104
Be̱ láꞌana Xránadxu Dios, lueꞌ, bénneꞌdu xuꞌa.¡Xranaꞌ Dios, szrente̱ nacuꞌ Lueꞌ!
Nacuꞌ zra lanuꞌ da xabáa, ne da xrtante̱.
2 Dxugacu cuinuꞌ xel-laꞌ naxaníꞌ ca zra lanuꞌ.
Dxechiljuꞌ xabáa ca tu xuꞌu ladxeꞌ chiuꞌ.
3 Nunuꞌ lizruꞌ laweꞌ nisa da ze̱ náꞌala.
Dxuchínenuꞌ beuj caꞌ ca tu da dxudé xua naga dxeꞌu Lueꞌ,
da dxedá na lu beꞌ.
4 Dxuchínenuꞌ beꞌ caꞌ ca gubáz chiuꞌ caꞌ,
ne xesa caꞌ ca we̱n zrin chiuꞌ caꞌ.
5 Bzua chuchuꞌ xe̱zr la xu nigá lu lane na,
naꞌ quebe nu gaca gutá le̱ na.
6 Bgacuꞌ xe̱zr la xu nigá nen nísadauꞌ ca dxun tu benneꞌ
dxacue̱ꞌ zra lane̱ꞌ,
naꞌ nisa naꞌ bgacu na xiꞌa caꞌ.
7 Gate gudil-luꞌ nisa naꞌ, naꞌ bzrunnuj na.
Bebiga na gate ben na chiꞌu zizraj.
8 Nisa naꞌ bgacu na xiꞌa caꞌ xajxedxé na dxuꞌa xe̱gu caꞌ,
lataj caꞌ ba nunuꞌ chee̱ nisa naꞌ.
9 Bzuꞌ naga ze lau cheajsé̱ na, naga québedxa gaca te na,
chee̱ québedxa gacu na xe̱zr la xu bizre naꞌ.
10 Dxunuꞌ beaj caꞌ dxelalaj na dxuꞌa xé̱gudu caꞌ,
ne xe̱gu caꞌ dxeledé na ládujla xiꞌa caꞌ.
11 Lu xe̱gu caꞌ dxeléꞌaj be̱ xixreꞌ caꞌ nisa,
naꞌ dxegúa na xel-laꞌ dxelebile chee̱ burro xixreꞌ caꞌ.
12 Lu xaga zaj nnita dxuꞌa xe̱gu caꞌ zaj zraꞌ béadu caꞌ
zaj zua xrila.
Dxelúl-labaꞌ ládujla zruze na caꞌ.
13 Zran xabáa dxesel-luꞌ xiuj da dxaca na lu xiꞌa caꞌ,
naꞌ dxezrate̱ xe̱zr la xu naꞌ ca naca da xrlátaje da dxunuꞌ.
14 Dxuseguluꞌ xixreꞌ da dxelagu be̱zre caꞌ,
ne xíxreꞌdu caꞌ da dxelagu bénneache,
ne da caꞌ dxuluchine bénneache dxelune̱ꞌ xel-laꞌ wagu,
15 ne uva caꞌ da dxelune̱ꞌ xrise uva wal-la da dxuzúa na
bénneache caꞌ xel-laꞌ dxelebé,
ne olivo caꞌ da dxelune̱ꞌ da za da dxelegúꞌe̱ xíchaje̱ꞌ,
ne zruaꞌ da dxelune̱ꞌ xeta chee̱ xelaca bane̱ꞌ.
16 Xaga cedro caꞌ da zaj zua na xiꞌa Líbano dxelezíle̱ꞌe̱ na nisa xiuj.
Zaj naca na xaga chee̱ Xránadxu Dios, da caꞌ guza Le̱ꞌ.
17 Lu xaga caꞌ dxuluzría bxínnedu caꞌ xrúꞌunebaꞌ,
naꞌ lu zruze na caꞌ zaj zua lizre bxuzeꞌ caꞌ.
18 Zaj zua chivo xiꞌa caꞌ lu xiꞌa zriꞌa caꞌ,
naꞌ lu bluaj caꞌ chee̱ xiꞌa caꞌ zaj zua bzrizruꞌ caꞌ.
19 Be̱nuꞌ beuꞌ da dxuléꞌe na tu beuꞌ tu beuꞌ chee̱ iza,
naꞌ gubizra núnbea na gate dxal-laꞌ cuía na.
20 Be̱nuꞌ dxe̱la, naꞌ gate bache nachul-la,
naꞌ dxeledxúaj be̱ dxe̱la caꞌ.
21 Dxelebezre xaꞌa be̱zre xixreꞌ caꞌ, zaj naubaꞌ be̱ xelágubaꞌ.
Dxelílajbaꞌ da nun Dios xelágubaꞌ.
22 Gate dxalaj gubizra, naꞌ dxelexezrinbaꞌ lu bluaj chee̱baꞌ,
naga dxelásebaꞌ te zra.
23 Nadxa dxeledxúaj bénneache dxelune̱ꞌ zrin,
naꞌ dxelúnqueze̱ꞌ zrin ca dxebía gubizra.
24 Xran, da zante̱ zaj naca da be̱nuꞌ.
Dute̱ xel-laꞌ sina chiuꞌ be̱nuꞌ da caꞌ.
Nazrate̱ xe̱zr la xu nigá da caꞌ be̱nuꞌ.
25 Naꞌ zua nísadauꞌ, da zriꞌa, ne da laga,
naga zaj xuꞌu zánete̱ bea caꞌ, béadu caꞌ, ne be̱ zriꞌa caꞌ.
26 Lu nísadauꞌ naꞌ zaj zraꞌ da dxeledá laweꞌ nísadauꞌ caꞌ.
Zua be̱ zriꞌa naꞌ be̱nuꞌ Lueꞌ, nazíꞌ labaꞌ leviatán.
27 Xúgute̱ bea caꞌ dxuluxrén lázrebaꞌ Lueꞌ,
chee̱ gunézrujuꞌ da xelágubaꞌ ca zrin chee̱ na.
28 Dxunézrujuꞌ le̱baꞌ, naꞌ dxelecáꞌabaꞌ na.
Dxunézrujuꞌ da dxelágubaꞌ, naꞌ dxeléljebaꞌ.
29 Gate quebe dxennáꞌu-baꞌ, naꞌ dxelezrébebaꞌ.
Gate dxucuasuꞌ beꞌ dxelecáꞌabaꞌ, naꞌ dxelátebaꞌ,
ne dxelexácabaꞌ xu xrte.
30 Gate dxesel-luꞌ beꞌ chiuꞌ, naꞌ xelexaca banbaꞌ.
Dxunézrujuꞌ xel-laꞌ nabán cube chee̱ da caꞌ zaj zua
xe̱zr la xu nigá.
31 ¡Chadía chacanna gaca ba Xránadxu Dios!
Dxezaca ba lazreꞌ Xránadxu chee̱ da caꞌ ba núnqueze̱ꞌ.
32 Dxenné̱ꞌe̱ xe̱zr la xu nigá, naꞌ dxezrúꞌ na.
Dxuté̱ꞌ xiꞌa caꞌ, naꞌ dxeledxúaj na zren.
33 Gúl-laquezaꞌ chee̱ Xránadxu dxácate̱ naꞌ naca banaꞌ.
Xúgute̱ zra zúaquezaꞌ nedaꞌ gul-laꞌ da güe láꞌanaꞌ Dios chiaꞌ.
34 Chaweꞌ naca chiaꞌ da caꞌ dxulaba lazraꞌ ca naca chee̱ꞌ,
naꞌ dxebéle̱ꞌe̱daꞌ ne̱ chee̱ Xranaꞌ Dios.
35 Welebía xiꞌ benneꞌ dul-la caꞌ zaj zre̱ꞌe̱ lu xe̱zr la xu nigá,
Naꞌ québedxa cha benneꞌ caꞌ dxelebéaj xíchaje̱ꞌ Dios.
¡Be̱ láꞌana Xránadxu Dios, lueꞌ, bénneꞌdu xuꞌa!
¡Le güe láꞌana Xránadxu!