105
¡Le güe láꞌana Xránadxu Dios!¡Le gucáꞌana szren La Le̱ꞌ!
¡Le guzén bénneache dute̱ xe̱zr la xu ca naca da nune̱ꞌ!
2 ¡Le gul-la chee̱ꞌ!
¡Le gul-la da güe láꞌanale Le̱ꞌ!
¡Le guchalaj chee̱ da zrente̱ caꞌ da nune̱ꞌ!
3 ¡Le be lu da naca chee̱ꞌ!
Xúgute̱ benneꞌ caꞌ dxelapa ba láꞌana Xránadxu dxal-laꞌ
xelebéle̱ꞌe̱ne̱ꞌ.
4 Le naba Xránadxu gácale̱ne̱ꞌ leꞌe.
Tu zra tu zra le guxrén lazreꞌ Xránadxu Dios.
5-6 Leꞌe, zriꞌine zre sua Abraham, we̱n zrin chee̱ Xránadxu.
Leꞌe, zriꞌine zre sua Jacob, bénneaꞌ guqué̱ꞌe̱,
Le gusá lazreꞌ xel-laꞌ waca caꞌ, ne da zrente̱ caꞌ da be̱ne̱ꞌ,
ne ca naca da bchiꞌe̱ chee̱le.
7 Le̱ꞌ naque̱ꞌ Xránadxu, ne Dios chee̱dxu.
Le̱ꞌ dxenná béꞌene̱ꞌ bénneache zaj zre̱ꞌe̱ dute̱ xe̱zr la xu.
8 Lácala te chee̱ chi gaxúa cuen bénneache,
québequeze gal-la lazre̱ꞌ da guche̱be lazre̱ꞌ
lu xel-laꞌ wezría chee̱ꞌ,
9 xel-laꞌ wezría naꞌ bé̱nle̱ne̱ꞌ Abraham,
da naꞌ bzetaj cuine̱ꞌ guche̱be lazre̱ꞌ chee̱ Isaac,
10 naꞌ bzua chúchue̱ꞌ na ca tu da nadxixruj bea na,
da gun Jacob,
da gaca na tu xel-laꞌ wezría da zeajlí canna nen
benneꞌ Israel caꞌ,
11 da be̱ne̱ꞌ gate naꞌ gunné̱ꞌ: “Chiuꞌ lueꞌ gunnaꞌ xe̱zr la xu chee̱
benneꞌ Canaán caꞌ,
da gaca na tu da xudele lu naꞌ zriꞌine zre súale.”
12 Gate naꞌ bábaze zaj naque̱ꞌ
gulezré̱ꞌe̱ lu xe̱zr la xu nigá ca benneꞌ zituꞌ caꞌ,
13 ne guledée̱ꞌ tu xe̱zr la xu xetú xe̱zr la xu, ne tu xe̱zre
xetú xe̱zre.
14 Quebe be̱ꞌ Dios lataj nu benneꞌ bi gune̱ꞌ chee̱
bénneache chee̱ꞌ,
naꞌ ne̱ chee̱ benneꞌ caꞌ gudil-le̱ꞌ benneꞌ wenná bea caꞌ.
15 Guzre̱ꞌ le̱ꞌ: “Quebe bi gunle chee̱ benneꞌ caꞌ gucáꞌa,
ne quebe gunle da cale̱la chee̱ benneꞌ caꞌ dxuluchalaje̱ꞌ
waláz chiaꞌ.”
16 Be̱ne̱ꞌ gutaꞌ tu gubinaꞌ lu xe̱zr la xu naꞌ,
naꞌ gudúe̱ꞌ ca naca xeta xelawe̱ꞌ.
17 Gusel-le̱ꞌ tu benneꞌ cuía lawe̱ꞌ lau benneꞌ chie̱ꞌ caꞌ,
bénneaꞌ naque̱ꞌ José, bi naꞌ belutie̱ꞌ-beꞌ chee̱ gácabeꞌ
we̱n zrin chee̱ benneꞌ zituꞌ.
18 Buluzré̱ꞌe̱ níꞌabeꞌ lu xe̱dxu chee̱ cuaga da be̱xru na níꞌabeꞌ,
gate naꞌ guluꞌe̱-beꞌ lizre xia lu xe̱zr la xu Egipto,
19 ca bzrin zra guca li ca da gunná José dxal-laꞌ gaca.
Caní guca, bleꞌe xrtizraꞌ Xránadxu cúnnabeꞌ da li.
20 Nadxa benneꞌ wenná bea chee̱ Egipto gusel-le̱ꞌ
nu gusán José naꞌ.
Bénneaꞌ dxenná béꞌene̱ꞌ zánete̱ cueꞌ xe̱zr la xu bsane̱ꞌ-beꞌ.
21 Bzue̱ꞌ-beꞌ gácabeꞌ xrana benneꞌ zaj zre̱ꞌe̱ lizre̱ꞌ,
ne chee̱ nna beꞌebeꞌ ca naca da xuꞌu lu ne̱ꞌe̱,
22 chee̱ tíl-labeꞌ benneꞌ szren caꞌ chee̱ wenná bea cáte̱ze
dxaca lázrebeꞌ,
ne chee̱ guzéajniꞌibeꞌ benneꞌ gula chee̱ xe̱zr la xu Egipto
chee̱ xelaque̱ꞌ benneꞌ sina.
23 Gudé naꞌ guluꞌe̱ benneꞌ Israel caꞌ lu xe̱zr la xu Egipto,
naꞌ guzúa Jacob lu xe̱zr la xu chee̱ zriꞌine zre sua Cam.
24 Gulánle̱ꞌe̱ bénneache chee̱ Xránadxu lu xe̱zr la xu naꞌ,
naꞌ be̱ne̱ꞌ gulaque̱ꞌ wál-ladxa ca benneꞌ guledábague̱ꞌ Le̱ꞌ.
25 Bcha Dios lázxdau benneꞌ Egipto caꞌ chee̱ xelecuídene̱ꞌ
bénneache chee̱ꞌ,
chee̱ xelegúꞌu lazre̱ꞌ xelune̱ꞌ da cale̱la chee̱ we̱n zrin chee̱ꞌ caꞌ.
26 Nadxa gusel-le̱ꞌ Moisés, we̱n zrin chee̱ꞌ, lau bénneache
chee̱ꞌ caꞌ, ne Aarón, bénneaꞌ guqué̱ꞌe̱.
27 Benneꞌ caní be̱ꞌe̱ Dios lataj belune̱ꞌ xel-laꞌ waca caꞌ
chee̱ xabáa,
ne xel-laꞌ waca zrente̱ caꞌ lu xe̱zr la xu chee̱ zriꞌine zre sua Cam.
28 Gusel-la Dios tu da chul-la da bgacu na dute̱ xe̱zr la xu naꞌ,
san benneꞌ Egipto caꞌ quebe buluzúe̱ꞌ dizraꞌ da gunná beꞌene̱ꞌ le̱ꞌ.
29 Nadxa be̱ne̱ꞌ bexaca nisa xe̱gu chee̱ benneꞌ caꞌ dxen,
ne be̱tie̱ꞌ xúgute̱ bela zaj zrabaꞌ xe̱gu caꞌ.
30 Busezrate̱ꞌ xe̱zr la xu chee̱ꞌ bluzru caꞌ ga bzrinte̱ gulezrabaꞌ
xuꞌu lizre benneꞌ wenná bea chee̱ benneꞌ Egipto caꞌ.
31 Gunnaze Dios, naꞌ beleláꞌ zánete̱ beꞌa chee̱ be̱zre,
ne beꞌa lase caꞌ dute̱ lu xe̱zr la xu chee̱ benneꞌ caꞌ.
32 Waláz chee̱ nisa xiuj gusel-le̱ꞌ xiaj bezxeꞌ lu xe̱zr la xu
chee̱ benneꞌ caꞌ,
ne xiꞌ da bzezxe na ca naca xe̱zr la xu chee̱ꞌ.
33 Bzria xiꞌe̱ ca zaj naca lba uva chee̱ꞌ, ne ca zaj naca xaga higo chee̱ꞌ,
naꞌ bzúzxuje̱ꞌ ca zaj naca xaga zaj ze̱ lu xe̱zr la xu chee̱ꞌ.
34 Gunnaze̱ꞌ, naꞌ beleláꞌ biche zu caꞌ,
da quebe nu sequeꞌ gulaba le̱baꞌ,
35 naꞌ gulágubaꞌ dute̱ xixreꞌ xaꞌa lu xe̱zr la xu chee̱ꞌ,
ne gulágubaꞌ dute̱ lina da dxunna xe̱zr la xu naꞌ.
36 Nadxa be̱tie̱ꞌ xúgute̱ bi biu nedxu chee̱ benneꞌ Egipto caꞌ,
bi zaj nácabe̱ꞌ bi blau chee̱ꞌ.
37 Bebéaje̱ꞌ bénneache chee̱ꞌ naꞌ zaj nuꞌe̱ dumí plata,
ne dumí oro,
naꞌ quebe nu chiláꞌ benneꞌ ládujla le̱ꞌ, benneꞌ quebe
chaweꞌ zue̱ꞌ.
38 Gulebé benneꞌ Egipto caꞌ gate beledxúaj benneꞌ caꞌ ga naꞌ,
laweꞌ da belezrébele̱ꞌe̱ le̱ꞌ.
39 Bzalaj Dios tu beuj da gulúꞌu na benneꞌ caꞌ zrul-la,
ne tu xiꞌ da bsaní na chee̱ꞌ chizrela.
40 Gulenabe̱ꞌ Dios, naꞌ gusel-le̱ꞌ chee̱ꞌ btau caꞌ,
ne be̱ne̱ꞌ gulélajene̱ꞌ xeta da bdxuaj na xabáa.
41 Gule̱ꞌe̱ tu xiaj xre, naꞌ gulaj nisa
da gudé na lu xe̱zr la xu bizre naꞌ ca tu xe̱gu nisa.
42 Caní be̱n Dios laweꞌ da bsa lazre̱ꞌ xrtizre̱ꞌ láꞌazxa
da guche̱be lazre̱ꞌ gune̱ꞌ chee̱ Abraham, we̱n zrin chee̱ꞌ.
43 Bebéaje̱ꞌ bénneache chee̱ꞌ lu xe̱zr la xu Egipto, dxelebene̱ꞌ.
Lu da ba neza gulezráꞌ benneꞌ caꞌ guqué̱ꞌe̱.
44 Bnézruje̱ꞌ benneꞌ caꞌ xe̱zr la xu chee̱ benneꞌ xezica caꞌ,
naꞌ da belún benneꞌ xe̱zr la xu caꞌ bexaca na chee̱ benneꞌ
chee̱ꞌ caꞌ,
45 chee̱ xulupáꞌane̱ꞌ ca naca xrba chee̱ꞌ caꞌ,
ne xelune̱ꞌ ca naca da gunná béꞌene̱ꞌ caꞌ.
¡Gaca ba láꞌazxa Xránadxu Dios!