115
Quegá netuꞌ, Xran.Quegá cuintuꞌ, san Luéꞌqueze dxal-laꞌ xucáꞌana szrentuꞌ
ne̱ chee̱ xel-laꞌ zriꞌi lazreꞌ chiuꞌ, ne xel-laꞌ li lazreꞌ chiuꞌ.
2 ¿Bizr chee̱ naꞌ dxun na ba xen xuluche̱be bénneache netuꞌ:
“Gazra zua Dios chee̱le?”
3 Dios chee̱dxu zue̱ꞌ xabáa.
Dxune̱ꞌ ca da dxaca lázrequeze̱ꞌ.
4 Dios caꞌ chee̱ benneꞌ caꞌ zaj naca na bedáuꞌ plata,
ne bedáuꞌ oro, da nun niꞌa naꞌ bénneache.
5 Zaj zua dxuꞌa na, san quebe dxelenné̱ na.
Zaj zua xiaj lau na, san quebe dxeleléꞌe na.
6 Zaj zua naga na, san quebe dxelén na.
Zaj zua zrina na, san quebe dxeleléꞌe na.
7 Zaj zua naꞌ na, san quebe bi dxelecáꞌa na.
Zaj zua niꞌa na, san quebe dxeledá na.
Quebe dxedxuaj chiꞌi na lba na.
8 Ca zaj naca na, zaj naca benneꞌ caꞌ zaj nune̱ꞌ na,
ne benneꞌ caꞌ dxuluxrén lazre̱ꞌ na.
9 Le guxrén lazreꞌ Xránadxu, leꞌe, benneꞌ Israel caꞌ.
Le̱ꞌ dxácale̱ne̱ꞌ leꞌe, ne dxuxúe̱ꞌ leꞌe.
10 Le guxrén lazreꞌ Xránadxu, leꞌe, bxruze chee̱ Dios,
nácale zriꞌine zre sua Aarón.
Le̱ꞌ dxácale̱ne̱ꞌ leꞌe, ne dxuxúe̱ꞌ leꞌe.
11 Le guxrén lazreꞌ Xránadxu, leꞌe dxucáꞌana szrenle Le̱ꞌ.
Le̱ꞌ dxácale̱ne̱ꞌ leꞌe, ne dxuxúe̱ꞌ leꞌe.
12 Xránadxu dxajsá lazre̱ꞌ dxiꞌu, naꞌ gune̱ꞌ dxiꞌu da chaweꞌ.
Gune̱ꞌ da chaweꞌ chee̱ benneꞌ Israel caꞌ.
Gune̱ꞌ da chaweꞌ chee̱ bxruze chee̱ꞌ, zriꞌine zre sua Aarón.
13 Gune̱ꞌ da chaweꞌ chee̱ xúgute̱ benneꞌ dxelape̱ꞌ Le̱ꞌ ba láꞌana,
benneꞌ blau caꞌ, ne benneꞌ quebe zaj naque̱ꞌ blau.
14 Gun Xránadxu chan zriꞌinuꞌ caꞌ,
ne chan zriꞌine bi biu chiuꞌ caꞌ.
15 Gun Xránadxu da chaweꞌ chiuꞌ.
Naque̱ꞌ Bénneaꞌ be̱n xabáa, ne xe̱zr la xu.
16 Chee̱ tuze Xránadxu naca xabáa,
san bnézruje̱ꞌ bénneache xe̱zr la xu.
17 Benneꞌ zaj nate quebe gaca xelúe láꞌane̱ꞌ Xránadxu,
ne quebe gaca benneꞌ caꞌ zaj zue̱ꞌ lu xe̱dxu ba.
18 Dxiꞌu, benneꞌ ban, güe láꞌanadxu Xránadxu,
naꞌa zra, ne chadía chacanna.
¡Le güe láꞌana Xránadxu!