108
Ba zúate̱queze lázrdawaꞌ, Dios,chee̱ gúl-laquezaꞌ da güe láꞌanaꞌ Lueꞌ.
Da nigá dxugúꞌu na nedaꞌ lu da ba neza.
2 Bebán lazreꞌ, bénneꞌdu xuꞌa, naꞌ le xebán lázrele,
leꞌe dxínnele da dxúl-lale̱nle, ne da con zríadiꞌi na du.
Che zílala cheajsáꞌquezaꞌ.
3 Güe láꞌanaquezaꞌ Lueꞌ ládujla bénneache chiuꞌ, Xran.
Gúl-laquezaꞌ chiuꞌ lau benneꞌ dute̱ xe̱zr la xu,
4 laweꞌ da naca xel-laꞌ dxexache lazreꞌ chiuꞌ zrendxa ca xabáa,
naꞌ da li chiuꞌ naca na zrendxa ca beuj bza caꞌ.
5 Xegáꞌana szrénquezuꞌ xabáa, Dios.
Xel-laꞌ szren chiuꞌ sua na laweꞌ dute̱ xe̱zr la xu.
6 Chee̱ xelelá benneꞌ caꞌ nazríꞌiqueznuꞌ Lueꞌ,
bselá le̱ꞌ dute̱ xel-laꞌ waca chiuꞌ, ne bene chiaꞌ.
7 Lu lataj láꞌazxa chee̱ꞌ gunná Dios: “Wabéquezdaꞌ nedaꞌ.
Gunnaꞌ late weaj chee̱le xe̱zr la xu chee̱ benneꞌ Siquem caꞌ,
ne gudixraꞌ chee̱le xe̱zr la xu de̱ cuite xe̱gu Sucot.
8 Chiaꞌ naca xe̱zr la xu Galaad,
ne chiaꞌ naca xe̱zr la xu chee̱ zriꞌine zre sua Manasés.
Xe̱zr la xu chee̱ zriꞌine zre sua Efraín naca na ca tu
da napa chiꞌi na xíchajaꞌ.
Xe̱zr la xu chee̱ zriꞌine zre sua Judá naca na naga dxenná beꞌa.
9 Xe̱zr la xu chee̱ benneꞌ Moab naca na ca tu zrigaꞌ
da xuzru nisa gunáꞌa,
naꞌ lu xe̱zr la xu chee̱ benneꞌ Edom chuꞌunaꞌ zrelaꞌ gula.
Siꞌa ba neza xe̱zr la xu chee̱ benneꞌ Filistea.”
10 ¿Nuzra che̱ꞌ nedaꞌ chee̱ chuꞌa xe̱zre da naxechaj zeꞌe sibe?
¿Nuzra che̱ꞌ nedaꞌ chee̱ guzétajaꞌ benneꞌ Edom caꞌ?
11 ¿Quegá Lueꞌ naꞌ che̱ꞌu nedaꞌ, Dios.
Nacuꞌ Bénneaꞌ bzua netuꞌ chaláꞌala,
ne quebe guxéajle̱nuꞌ benneꞌ chee̱ntuꞌ caꞌ, benneꞌ dxjaque̱ꞌ
wedil-la, Dios?
12 Gúcale̱ netuꞌ chee̱ séquentuꞌ tíl-lale̱ntuꞌ benneꞌ caꞌ
dxeledíl-lale̱ne̱ꞌ netuꞌ,
laweꞌ da naca dácheze xelácale̱ bénneache netuꞌ.
13 Tu zren nen Dios gundxu tu da zrente̱,
naꞌ Le̱ꞌ gulague̱ꞌ benneꞌ caꞌ dxeledil-lale̱ne̱ꞌ dxiꞌu.