116
¡Nazríꞌidaꞌ Xránadxu Dioslaweꞌ da benne̱ꞌ chiꞌa, ne da gunabaꞌ lawe̱ꞌ,
2 ne laweꞌ da bze̱ nague̱ꞌ chiaꞌ!
Chee̱ le̱ naꞌ guláwizraꞌ Le̱ꞌ dxácate̱ naca banaꞌ.
3 Guzúaꞌ lu da ste̱be chee̱ xel-laꞌ gute,
ne bzrebaꞌ ba zuaꞌ chuꞌa lataj ba xaꞌ.
Guzúaꞌ lu da ste̱be, ne guzaca ziꞌa.
4 Nadxa bláwizraꞌ Xránadxu Dios, gunníaꞌ:
Xranaꞌ Dios, bselá bénneꞌdu xuꞌa.
5 Cháweꞌle̱ꞌe̱ naca Xránadxu Dios, ne xrlátaje naque̱ꞌ.
Aweꞌ, dxexache lazreꞌ Dios chee̱dxu dxiꞌu.
6 Dxuxúe Xránadxu benneꞌ dxexruj lazreꞌ caꞌ.
Gate naꞌ guzúaꞌ lu da ste̱be bselé̱ꞌ nedaꞌ.
7 Be̱n dipa lazreꞌ, bénneꞌdu xuꞌa,
laweꞌ da nun Xránadxu da chaweꞌ chiuꞌ.
8 Lueꞌ, Xran, bseláuꞌ bénneꞌdu xuꞌa lu naꞌ xel-laꞌ gute,
chee̱ québedxa cuezre we̱ꞌa, ne chee̱ quebe cheajcháziaꞌ.
9 Taꞌ lau Xránadxu Dios
naga zaj zraꞌ benneꞌ caꞌ zaj naca bane̱ꞌ.
10 Guxéajle̱ꞌa chee̱ꞌ, naꞌ chee̱ le̱ naꞌ bchálajaꞌ, lácala guzaca zíꞌle̱ꞌa.
11 Lu xel-laꞌ dxezrebe chiaꞌ, gunníaꞌ:
Zaj naca xúgute̱ bénneache benneꞌ we̱n lazreꞌ caꞌ.
12 ¿Bizra quízrujquezaꞌ Xránadxu Dios
chee̱ xúgute̱ da chaweꞌ da be̱ne̱ꞌ chiaꞌ?
13 Siꞌa lu ne̱ꞌe̱ xel-laꞌ weselá,
ne guláwizraꞌ Xránadxu Dios.
14 Naꞌa gunaꞌ da caꞌ guche̱be lazraꞌ lau Xránadxu.
Gunaꞌ na lau xúgute̱ bénneache chee̱ꞌ.
15 Xránadxu Dios dxeꞌe̱ gunne xue
chee̱ bénneache chee̱ꞌ gate dxelátie̱ꞌ.
16 Xranaꞌ Dios, da li nacaꞌ we̱n zrin chiuꞌ.
Nacaꞌ we̱n zrin chiuꞌ, ne zriꞌine nuꞌula we̱n zrin chiuꞌ.
Lueꞌ bzúzrujuꞌ da zaj nadxéaj na nedaꞌ.
17 Da güe láꞌanaꞌ Lueꞌ gaca na ca tu béadauꞌ gutiaꞌ lauꞌ,
ne gucáꞌana szrenaꞌ Lauꞌ, Xranaꞌ Dios.
18 Lau Xránadxu Dios gunaꞌ da caꞌ guche̱be lazraꞌ chee̱ꞌ,
da gunaꞌ lau xúgute̱ bénneache chee̱ꞌ.
19 Gunaꞌ na chaleꞌaj xuꞌu lizre Xránadxu Dios,
da dxeꞌ na luꞌule xe̱zre Jerusalén.
¡Gaca ba láꞌazxa Xránadxu Dios!