107
¡Le güe láꞌana Xránadxu, Benneꞌ xrlátaje!¡Chadía chacanna naque̱ꞌ Benneꞌ zriꞌi lazreꞌ!
2 Da nigá dxal-laꞌ xelenná benneꞌ caꞌ ba naxáꞌawe Xránadxu le̱ꞌ,
benneꞌ caꞌ bselé̱ꞌ lu naꞌ benneꞌ guledábague̱ꞌ Le̱ꞌ.
3 Beche̱ꞌe̱ le̱ꞌ naga gulezráꞌ benneꞌ xe̱zr la xu zituꞌ caꞌ,
da zaj zua naga dxalaj gubizra, ne naga dxebía na,
ne naga zaꞌ beꞌ zaga, ne naga dxedé gubizra beuꞌ zaga caꞌ.
4 Bal-la benneꞌ caꞌ guledé̱ꞌ le̱ꞌe̱ xixreꞌ naga quebe bi neza zua,
ne quebe belezrelne̱ꞌ xe̱zre naga xelezúe̱ꞌ.
5 Guledune̱ꞌ, ne gulebílene̱ꞌ,
ne québedxa bi gulebeza lazre̱ꞌ.
6 Nadxa lu da dxelezaque̱ꞌ gulenné̱ꞌ Xránadxu,
naꞌ bselé̱ꞌ benneꞌ caꞌ lu da dxelezaque̱ꞌ.
7 Naꞌ buzre̱ꞌe̱ le̱ꞌ tu neza li,
chee̱ chjaque̱ꞌ tu xe̱zre naga xelezúe̱ꞌ.
8 Dxal-laꞌ xelúe láꞌane̱ꞌ Xránadxu laweꞌ da bexache lazreꞌ
Xránadxu le̱ꞌ,
ne laweꞌ da be̱ne̱ꞌ chee̱ꞌ da caꞌ da dxebánedxu.
9 Dxuxíꞌaje̱ꞌ benneꞌ caꞌ dxelebile lazreꞌ,
ne dxugawe̱ꞌ benneꞌ caꞌ dxeledún nen da chaweꞌ chee̱ꞌ.
10 Bal-la benneꞌ caní gulezúe̱ꞌ lu da chul-la, ne lu da ste̱be
chee̱ xel-laꞌ gute.
Gulaque̱ꞌ ca benneꞌ zaj xuꞌe̱ lizre xia,
ne zaj nadxéaj du xia, ne dxeledée̱ꞌ ba xaꞌ,
11 laweꞌ da guledábague̱ꞌ xrtizraꞌ Xránadxu,
ne buluzúe̱ꞌ chaláꞌala da bzéajniꞌi Dios zrente̱ le̱ꞌ.
12 Belexedú lazre̱ꞌ lu zrin zíꞌite̱ da dxelune̱ꞌ.
Xeleajcházie̱ꞌ zran xua da zaj nuꞌe̱,
ne quebe nu chiláꞌ gácale̱ne̱ꞌ le̱ꞌ.
13 Nadxa lu da dxelezaque̱ꞌ gulenné̱ꞌ Xránadxu,
naꞌ bselé̱ꞌ benneꞌ caꞌ lu da dxelezaque̱ꞌ.
14 Nadxa bebéaje̱ꞌ benneꞌ caꞌ lu da chul-la
ne lu da ste̱be chee̱ xel-laꞌ gute,
ne bzúzruje̱ꞌ du xia caꞌ da zaj nadxéaje̱ꞌ.
15 Dxal-laꞌ xelúe láꞌane̱ꞌ Xránadxu laweꞌ da bexache lazre̱ꞌ le̱ꞌ,
ne laweꞌ da be̱ne̱ꞌ chee̱ꞌ da caꞌ da dxebánedxu.
16 Bchínnaje̱ꞌ dxa xuꞌu caꞌ zaj naca na xia gache,
ne bzúzruje̱ꞌ xia caꞌ da zaj naxechaj na benneꞌ caꞌ.
17 Bal-la benneꞌ caꞌ gulaque̱ꞌ benneꞌ xala,
ne guledée̱ꞌ xel-laꞌ ziꞌ ne̱ chee̱ dul-la da zaj nabagueꞌ,
ne ne̱ chee̱ da zrinnaj caꞌ da belune̱ꞌ.
18 Belexegútene̱ꞌ da dxeléꞌaj dxelawe̱ꞌ,
naꞌ xáteze ca gulátie̱ꞌ.
19 Nadxa lu da dxelezaque̱ꞌ gulenné̱ꞌ Xránadxu,
naꞌ bselé̱ꞌ benneꞌ caꞌ lu da dxelezaque̱ꞌ.
20 Gusel-le̱ꞌ dizraꞌ chee̱ꞌ chee̱ benneꞌ caꞌ,
naꞌ bexune̱ꞌ le̱ꞌ, ne bselé̱ꞌ le̱ꞌ lu xel-laꞌ gute.
21 Dxal-laꞌ xelúe láꞌane̱ꞌ Xránadxu laweꞌ da bexache lazre̱ꞌ le̱ꞌ,
ne laweꞌ da be̱ne̱ꞌ chee̱ꞌ da caꞌ da dxebánedxu.
22 Dxal-laꞌ xelé̱ꞌe̱ Le̱ꞌ: Xcalenuꞌ.
Dxal-laꞌ xelúꞌe̱ da xulunézruje̱ꞌ Le̱ꞌ,
naꞌ lu xel-laꞌ dxelebé chee̱ꞌ dxal-laꞌ xelúl-le̱ꞌ,
ne xuluzenne̱ꞌ bénneache ca zaj naca da nune̱ꞌ.
23 Bal-la benneꞌ caꞌ guledée̱ꞌ lu nísadauꞌ
lu da zren caꞌ da dxedá laweꞌ nísadauꞌ.
Beleziꞌe̱ dumí zren lu zrin dxelune̱ꞌ lu nísadauꞌ.
24 Beleléꞌene̱ꞌ ca naca da caꞌ dxun Xránadxu,
da caꞌ dxune̱ꞌ lu nísadauꞌ da zaj naca na da dxebánedxu.
25 Gunné̱ze̱ꞌ, naꞌ guzú lau dxaca beꞌ bdunuꞌ,
naꞌ gulasa xeajxruza zren lu nísadauꞌ.
26 Belegüén da dxedá laweꞌ nísadauꞌ caꞌ ca lu xiꞌa zriꞌa
da naca na nísadauꞌ,
naꞌ belexexetaj na lu da situj laweꞌ nísadauꞌ naꞌ.
27 Gulechégüe̱ꞌ, ne xeajleté̱ꞌ ni xeajleté̱ꞌ naꞌ ca
benneꞌ dxelezuzre,
naꞌ guca dácheze ca da zaj nusé̱die̱ꞌ.
28 Nadxa lu da dxelezaque̱ꞌ gulenné̱ꞌ Xránadxu,
naꞌ bselé̱ꞌ benneꞌ caꞌ lu da dxelezaque̱ꞌ.
29 Bzua zrie̱ꞌ beꞌ bdunuꞌ naꞌ da dxaca na,
ne gulezúa zri xeajxruza chee̱ nísadauꞌ naꞌ.
30 Gulebéle̱ꞌe̱ne̱ꞌ laweꞌ da zaj zua zri xeajxruza caꞌ,
naꞌ guché̱ꞌe̱ Dios le̱ꞌ cháwedauꞌ naga zjaque̱ꞌ.
31 Dxal-laꞌ xelúe láꞌane̱ꞌ Xránadxu laweꞌ da bexache lazre̱ꞌ le̱ꞌ,
ne laweꞌ da be̱ne̱ꞌ chee̱ꞌ da caꞌ da dxebánedxu.
32 Dxal-laꞌ xuluzenne̱ꞌ ca naca xel-laꞌ szren chee̱ꞌ naga
zaj nazraga bénneache chee̱ꞌ,
ne xelúe láꞌane̱ꞌ Le̱ꞌ naga zaj nazraga benneꞌ gula caꞌ, benneꞌ
dxelenná beꞌe̱.
33 Be̱n Xránadxu gulebizre xe̱gu nisa caꞌ,
ne busúꞌaje̱ꞌ beaj nisa caꞌ.
34 Xu xaꞌa bexune̱ꞌ na xu bizre,
ne̱ chee̱ da cale̱la da belún benneꞌ caꞌ zaj zre̱ꞌe̱ naꞌ.
35 Naga naca xu bizre bexune̱ꞌ na xu nisa,
naꞌ xu xiaj bexune̱ꞌ na naga dxalaj nisa.
36 Bzre̱ꞌe̱ ga naꞌ benneꞌ caꞌ benneꞌ dxeledún,
naꞌ belune̱ꞌ tu xe̱zre naga xelezúe̱ꞌ.
37 Gulaze̱ꞌ xe̱zr la xu naꞌ, naꞌ belexaze̱ꞌ lba uva caꞌ,
naꞌ belexezíꞌle̱ꞌe̱ lina chee̱ na.
38 Be̱ne̱ꞌ da chaweꞌ chee̱ benneꞌ caꞌ, naꞌ gulánle̱ꞌe̱
bidu chee̱ꞌ caꞌ,
ne quebe be̱ꞌe̱ lataj xelelase ca zaj naca be̱ xixreꞌ chee̱ꞌ caꞌ.
39 Gate buludé benneꞌ dxelenná bea benneꞌ caꞌ lu xel-laꞌ ziꞌ,
ne bulusaca ziꞌe̱ le̱ꞌ,
ne gulenná béꞌedxene̱ꞌ le̱ꞌ, ne belune̱ꞌ le̱ꞌ da cale̱la,
ne buludée̱ꞌ le̱ꞌ lu da ba xaꞌ,
40 bcaꞌana ditaj Dios benneꞌ xíchaje̱ caꞌ,
ne be̱ne̱ꞌ guledée̱ꞌ le̱ꞌe̱ xixreꞌ laweꞌ lataj naga quebe bi neza de̱.
41 Bselé̱ꞌ benneꞌ xacheꞌ caꞌ lu da ziꞌ da xaꞌ da dxeledée̱ꞌ,
ne bzánle̱ꞌe̱ zriꞌine benneꞌ caꞌ ca dxelán zrilaꞌ caꞌ.
42 Gate dxeleléꞌe benneꞌ xrlátaje caꞌ da caní, naꞌ dxelebéle̱ꞌe̱ne̱ꞌ,
naꞌ benneꞌ caꞌ dxelune̱ꞌ da cale̱la quebe bi gaca xelenné̱ꞌ.
43 Benneꞌ caꞌ zaj naque̱ꞌ sina dxal-laꞌ xulaba lazre̱ꞌ
ca zaj naca da caní,
ne dxal-laꞌ xelexúnbeꞌe̱ ca naca xel-laꞌ zriꞌi lazreꞌ
chee̱ Xránadxu.