale,
ne bsanle da dxenná da xriwe̱ꞌ.
15 Quebe sa lázrele da cale̱la caꞌ da zaj naca na chee̱ xe̱zr la xu nigá,
ne quegá da zaj de̱ lu xe̱zr la xu nigá.
Che nu benneꞌ dxezá lazre̱ꞌ da zaj de̱ lu xe̱zr la xu nigá,
quebe nazriꞌine̱ꞌ Xradxu Dios.
16 Da caní zaj naca na chee̱ xe̱zr la xu nigá,
da dxezá lázredxu da dxezaca ba lazreꞌ be̱laꞌ dxen chee̱dxu,
ne da dxezaca ba lazreꞌ xiaj laudxu,
ne ca naca xel-laꞌ dxucáꞌana szren cuina chee̱ da nápadxu.
Xúgute̱ da caní quebe zaj naca na da dxunna Dios,
san zaj naca na chee̱ xe̱zr la xu nigá.
17 Ba za zra xuzre lazreꞌ xe̱zr la xu nigá,
ne ca naca da dxezá lázredxu da naca na chee̱ xe̱zr la xu nigá.
Bénneaꞌ dxune̱ꞌ da dxaca lazreꞌ Dios wazúatecaze̱ꞌ.
Ca naca da li, ne da we̱n lazreꞌ
18 Leꞌe,
bi nazriꞌite̱ lazraꞌ,
zra caní zaj naca na zra bze̱be.
Ba bénele guléꞌe lawe̱ꞌ benneꞌ tábague̱ꞌ Cristo.
Nedaꞌ dxapaꞌ leꞌe naꞌa,
bache beleláꞌ benneꞌ zante̱ benneꞌ dxeledábague̱ꞌ Cristo.
Chee̱ le̱ naꞌ nezdxu ba zúadxu zra bze̱be.
19 Benneꞌ caní belexedxúajqueze̱ꞌ ládujla dxiꞌu.
Da líqueze quebe gulaque̱ꞌ tuze nen dxiꞌu.
La gulaque̱ꞌ tuze nen dxiꞌu,
naꞌ belexegáꞌanale̱queze̱ꞌ dxiꞌu.
Caní guca chee̱ nezdxu quebe zaj naca xúgute̱ꞌ tuze nen dxiꞌu.
20 Ca naca chee̱le leꞌe,
ba zúale̱ Beꞌ Láꞌazxa leꞌe,
Bénneaꞌ gusel-la Xradxu Láꞌazxa.
Chee̱ le̱ naꞌ ba nézele xúgute̱ da caní.
21 Dxuzúajaꞌ chee̱le da nigá laweꞌ da ba nézele da li,
ne quegá dxenniaꞌ quebe nézele da li.
Ba nézquezle leꞌe quebe dxun lazreꞌ Bénneaꞌ naque̱ꞌ da li.
22 ¿Nuzraꞌ naca benneꞌ we̱n lazreꞌ?
Naca bénneaꞌ dxenné̱ꞌ Jesús quebe naque̱ꞌ Cristo,
Benneꞌ nasel-la Dios.
Benneꞌ we̱n lazreꞌ nigá dxenné̱ꞌ Dios quebe naque̱ꞌ Xra Jesús,
ne Jesús quebe naque̱ꞌ Zriꞌine Dios.
23 Xúgute̱ benneꞌ dxelenné̱ꞌ Jesús quebe naque̱ꞌ Zriꞌine Dios,
Dios quebe zúale̱ne̱ꞌ benneꞌ caꞌ.
Bénneaꞌ dxexeche̱be̱ꞌ Jesús naque̱ꞌ Zriꞌine Dios,
Dios zúale̱queze̱ꞌ bénneaꞌ.
24 Chee̱ le̱ naꞌ,
le cuꞌu lu xichaj lázrdaule dizraꞌ da ba bénele nédxudaute̱.
Che da ba bénele nédxudaute̱ zua na lu xichaj lázrdaule,
leꞌe súatequezle tuze nen Zriꞌine Dios,
ne nen Xradxu Dios.
25 Da nigá naca na da nache̱be lazreꞌ Dios,
gunne̱ꞌ dxiꞌu xel-laꞌ nabán zeajlí canna.
26 Ba bzuajaꞌ chee̱le da nigá ca naca chee̱ benneꞌ caꞌ dxelezí xe̱ꞌe̱ leꞌe.
27 Naꞌa zúale̱ Beꞌ Láꞌazxa leꞌe,
Bénneaꞌ gusel-la Jesucristo chee̱le,
naꞌ Beꞌ Láꞌazxa nigá zue̱ꞌ xichaj lázrdaule.
Chee̱ le̱ naꞌ quebe nachínele nu guse̱de leꞌe laweꞌ da dxuse̱de Beꞌ Láꞌazxa leꞌe ca naca xúgute̱ da caní,
naꞌ da dxusé̱dene̱ꞌ leꞌe naca na da li,
ne quebe naca na da we̱n lazreꞌ.
Chee̱ le̱ naꞌ,
le súatequeze tuze nen Cristo ca naca da ba bse̱de Beꞌ Láꞌazxa leꞌe.
Ca naca chee̱ benneꞌ zaj naque̱ꞌ zriꞌine Dios