109
¡Dios, dxue láꞌanaꞌ Lueꞌ!Quebe xegáꞌanuꞌ zrize
2 laweꞌ da dxelenná benneꞌ caꞌ dxelune̱ꞌ da cale̱la,
ne benneꞌ we̱n lazreꞌ caꞌ chiaꞌ nedaꞌ.
Dxelenné̱ꞌ chiaꞌ da naca da we̱n lazreꞌ.
3 Lu xel-laꞌ dxelecuide chee̱ꞌ zaj naxéchaje̱ꞌ nedaꞌ,
ne dxelenné̱ꞌ chiaꞌ.
Dxeledíl-lale̱ne̱ꞌ nedaꞌ, ne quebe bi nunaꞌ chee̱ benneꞌ caꞌ.
4 Lácala bzriꞌidaꞌ benneꞌ caꞌ, naꞌa dxeledábague̱ꞌ nedaꞌ,
san nedaꞌ dxenabaꞌ gaca da chaweꞌ chee̱ benneꞌ caꞌ.
5 Lácala be̱naꞌ nedaꞌ da chaweꞌ chee̱ benneꞌ caꞌ, dxelune̱ꞌ chiaꞌ
da cale̱la,
ne lácala bzriꞌidaꞌ le̱ꞌ, dxelecuídene̱ꞌ nedaꞌ.
6 Bzua tu benneꞌ we̱n da zrinnaj chee̱ guchiꞌe̱ chee̱
benneꞌ we̱n da cale̱la caꞌ,
ne be̱n sua tu benneꞌ nnie̱ꞌ chee̱ benneꞌ caꞌ,
benneꞌ guzúe̱ꞌ ca naca da cale̱la belún benneꞌ caꞌ.
7 Gate naꞌ zriꞌa chee̱ꞌ, be̱n gaca bea na zaj nabague̱ꞌ zria.
Bleꞌe da xelenabe̱ꞌ lauꞌ ca tu dul-la da dxelune̱ꞌ.
8 Bzache zra xelaca ban benneꞌ caꞌ,
ne be̱n xelúꞌu xezicaꞌ benneꞌ waláz chee̱ꞌ.
9 Bcaꞌana zríꞌine̱ꞌ caꞌ bidauꞌ we̱ze̱be,
ne xelaca zruꞌule̱ꞌ nuꞌula tuze caꞌ.
10 Be̱n xelaca zríꞌine̱ꞌ bi dxeledaze chee̱ xelenábabeꞌ gunaꞌ,
ne be̱n xelezrélebeꞌ xeta xelágubeꞌ zituꞌ naga zaj zua lízrebeꞌ
da zaj naxinnaj.
11 Be̱n xelúꞌu da caꞌ zaj nape̱ꞌ lu naꞌ bénneꞌ caꞌ
bulusane̱ꞌ le̱ꞌ dumí.
Be̱n xelexúa benneꞌ zituꞌ caꞌ da caꞌ zaj nune̱ꞌ.
12 Be̱n quebe nu zrel-la benneꞌ xexache lazre̱ꞌ le̱ꞌ,
ne quebe nu benneꞌ zrel-la xexache lazre̱ꞌ bidauꞌ we̱ze̱be
chee̱ꞌ caꞌ.
13 Be̱n xelebía xiꞌ zriꞌine zre sua benneꞌ caꞌ,
ne québedxa nu chaꞌ zriꞌine zre sue̱ꞌ,
siꞌ le̱ꞌ ca zaj naziꞌi la benneꞌ caꞌ.
14 Bsa lazreꞌ ca da cale̱la da belún xra xrtawe̱ꞌ, Xran,
ne quebe xusuluꞌ dul-la da gulún xrne̱ꞌe̱ caꞌ.
15 Tu chíꞌizqueze bsa lazreꞌ ca da cale̱la da zaj nune̱ꞌ.
Québedxa cheajsá lazruꞌ benneꞌ caꞌ
16 laweꞌ da quebe xeleajsá lazre̱ꞌ xelexache lazre̱ꞌ le saꞌ ljwezre̱ꞌ caꞌ,
san bulusaca ziꞌe̱ benneꞌ baxacheꞌ caꞌ, benneꞌ dxelexázrjene̱ꞌ,
ne benneꞌ dxexruj lazreꞌ caꞌ, naꞌ belútie̱ꞌ bénneꞌdu caꞌ.
17 Beledánene̱ꞌ da dxugúꞌu na deꞌ, naꞌ da caníze guca na chee̱ꞌ.
Quebe gulaca lazre̱ꞌ xelenabe̱ꞌ gaca chaweꞌ chee̱ bénneache,
naꞌ da chaweꞌ bebiga na naga zaj zue̱ꞌ.
18 Deꞌ da gulegúꞌe̱ bénneache guca na ca tu da gulacu cuine̱ꞌ,
naꞌ guxúꞌu na le̱ꞌe̱ ca nisa guléꞌaje̱ꞌ,
ne guxúꞌu na zrita chee̱ꞌ ca da za.
19 Tu chíꞌizqueze be̱n gaca na chee̱ꞌ ca xicha da dxelácue̱ꞌ,
ne gaca na ca tu xpádxue̱ꞌ dxuluchela le̱ꞌe̱.
20 Gaca da nigá da quizruj Xránadxu Dios benneꞌ caꞌ
dxelenné̱ꞌ cale̱la chiaꞌ,
ne da quízruje̱ꞌ benneꞌ caꞌ dxelune̱ꞌ da cale̱la,
ne dxelenné̱ꞌ cale̱la chee̱ bénneꞌdu xuꞌa.
21 Xranaꞌ Dios, be̱n culuén chiaꞌ chee̱ xegáꞌanaꞌ
xrlátaje lauꞌ.
Bselá nedaꞌ laweꞌ da dxexache lázrele̱ꞌu bénneache,
22 ne laweꞌ da dxezaca ziꞌa, ne dxexázrjedaꞌ,
ne dxeque ziꞌ lázrdawaꞌ.
23 Dxedé chiaꞌ ca dxedé chee̱ tu zrul-la gate dxebía gubizra.
Dxaca chiaꞌ ca dxaca chee̱ biche xuaj gate dxua beꞌ le̱baꞌ.
24 Dxelate zribaꞌ laweꞌ da dxunaꞌ gubasa,
ne nazrítale̱ꞌa laweꞌ da quebe bi dxawaꞌ.
25 Nacaꞌ ca tu da dxulucáꞌana dítaje̱ꞌ.
Dxelenné̱ꞌe̱ nedaꞌ, ne dxelún le̱ꞌ chiaꞌ, dxulutá xíchaje̱ꞌ.
26 Gúcale̱ nedaꞌ, Xranaꞌ Dios.
Bselá nedaꞌ laweꞌ da dxexache lazruꞌ bénneache.
27 Be̱n xeleque beꞌene̱ꞌ Luéꞌqueze dxácale̱nuꞌ nedaꞌ.
Luéꞌqueze, Xranaꞌ Dios, ba nunuꞌ da nigá.
28 Dxeleguꞌe̱ nedaꞌ deꞌ, san be̱n Lueꞌ gaca chaweꞌ chiaꞌ.
Guxasa, be̱n xelexeduéꞌe benneꞌ caꞌ dxeledábague̱ꞌ nedaꞌ,
san be̱n bedaꞌ nedaꞌ.
29 Be̱n xelezráꞌ lu xel-laꞌ stuꞌ benneꞌ caꞌ dxelenné̱ꞌ
da cale̱la chiaꞌ.
Be̱n xeleque zréajene̱ꞌ tu chíꞌizqueze.
30 Du lazraꞌ gúl-laquezaꞌ da güe láꞌanale̱ꞌa Xránadxu Dios.
Ládujla benneꞌ zan caꞌ güe láꞌanaꞌ Le̱ꞌ.
31 Le̱ꞌ zue̱ꞌ cuita xabe̱la chee̱ benneꞌ xacheꞌ caꞌ
chee̱ guselé̱ꞌ bénneꞌdu zaj xuꞌe̱ lu naꞌ benneꞌ caꞌ
dxuluchiꞌe̱ chee̱ꞌ.