103
Be̱ láꞌana Xránadxu Dios, lueꞌ, bénneꞌdu xuꞌa.Be̱ láꞌana Le̱ꞌ láꞌazxa, dute̱ da nacaꞌ.
2 Be̱ láꞌana Xránadxu, lueꞌ, bénneꞌdu xuꞌa,
ne quebe gal-la lazruꞌ ca da chaweꞌ da nune̱ꞌ chiuꞌ.
3 Dxunite lawe̱ꞌ chee̱ xúgute̱ dul-la nabagaꞌa.
Dxexune̱ꞌ nedaꞌ ca naca xúgute̱ xízrawe̱ꞌ da xuꞌa.
4 Dxuxúe̱ꞌ nedaꞌ chee̱ quebe gatiaꞌ.
Lu xel-laꞌ zriꞌi lazreꞌ chee̱ꞌ, ne xel-laꞌ dxexache lazreꞌ chee̱ꞌ
dxune̱ꞌ chaweꞌ chiaꞌ.
5 Dxuzánle̱ꞌe̱ da chaweꞌ da dxaca chiaꞌ chee̱ xegáꞌanaꞌ
benneꞌ cuideꞌ,
ne benneꞌ wal-la ca dxaca chee̱ tu bsia.
6 Xránadxu Dios dxuchiꞌe̱ chee̱ da dxaca chee̱ benneꞌ
dxeledée̱ꞌ da ba xaꞌ,
ne dxucáꞌana chawe̱ꞌ da dxaca chee̱ꞌ.
7 Bléꞌene̱ꞌ Moisés da caꞌ gulúꞌu lazre̱ꞌ gune̱ꞌ,
ne be̱ꞌe̱ lataj benneꞌ Israel caꞌ beleléꞌene̱ꞌ da caꞌ be̱ne̱ꞌ.
8 Naca Xránadxu Benneꞌ dxexache lazreꞌ, ne Benneꞌ zriꞌi lazreꞌ.
Quebe dxezráꞌazie̱ꞌ, san zrente̱ naca xel-laꞌ zriꞌi lazreꞌ chee̱ꞌ.
9 Quebe nníaqueze̱ꞌ, ne quebe zráꞌaqueze̱ꞌ.
10 Quebe dxudée̱ꞌ dxiꞌu lu da ba xaꞌ ca naca zria
da nabágadxu,
ne quebe ne guzría xiꞌe̱ dxiꞌu ne̱ chee̱ dul-la da nabágadxu.
11 Ca sibe naca xabáa laweꞌ xe̱zr la xu,
caníqueze naca xel-laꞌ zriꞌi lazreꞌ zren chee̱ꞌ nen benneꞌ caꞌ
dxelape̱ꞌ Le̱ꞌ ba láꞌana.
12 Ca zituꞌ naca naga dxalaj gubizra, ne naga dxebía na,
caníqueze dxucuase̱ꞌ zituꞌ dul-la da nabágadxu.
13 Ca zriꞌi lazreꞌ naca xra bidu caꞌ nen zríꞌinequeze̱ꞌ,
caníqueze naca zriꞌi lazreꞌ Xránadxu nen benneꞌ caꞌ
dxelape̱ꞌ Le̱ꞌ ba láꞌana.
14 Le̱ꞌ nézene̱ꞌ ca nácadxu lu be̱laꞌ dxen chee̱dxu.
Dxajsá lazre̱ꞌ nácadxu xu xrte.
15 Ca naca xel-laꞌ nabán chee̱dxu, nácadxu ca tu xixreꞌ.
Dxegúladxu ca tu xiaj xixreꞌ,
16 naꞌ dxedé beꞌ dxua na le̱ na, naꞌ dxexenite na,
naꞌ québedxa nu dxeléꞌequeze le̱ na.
17 Ca naca chee̱ benneꞌ caꞌ dxelape̱ꞌ ba láꞌana Xránadxu,
zúale̱ xel-laꞌ zriꞌi lazreꞌ chee̱ꞌ benneꞌ caꞌ chadía chacanna,
naꞌ xel-laꞌ xrlátaje chee̱ꞌ zúale̱queze na xúgute̱ zriꞌine zre sua
benneꞌ caꞌ,
18 benneꞌ caꞌ dxelúnqueze̱ꞌ ca naca xel-laꞌ wezría nune̱ꞌ,
ne benneꞌ caꞌ dxelune̱ꞌ ca zaj naca da nadxixruj beꞌe̱.
19 Nuzúa Xránadxu lataj chee̱ꞌ xabáa naga dxeꞌe̱ dxenná beꞌe̱.
Nácaqueze̱ꞌ Wenná Bea laweꞌ xúgute̱ da zaj zua.
20 Le güe láꞌana Xránadxu, leꞌe, gubáz chee̱ xabáa caꞌ,
Nácale benneꞌ wal-la, ne benneꞌ chúchule̱ꞌe̱,
naꞌ dxunle ca dxenná Le̱ꞌ, ne dxuzé̱ nágale ca dxe̱ꞌe̱ leꞌe.
21 Le güe láꞌana Xránadxu, leꞌe, dxenná beale xabáa.
Nácale we̱n zrin chee̱ꞌ, ne dxunle ca dxaca lazreꞌ Le̱ꞌ.
22 Le güe láꞌana Xránadxu, xúgute̱le leꞌe ba nun Dios leꞌe,
zrale xúgute̱ lataj naga dxenná bea Le̱ꞌ.
¡Be̱ láꞌana Xránadxu, lueꞌ, bénneꞌdu xuꞌa!