113
¡Leꞌe, we̱n zrin chee̱ Xránadxu Dios, le güe láꞌana Le̱ꞌ!¡Le güe láꞌana La Xránadxu Dios!
2 ¡Gaca ba láꞌazxa La Xránadxu Dios,
naꞌa zra, ne chadía chacanna!
3 ¡Naga dxalaj gubizra ca zrinte̱ naga dxebía na
gaca ba láꞌazxa La Xránadxu Dios!
4 ¡Szrente̱ nagáꞌana Xránadxu Dios laweꞌ dute̱ xe̱zr la xu,
naꞌ láwela xabáa dxeꞌ da xabáa chee̱ꞌ!
5 ¿Núzraqueze naca ca naca Xránadxu Dios,
Bénneaꞌ dxeꞌe̱ xabáa naꞌla?
6 Dios dxun cuine̱ꞌ dxexruj lazreꞌ chee̱ léꞌene̱ꞌ
da de̱ zran xabáa, ne lu xe̱zr la xu.
7 Dios dxechise̱ꞌ benneꞌ xacheꞌ lu xu xrte,
ne dxebéaje̱ꞌ benneꞌ baxacheꞌ lu da dxezaca ziꞌe̱,
8 naꞌ dxune̱ꞌ dxelebéꞌ benneꞌ caní ládujla benneꞌ
dxelenná beꞌe̱,
ládujla benneꞌ caꞌ dxelenná béꞌene̱ꞌ bénneache chee̱ꞌ.
9 Dxune̱ꞌ zua nuꞌula zue̱ꞌ tuze ládujla zríꞌinequeze̱ꞌ caꞌ,
naꞌ dxebé nuꞌula nigá laweꞌ da naque̱ꞌ xrna bi cheé̱queze̱ꞌ.
¡Gaca ba láꞌazxa Xránadxu Dios!