Ca bdxúajdxu chaweꞌ lu xe̱zr la xu nigá
5
Xúgute̱ benneꞌ dxeléajle̱ꞌe̱ Jesús naque̱ꞌ Cristo,
Benneꞌ nasel-la Dios,
benneꞌ caní zaj naque̱ꞌ bi chee̱ Dios,
naꞌ che zaj nazriꞌine̱ꞌ Xradxu Dios,
dxal-laꞌ xelezríꞌiquezne̱ꞌ xúgute̱ benneꞌ zaj naque̱ꞌ bi chee̱ Dios.
2 Nezdxu nazriꞌidxu benneꞌ zaj naque̱ꞌ bi chee̱ Dios chete nazriꞌidxu Dios,
ne dxundxu ca naca da dxiꞌe̱ dxiꞌu.
3 Che da li nazriꞌidxu Dios,
dxundxu da dxiꞌe̱ dxiꞌu.
Da dxiꞌe̱ dxiꞌu quebe naca na ste̱be.
4 Xúgute̱ benneꞌ zaj naque̱ꞌ bi chee̱ Dios dxedxúaje̱ꞌ chaweꞌ lau da cale̱la da dxaca na lu xe̱zr la xu nigá.
Dxedxúajdxu chaweꞌ lau da cale̱la da dxaca na lu xe̱zr la xu nigá laweꞌ da dxéajle̱dxu da naca na chee̱ Jesucristo.
5 Benneꞌ dxedxuajeꞌ chaweꞌ lau da cale̱la da dxaca na lu xe̱zr la xu nigá naque̱ꞌ bénneaꞌ dxéajle̱ꞌe̱ naca Jesús Zriꞌine Dios.
Da dxenná Dios ca naca chee̱ Zríꞌine̱ꞌ
6 Guca bea Jesús naque̱ꞌ Cristo gate gudxúe̱ꞌ nisa,
ne gate gulalaj dxen chee̱ꞌ.
Quegá gudxúaze̱ꞌ nisa san cáꞌanqueze gulalaj dxen chee̱ꞌ.
Beꞌ chee̱ Dios gudxixruj lie̱ꞌ da nigá,
naꞌ Le̱ꞌ dxuchálaje̱ꞌ da li.
7 Chunne̱ꞌ dxelixruj lie̱ꞌ chee̱ da nigá xabáa,
Xradxu Dios,
ne Zríꞌine̱ꞌ,
ne Beꞌ Láꞌazxa,
naꞌ chunne̱ꞌ caní zaj naque̱ꞌ tuze.
8 Cáꞌanqueze chunna da dxelixruj li na chee̱ da nigá lu xe̱zr la xu nigá,
Beꞌ Láꞌazxa,
ne da guca gate gudxúa Jesús nisa,
ne da guca gate gulalaj dxen chee̱ꞌ,
naꞌ da chunna caní,
túzqueze da dxelixruj li na.
9 Dxéajle̱dxu da dxelixruj li bénneache,
san da nadxixruj li Dios zácadxa na,
naꞌ Le̱ꞌ nadxixruj lie̱ꞌ naca Jesús Zríꞌinequeze̱ꞌ.
10 Bénneaꞌ dxéajle̱ꞌe̱ naca Jesús Zriꞌine Dios ba guziꞌe̱ xichaj lázrdawe̱ꞌ da ba gudxixruj li Dios,
san bénneaꞌ quebe dxéajle̱ꞌe̱ chee̱ Dios dxucáꞌane̱ꞌ Dios ca tu benneꞌ we̱n lazreꞌ,
laweꞌ da quebe guxéajle̱ꞌe̱ chee̱ da ba gudxixruj li Dios ca naca chee̱ Zríꞌine̱ꞌ.
11 Da nigá naca na da nadxixruj li Dios,
dxenné̱ꞌ ba be̱nne̱ꞌ dxiꞌu xel-laꞌ nabán zeajlí canna,
naꞌ xel-laꞌ nabán nigá za na lu naꞌ Zríꞌine̱ꞌ,
Jesucristo.
12 Bénneaꞌ zua Zriꞌine Dios naꞌ lu xichaj lázrdawe̱ꞌ zúale̱ xel-la nabán nigá le̱ꞌ,
san bénneaꞌ quebe zua Zríꞌine̱ꞌ lu xichaj lázrdawe̱ꞌ quebe zúale̱ xel-laꞌ nabán nigá le̱ꞌ.
Ca gaca nezdxu nápadxu xel-laꞌ nabán zeajlí canna
13 Da nigá dxuzúajaꞌ chee̱le dxéajle̱le chee̱ Zriꞌine Dios chee̱ nézele zúale̱ xel-laꞌ nabán zeajlí canna leꞌe.
14 Dxuxrén lázredxu Dios laweꞌ da nezdxu che bi nábadxu lau Le̱ꞌ ca naca da dxaca lazreꞌ Le̱ꞌ,
Lé̱queze̱ꞌ wenne̱ꞌ chee̱dxu.
15 Laweꞌ da nezdxu Dios dxenne̱ꞌ chee̱dxu,
cáꞌanqueze ba nezdxu gunna Le̱ꞌ da ba gunábadxu lau Le̱ꞌ.
16 Che tu benneꞌ dxeléꞌene̱ꞌ dxun bíchedxu dul-la da quebe nua na xel-laꞌ gute,
dxal-laꞌ nabe̱ꞌ lau Dios ne̱ chee̱ bíchedxu naꞌ,
naꞌ Dios gunézruje̱ꞌ xel-laꞌ nabán chee̱ꞌ,
che naca na tu dul-la da quebe nua na xel-laꞌ gute.
De̱ dul-la da nua na xel-laꞌ gute,
naꞌ quebe dxenníaꞌ nábale lau Dios ne̱ chee̱ bénneaꞌ dxune̱ꞌ dul-la nigá.
17 Xúgute̱ da cale̱la naca na dul-la,
naꞌ de̱ dul-la da quebe nua na xel-laꞌ gute.
18 Nezdxu nu benneꞌ naca bi chee̱ Dios québedxa dxúnqueze̱ꞌ dul-la laweꞌ da dxuwía dxuxúe Zriꞌine Dios le̱ꞌ,
naꞌ da xriwe̱ꞌ quebe bi dxezeque gune na le̱ꞌ.
19 Nezdxu nácadxu bi chee̱ Dios,
naꞌ xúgute̱ benneꞌ zaj naca chee̱ xe̱zr la xu nigá zaj xuꞌe̱ lu naꞌ da xriwe̱ꞌ.
20 Nezdxu ba blaꞌ Zriꞌine Dios,
ne ba bzéajniꞌine̱ꞌ dxiꞌu chee̱ gúnbeadxu Dios li.
Nácadxu tuze nen Bénneaꞌ naque̱ꞌ li lazreꞌ,
Jesucristo,
Zriꞌine Dios.
Benneꞌ nigá naque̱ꞌ Dios li,
ne Lé̱queze̱ꞌ naque̱ꞌ xel-laꞌ nabán zeajlí canna da zúale̱ na dxiꞌu.
21 Leꞌe,
zríꞌinaꞌdauꞌ,
le guxúe xanneꞌ cuínale chee̱ quebe gucáꞌana szrenle bedauꞌ xiaj xaga caꞌ.