112
Ba neza zrente̱ naca na chee̱ bénneaꞌ dxezrebe̱ꞌXránadxu Dios,
ne ca zaj naca da bdxixruj be̱ꞌe̱ dxezaca ba lázrele̱ꞌe̱ne̱ꞌ.
2 Zriꞌine zre sua bénneaꞌ xelape̱ꞌ xel-laꞌ dxenná bea
lu xe̱zr la xu,
naꞌ gaca chaweꞌ chee̱ benneꞌ xrlátaje caꞌ.
3 Da zan da de̱, ne xel-laꞌ gunníꞌa zaj zra na xuꞌu lizre̱ꞌ,
ne tu chíꞌizqueze zua da xrlátaje da dxun bénneaꞌ.
4 Dxusaníꞌ tu xiꞌ lu da chul-la naga zaj zraꞌ benneꞌ li lazreꞌ caꞌ,
benneꞌ caꞌ zaj naque̱ꞌ zren lazreꞌ, ne xrlátaje,
ne dxelexache lazre̱ꞌ bénneache.
5 Tu benneꞌ xrlátaje dxexache lazre̱ꞌ bénneache,
ne dxusane̱ꞌ le̱ꞌ dumí.
Lu da xrlátaje dxenná béꞌene̱ꞌ da zaj xuꞌu lu ne̱ꞌe̱.
6 Chee̱ le̱ naꞌ quebe bi gutá na le̱ꞌ lu lataj naga zue̱ꞌ,
naꞌ tu chíꞌizqueze xeajlesá lazre̱ꞌ bénneache caꞌ.
7 Quebe zrebe̱ꞌ gate xenne̱ꞌ dxaca da cale̱la chee̱
da xuꞌu lu ne̱ꞌe̱.
Ze̱ chacha lázrdawe̱ꞌ laweꞌ da dxuxrén lazre̱ꞌ Xránadxu Dios.
8 Zua chaweꞌ lázrdawe̱ꞌ, ne quebe bi dxezrebe̱ꞌ,
ca zrindxa zra léꞌene̱ꞌ gaca chee̱ benneꞌ caꞌ guledábague̱ꞌ le̱ꞌ
ca da dxezá lazre̱ꞌ.
9 Dxisie̱ꞌ da de̱ chee̱ꞌ, ne dxunézruje̱ꞌ da gácale̱
benneꞌ xacheꞌ caꞌ,
ne tu chíꞌizqueze zua da xrlátaje da dxune̱ꞌ.
Lu da xabáa xegáꞌana szren xel-laꞌ dxenná bea chee̱ꞌ.
10 Waléꞌe benneꞌ we̱n da cale̱la da nigá, naꞌ gueque zréajene̱ꞌ.
Gágu xaꞌate̱ lazxe̱ꞌ, ne cueꞌe̱ gunne xue.
Xelenite da caꞌ dxelezá lazreꞌ benneꞌ caꞌ dxelune̱ꞌ da cale̱la.