102
Xranaꞌ Dios, bene da dxenabaꞌ lauꞌ,ne bze̱ naga da dxuláwizraꞌ Lueꞌ.
2 Quebe gucache lauꞌ lawaꞌ nedaꞌ, laweꞌ da lu da ste̱be zuaꞌ.
Bze̱ naga nedaꞌ, ne beché̱beche chiaꞌ gate dxuláwizraꞌ Lueꞌ.
3 Naca xel-laꞌ nabán chiaꞌ ca zren chee̱ xiꞌ da dxexenítete̱.
Xuꞌu da la lu zrita chiaꞌ ca tu xiꞌ da dxálale̱ꞌe̱ na.
4 Dxedú lazraꞌ, ne naca lázrdawaꞌ ca tu xixreꞌ da dxecuade,
naꞌ québedxa dxenná na gudagu xeta.
5 Laweꞌ da dxebezre wé̱ꞌle̱ꞌa ba nazrítale̱ꞌa.
6 Nacaꞌ ca tu situgún dxedabaꞌ tu lu xe̱zr la xu bizre,
ne ca tu bzriu zríabaꞌ laweꞌ tu xuꞌu ze laꞌa.
7 Dxíchajaꞌ bchigala, ne nacaꞌ ca tu bxinne zríabaꞌ túzebaꞌ
xrguꞌu sibe.
8 Tu zra tu zra tu dxulucháchale̱zqueze benneꞌ
dxeledábague̱ꞌ nedaꞌ.
Benneꞌ caꞌ dxelecuídene̱ꞌ nedaꞌ dxuluchínene̱ꞌ laꞌ nedaꞌ
gate nu benneꞌ dxelegúꞌe̱ deꞌ.
9 Lu waláz chee̱ xeta dxawaꞌ de,
naꞌ nisa dxebezraꞌ dxechixre na da dxéꞌajaꞌ.
10 Caní dxaca chiaꞌ laweꞌ da dxezraꞌu nedaꞌ,
ne dxecuídenuꞌ nedaꞌ.
Gucaꞌu nedaꞌ, naꞌ gudxúꞌunuꞌ nedaꞌ.
11 Naca xel-laꞌ nabán chiaꞌ ca tu zrul-la da dxedeze,
naꞌ nacaꞌ ca tu xixreꞌ da ba nabizre.
12 Lueꞌ, Xranaꞌ Dios, tu chíꞌizqueze zuꞌ,
naꞌ cheajlesá lazreꞌ xúgute̱ cuen bénneache Lauꞌ.
13 Chasuꞌ, ne xexache lazruꞌ benneꞌ zaj zre̱ꞌe̱ xe̱zre Sión,
laweꞌ da ba bzrin zra xexache lazruꞌ benneꞌ caꞌ.
14 Netuꞌ, we̱n zrin chiuꞌ, nazríꞌintuꞌ xiaj caꞌ chee̱ xe̱zre naꞌ.
Dxéquentuꞌ ziꞌ laweꞌ da ba nabía xi na.
15 Nadxa benneꞌ xe̱zr la xu caꞌ xelezrebe̱ꞌ lau Lueꞌ, Xran.
Xelezrebe xúgute̱ benneꞌ wenná bea chee̱ xe̱zr la xu nigá
da xabáa chiuꞌ,
16 gate ba bechisuꞌ xe̱zre Sión, Xran,
ne xeleléꞌequezne̱ꞌ ca naca da xabáa chee̱ na,
17 gate naꞌ guzé̱ naguꞌ da dxelenaba benneꞌ caꞌ guleaj xíchajuꞌ,
ne québedxa guzúꞌ chaláꞌala da dxelataꞌ xuene̱ꞌ Lueꞌ.
18 Xuaj da nigá chee̱ xululaba benneꞌ caꞌ za záꞌaca,
naꞌ benneꞌ caꞌ za xelalaj xelúe láꞌane̱ꞌ Xránadxu Dios.
19 Naga zua Xránadxu xabáa gunné̱ꞌe̱.
Naga zue̱ꞌ xabáa bléꞌene̱ꞌ lu xe̱zr la xu nigá.
20 Dxeléꞌene̱ꞌ benne̱ꞌ dxelebezre xacheꞌ, benneꞌ zaj xuꞌe̱
lizre xia,
naꞌ gusane̱ꞌ benneꞌ caꞌ ba zaj nachugue̱ꞌ chee̱ꞌ xelatie̱ꞌ.
21 Xuluzenne̱ꞌ benneꞌ zaj zre̱ꞌe̱ xe̱zre Sión ca szren naca
La Xránadxu Dios,
chee̱ xelúe láꞌane̱ꞌ Le̱ꞌ lu xe̱zre Jerusalén,
22 gate xelezraga bénneache chee̱ xúgute̱ xe̱zre, ne xúgute̱ cueꞌ
xe̱zr la xu
chee̱ xulucáꞌana szrene̱ꞌ Xránadxu Dios.
23 Xránadxu Dios be̱ne̱ꞌ gute niꞌa naꞌa gate ne nacaꞌ cuideꞌ.
Xeláteze ca be̱tie̱ꞌ nedaꞌ.
24 Nadxa gunníaꞌ: Dios chiaꞌ, quebe gutiuꞌ nedaꞌ,
gate quebe ne gué̱xruaꞌ.
Lueꞌ tu chíꞌizqueze zuꞌ.
25 Nédxudaute̱ Lueꞌ bzuꞌ xe̱zr la xu nigá, naꞌ nen naꞌu
be̱nuꞌ xabáa.
26 Xelebía xiꞌ da caꞌ, san tu zúazquezuꞌ Lueꞌ.
Welexru xúgute̱ da caꞌ ca tu ladxeꞌ.
Ca dxuchadxu zra lánadxu tuzruj, caꞌ guchaꞌu da caꞌ,
naꞌ xucúbeuꞌ na.
27 Túzqueze ca nacuꞌ Lueꞌ,
ne québequeze te chiuꞌ Lueꞌ.
28 Zríꞌinentuꞌ netuꞌ, we̱n zrin chiuꞌ, xelezrabeꞌ chaweꞌ,
naꞌ guzé̱ chúchuquezuꞌ zriꞌine zre súantuꞌ lau Lueꞌ.