106
¡Gaca ba láꞌazxa Xránadxu Dios!¡Le xe̱ Xránadxu Dios: “Xcalenuꞌ!”
Caní dxal-laꞌ gunle laweꞌ da naque̱ꞌ xrlátaje,
ne laweꞌ da tu chíꞌizqueze dxexache lazre̱ꞌ dxiꞌu.
2 ¿Núzraqueze sequeꞌ guléꞌene̱ꞌ ca naca xel-laꞌ waca zrente̱ caꞌ
da nune̱ꞌ Xránadxu?
¿Núzraqueze sequeꞌ güe láꞌane̱ꞌ Le̱ꞌ ca dxal-laꞌ gundxu?
3 Ba neza zrente̱ naca na chee̱ benneꞌ caꞌ dxelune̱ꞌ da xrlátaje,
benneꞌ caꞌ tu dxelúnzqueze̱ꞌ da naca xrlátaje.
4 Bsa lazreꞌ chiaꞌ, Xranaꞌ Dios, gate dxunuꞌ da chaweꞌ
chee̱ bénneache chiuꞌ.
5 Gudá bselá nedaꞌ chee̱ gaca leꞌedaꞌ da chaweꞌ gunuꞌ
chee̱ benneꞌ caꞌ ba gucaꞌu Lueꞌ,
ne chee̱ bedaꞌ gate xelezráꞌ bénneache chiuꞌ lu da ba neza,
ne chee̱ béle̱naꞌ bénneache chiuꞌ.
6 Ba be̱ntuꞌ dul-la cáqueze belún xra xrtáuntuꞌ caꞌ.
Be̱ntuꞌ da cale̱la, ne be̱ntuꞌ da zrinnaj.
7 Gate gulezráꞌ xra xrtáuntuꞌ lu xe̱zr la xu Egipto,
quebe bululaba lazre̱ꞌ ca naca xel-laꞌ waca caꞌ chee̱ xabáa
da be̱nuꞌ.
Quebe xeajlesá lazre̱ꞌ ca bexache lázrele̱ꞌu le̱ꞌ.
Guledábague̱ꞌ Lueꞌ dxuꞌa nísadauꞌ da nazí le na Xrna.
8 Le̱ꞌ bselé̱ꞌ benneꞌ caꞌ chee̱ gaca ba láꞌana La Le̱ꞌ,
ne chee̱ guléꞌe lau ca naca xel-laꞌ waca chee̱ꞌ.
9 Gudil-le̱ꞌ nísadauꞌ Xrna naꞌ, naꞌ bebizre na,
naꞌ guledé bénneache chee̱ꞌ laduj nísadauꞌ naꞌ lu xu bizre.
10 Bselé̱ꞌ benneꞌ caꞌ lu naꞌ benneꞌ guledábague̱ꞌ Le̱ꞌ,
ne bebéaje̱ꞌ le̱ꞌ lu naꞌ benneꞌ caꞌ bulusaca ziꞌe̱ le̱ꞌ.
11 Nadxa nísadauꞌ naꞌ bgacu na benneꞌ caꞌ guledábague̱ꞌ le̱ꞌ.
Netú benneꞌ caꞌ quebe nu begáꞌana.
12 Nadxa benneꞌ chee̱ꞌ caꞌ guléajle̱ꞌe̱ dizraꞌ chee̱ꞌ,
ne belul-le̱ꞌ da belúe láꞌane̱ꞌ Le̱ꞌ.
13 Chadí gulal-la lazre̱ꞌ ca da be̱ne̱ꞌ.
Quebe gulebeze̱ꞌ ca laꞌ dizraꞌ chee̱ Dios.
14 Gulezá lazre̱ꞌ tu da cale̱la le̱ꞌe̱ xixreꞌ laweꞌ lataj naꞌ,
naꞌ buluché̱ꞌe̱ Dios le̱ꞌe̱ xixreꞌ naꞌ.
15 Gudé naꞌ bnezruj Dios ca da gulenabe̱ꞌ,
san gusel-le̱ꞌ ládujla le̱ꞌ tu da gute na bal-la benneꞌ caꞌ.
16 Gulaque̱ꞌ xa lazreꞌ chee̱ Moisés naga zaj zre̱ꞌe̱,
ne chee̱ Aarón, Bénneaꞌ gucáꞌa Xránadxu Dios.
17 Nadxa bzra xe̱zr la xu naꞌ, ne gude̱be na Datán,
ne bgacu na benneꞌ caꞌ zaj de̱ꞌe̱ Abiram.
18 Nadxa guxalaj xiꞌ naga zaj nazraga benneꞌ caꞌ,
naꞌ bzezxe na benneꞌ caꞌ dxelune̱ꞌ da cale̱la.
19 Belune̱ꞌ tu bedáuꞌ be̱zre da naca na oro lu xiꞌa Horeb,
naꞌ buluzú zribe̱ꞌ lau bedáuꞌ oro naꞌ.
20 Caní bulucáꞌane̱ꞌ Dios, Benneꞌ xabáa,
chee̱ xulucáꞌana szrene̱ꞌ tu bedáuꞌ be̱zre,
da naca na ca tu be̱zre dxágubaꞌ xixreꞌ.
21 Gulal-la lazre̱ꞌ Dios, Bénneaꞌ bselé̱ꞌ le̱ꞌ,
Bénneaꞌ be̱ne̱ꞌ xel-laꞌ waca zrente̱ caꞌ lu xe̱zr la xu Egipto,
22 ne be̱ne̱ꞌ xel-laꞌ waca caꞌ chee̱ xabáa lu xe̱zr la xu
chee̱ zriꞌine zre sua Cam,
ne da caꞌ buluchebe na dxiꞌu dxuꞌa Nísadauꞌ Xrna.
23 Nadxa guca lazreꞌ Dios guzría xiꞌe̱ bénneache chee̱ꞌ,
san Moisés, bénneaꞌ gucáꞌa Dios, bzua cuine̱ꞌ lau Dios
chee̱ guzúa zrie̱ꞌ xel-laꞌ dxezráꞌa chee̱ Dios,
naꞌ be̱ne̱ꞌ quebe guzría xiꞌ Dios benneꞌ caꞌ.
24 Buluzúe̱ꞌ chaláꞌala xe̱zr la xu xrtante̱ da gunezruj Dios le̱ꞌ,
ne quebe guléajle̱ꞌe̱ dizraꞌ chee̱ꞌ.
25 Tu gulenné̱zqueze̱ꞌ chee̱ Dios lu xuꞌu xide chee̱ꞌ caꞌ,
ne quebe buluzé̱ nague̱ꞌ da gunná Xránadxu Dios.
26 Chee̱ le̱ naꞌ bzetaj cuine̱ꞌ gunné̱ꞌ ca da gune̱ꞌ chee̱ benneꞌ caꞌ.
Gunné̱ꞌ gune̱ꞌ xelate benneꞌ caꞌ le̱ꞌe̱ xixreꞌ laweꞌ lataj naꞌ,
27 ne gusiꞌe̱ bénneache chee̱ꞌ lu xel-laꞌ stuꞌ lau benneꞌ
xe̱zr la xu caꞌ,
ne guse dínnaje̱ꞌ le̱ꞌ ládujla benneꞌ xe̱zr la xu caꞌ.
28 Nadxa belune̱ꞌ tuze benneꞌ caꞌ dxulucáꞌana szrene̱ꞌ
bedáuꞌ xia nazí le na Baal-peor,
ne gulawe̱ꞌ béadu caꞌ belútie̱ꞌ lau dios gate caꞌ.
29 Buluche̱ꞌe̱ Dios ne̱ chee̱ da belune̱ꞌ,
naꞌ guxalaj tu xízrawe̱ꞌ zren da be̱te na benneꞌ zan benneꞌ caꞌ.
30 Nadxa guxasa Finees, ne be̱tie̱ꞌ bénneaꞌ be̱ne̱ꞌ dul-la,
naꞌ guleza xízrawe̱ꞌ zren naꞌ.
31 Da naꞌ be̱n Finees guzíꞌ Dios ca tu da dxucáꞌana xrlátaje na
bénneaꞌ,
da guléꞌe lawe na lau xúgute̱ cuen bénneache caꞌ.
32 Cáꞌanqueze buluché̱ꞌe̱ Dios dxuꞌa beaj nisa nazí le na
Meriba,
naꞌ guca da cale̱la chee̱ Moisés ne̱ chee̱ benneꞌ caꞌ,
33 laweꞌ da ne̱ chee̱ da belune̱ꞌ guca Moisés xichaj zraꞌa,
naꞌ bexúbete̱ Moisés da gunné̱ꞌ.
34 Gate guluꞌe̱ lu xe̱zr la xu nigá quebe buluzría xiꞌe̱
bénneache zaj nite̱ꞌ ga naꞌ.
Caní guca, quebe belune̱ꞌ ca da guzre Dios le̱ꞌ xelune̱ꞌ.
35 Gulaque̱ꞌ tuze benneꞌ xe̱zr la xu caꞌ,
ne bulusé̱die̱ꞌ benneꞌ Israel caꞌ xelune̱ꞌ ca dxelún benneꞌ caꞌ,
36 naꞌ bulucáꞌana szrene̱ꞌ bedáuꞌ xia xaga caꞌ chee̱ benneꞌ caꞌ,
da naꞌ be̱n na bxrinnaj Dios bénneache chee̱ꞌ.
37 Belútie̱ꞌ zríꞌine̱ꞌ bi biu, ne bi nuꞌula chee̱ꞌ
lau bedáuꞌ chee̱ da xriwe̱ꞌ caꞌ,
38 ne bululálaje̱ꞌ dxen chee̱ bi dxéꞌenedu caꞌ,
bi quebe zaj nunbeꞌ dul-la,
da naca na dxen chee̱ zríꞌine̱ꞌ bi biu, ne bi nuꞌula,
bi caꞌ belútie̱ꞌ lau bedáuꞌ xia xaga caꞌ chee̱ bénneache Canaán,
naꞌ guca sban xe̱zr la xu naꞌ ne̱ chee̱ dxen chee̱ bidu caꞌ.
39 Da caꞌ belune̱ꞌ be̱n na le̱ꞌ sban,
naꞌ gulebéaj xíchaje̱ꞌ Dios lu da belune̱ꞌ.
40 Chee̱ le̱ naꞌ bzráꞌale̱ꞌe̱ Dios bénneache chee̱ꞌ,
naꞌ gucuídene̱ꞌ benneꞌ caꞌ zaj naca chee̱ꞌ.
41 Nadxa bdee̱ꞌ benneꞌ caꞌ lu naꞌ benneꞌ xe̱zr la xu caꞌ,
naꞌ benneꞌ caꞌ dxelecuide bénneache chee̱ Dios
gulenná béꞌene̱ꞌ le̱ꞌ.
42 Benneꞌ caꞌ guledábague̱ꞌ le̱ꞌ bulusaca ziꞌe̱ bénneache
chee̱ Dios,
ne buluxrínnaje̱ꞌ le̱ꞌ lu xel-laꞌ dxenná bea chee̱ꞌ.
43 Zánete̱ lasa Dios bselé̱ꞌ bénneache chee̱ꞌ caꞌ,
san guledábague̱ꞌ ca da bsízrene̱ꞌ le̱ꞌ,
naꞌ gulape̱ꞌ xel-laꞌ stuꞌ laweꞌ da belune̱ꞌ da cale̱la.
44 Lácala caní belune̱ꞌ, gate gulezré̱ꞌe̱ lu da ste̱be,
Dios gunné̱ꞌe̱ ca da dxelezaque̱ꞌ,
ne benne̱ꞌ ca da bululáwizre̱ꞌ Le̱ꞌ,
45 naꞌ xeajsá lazre̱ꞌ xel-laꞌ wezría da bé̱nle̱ne̱ꞌ benneꞌ caꞌ,
naꞌ bexíaje lazre̱ꞌ chee̱ xel-laꞌ dxezráꞌa chee̱ꞌ
laweꞌ da nácale̱ꞌe̱ benneꞌ dxexache lazreꞌ.
46 Cáꞌanqueze be̱ne̱ꞌ belexache lazreꞌ benneꞌ caꞌ
benneꞌ caꞌ guleché̱ꞌe̱ le̱ꞌ ca benneꞌ zaj nadaꞌu.
47 ¡Bselá netuꞌ, Xránantuꞌ, nacuꞌ Dios chee̱ntuꞌ!
¡Becáꞌa netuꞌ ládujla benneꞌ xe̱zr la xu caꞌ,
chee̱ güe láꞌanantuꞌ Lauꞌ láꞌazxa,
ne chee̱ béle̱ꞌe̱ntuꞌ lu da dxúl-lantuꞌ chiuꞌ!
48 Cháwedauꞌ naca Xránadxu, Bénneaꞌ naque̱ꞌ Dios chee̱
benneꞌ Israel caꞌ nédxudaute̱, ne chadía chacanna.
Xúgute̱ bénneache dxal-laꞌ xelenné̱ꞌ: ¡Caꞌan gaca na!
¡Gaca ba láꞌazxa Xránadxu Dios!