91
Bénneaꞌ dxuxrén lazre̱ꞌ Xránadxu Dios chee̱ guxúe̱ꞌ le̱ꞌ,ne dxuzúe̱ꞌ Dios, Bénneaꞌ nape̱ꞌ dute̱ xel-laꞌ waca,
chee̱ gácale̱ne̱ꞌ le̱ꞌ,
2 waca xe̱ꞌe̱ Dios: Nacuꞌ Bénneaꞌ dxebeza lazraꞌ,
ne Bénneaꞌ dxucache chawe̱ꞌ nedaꞌ.
Nacuꞌ Dios chiaꞌ, naꞌ dxuxrén lazraꞌ Lueꞌ.
3 Dios gucache chawe̱ꞌ lueꞌ lu xúgute̱ da ste̱be da quebe zaj naláꞌ,
ne lu xúgute̱ xízrawe̱ꞌ da dxelute na bénneache.
4 Gucache chawe̱ꞌ lueꞌ ca dxun tu bedxuj dxé̱zrebaꞌ biadu chee̱baꞌ zran xrílabaꞌ, naꞌ chuꞌu chawuꞌ lu naꞌ Le̱ꞌ.
Xel-laꞌ li lazreꞌ chee̱ꞌ gácale̱ na lueꞌ, ne gucache chawe na lueꞌ.
5 Quebe bi guchebe lueꞌ chizrela, ne quebe bi da ste̱be te zra,
6 ne quebe bi xízrawe̱ꞌ chee̱ da chul-la,
ne quebe bi da cale̱la caꞌ da dxelute na bénneache te zra.
7 Welate chi gaxúa bénneache cuituꞌ lueꞌ,
ne gaxúa gaxúa bénneache gáguze naga zuꞌ,
san quebe bi sacuꞌ lueꞌ.
8 Wannaꞌu, naꞌ waléꞌenuꞌ
ca ba xaꞌ xeledé benneꞌ caꞌ dxelune̱ꞌ da cale̱la.
9 Nuzúꞌ Xránadxu Dios ca Benneꞌ dxebeza lazruꞌ, ne Dios,
Bénneaꞌ nape̱ꞌ dute̱ xel-laꞌ waca, chee̱ gucache chawe̱ꞌ lueꞌ.
10 Chee̱ le̱ naꞌ quebe bi da cale̱la gaca na chiuꞌ,
ne quebe bi xízrawe̱ꞌ chuꞌu na lizruꞌ.
11 Dios gusebague̱ꞌ gubáz chee̱ xabáa chee̱ꞌ caꞌ chee̱ xelácale̱ne̱ꞌ lueꞌ,
naꞌ xuluxúe̱ꞌ lueꞌ gátete̱ze chéajuꞌ.
12 Xeluxre̱ꞌ lueꞌ lu ne̱ꞌe̱ chee̱ quebe gaꞌa xiaj niꞌu.
13 Guléajquezuꞌ be̱zre xixreꞌ caꞌ, ne be̱laꞌ caꞌ,
be̱zre xixreꞌ schanníꞌ caꞌ, ne be̱ snia caꞌ.
14 Dxenná Dios: “Guseláꞌ xúgute̱ benneꞌ caꞌ zaj
nazríꞌine̱ꞌ nedaꞌ,
ne gucache chawaꞌ benneꞌ caꞌ dxelexeche̱be̱ꞌ nacaꞌ Xrane̱ꞌ.
15 Gate xelenné̱ꞌ nedaꞌ, naꞌ xeche̱baꞌ chee̱ꞌ.
Gate zaj xuꞌe̱ lu da ste̱be, súale̱quezaꞌ le̱ꞌ.
Guseláꞌ le̱ꞌ, ne gunaꞌ le̱ꞌ ba láꞌana.
16 Gunaꞌ xelaca bane̱ꞌ zánete̱ iza, ne guseláꞌ le̱ꞌ.”