90
Xránantuꞌ Dios, ba cua ba cua,Lueꞌ nacuꞌ ca tu xuꞌu naga zra cháwentuꞌ.
2 Nédxudaute̱ ca za gunuꞌ xiꞌa zriꞌa caꞌ,
ne ca za sua xe̱zr la xu, ne bénneache,
naꞌ nédxudaute̱, ne lu da za zaꞌ nácaquezuꞌ Lueꞌ Dios.
3 Dxuꞌu bénneache xelexaque̱ꞌ da gulaque̱ꞌ,
dxelexaque̱ꞌ xu xrte.
4 Chiuꞌ Lueꞌ chi gaxúa iza zaj naca na ca neaje, da ba gudé na,
ne ca tu chíꞌidauꞌze chizrela.
5 Dxegúꞌ bénneache ca dxun gubaꞌu,
da dxua na xúgute̱ xizre laga caꞌ.
Zaj naque̱ꞌ ca tu bchigala da dxexenite na gate dxexebandxu.
6 Zaj naque̱ꞌ ca tu xixreꞌ da dxegula na che zílala.
Dxegula na, ne dxeláꞌte̱ na xiaj,
naꞌ xelateꞌ zua gubizra dxelechugue̱ꞌ na, naꞌ dxebizre na.
7 Dxebía xiꞌntuꞌ laweꞌ da dxezraꞌu netuꞌ.
Sté̱bele̱ꞌe̱ zúantuꞌ laweꞌ da dxezráꞌle̱ꞌu netuꞌ.
8 Dxennaꞌu ca da cale̱la da nuntuꞌ.
Dxuléꞌenuꞌ láwela zria da nabágantuꞌ.
9 Dxuzáchiuꞌ iza chee̱ntuꞌ laweꞌ da dxezraꞌu netuꞌ.
Dxelexedú iza chee̱ntuꞌ ca tu beꞌ da dxecáꞌantuꞌ.
10 Ca zaj naca zra naca bantuꞌ, zaj naca na ga xun chi iza,
naꞌ che nácantuꞌ benneꞌ wal-la, waca bantuꞌ du tápalalaj iza,
san ca zaj naca iza caꞌ, dxedentuꞌ xel-laꞌ ziꞌ,
ne dxéquentuꞌ ze̱de.
Chadí dxeledé iza caꞌ, naꞌ xenítentuꞌ.
11 ¿Nuzra núnbea xanneꞌ ca naca xel-laꞌ dxezráꞌa chiuꞌ?
¿Nuzra núnbea ca naca xel-laꞌ xichaj zraꞌa chiuꞌ?
12 Bleꞌe netuꞌ ca láteze zaj naca zra chee̱ntuꞌ
chee̱ gácantuꞌ benneꞌ dxeléajniꞌine̱ꞌ.
13 Xran, bexaca netuꞌ tuze.
¿Bátadxa chenuꞌ?
Bexache lazreꞌ netuꞌ, we̱n zrin chiuꞌ.
14 Tu tu zila bzua xichaj lázrdauntuꞌ xel-laꞌ zriꞌi lazreꞌ chiuꞌ,
naꞌ dute̱ xel-laꞌ dxebé tu gul-lazquezentuꞌ chiuꞌ
xúgute̱ zra naca bantuꞌ.
15 Be̱nna netuꞌ zaneꞌ iza chee̱ bentuꞌ ca zaj naca iza
bsaca ziꞌu netuꞌ,
ne ca zaj naca iza guzúantuꞌ lu da ste̱be.
16 Be̱ lataj netuꞌ, we̱n zrin chiuꞌ, leꞌentuꞌ da zrente̱ da dxunuꞌ,
ne xeleléꞌe zriꞌine zre suantuꞌ da xabáa chiuꞌ.
17 Xránantuꞌ Dios, be̱n gaca chee̱ntuꞌ da chaweꞌ chiuꞌ.
Be̱n chepe ban ca naca zrin dxuntuꞌ.
Aweꞌ, Xran, be̱n chepe ban ca naca zrin dxuntuꞌ.