89
Tu gúl-lazquezaꞌ chee̱ xel-laꞌ zriꞌi lazreꞌ chiuꞌ, Xran.Guzendaꞌ tu cuen tu cuen zriꞌine zre súantuꞌ nacuꞌ li lazreꞌ.
2 Nezdaꞌ tu súazqueze xel-la zriꞌi lazreꞌ chiuꞌ,
ne chadía chacanna zua xel-la li lazreꞌ chiuꞌ,
cáte̱ze zúaqueze xabáa.
3 Lueꞌ gunnáuꞌ: “Be̱naꞌ xel-la wezría nen bénneaꞌ ba gucáꞌa.
Guche̱be lazraꞌ chee̱ David, we̱n zrin chiaꞌ,
4 gunniaꞌ: Gunaꞌ tu cházqueze zriꞌine zre suꞌ.
Gunaꞌ xelenná beꞌe̱ tu chíꞌizqueze lu waláz chiuꞌ.”
5 Benneꞌ zaj zraꞌ xabáa dxelúe láꞌane̱ꞌ Lueꞌ,
ne̱ chee̱ da zrente̱ caꞌ da dxunuꞌ, Xran,
ne ne̱ chee̱ xel-laꞌ li lazreꞌ chiuꞌ, naga zaj nazrague̱ꞌ.
6 Quebe nu zua xabáa, benneꞌ naque̱ꞌ ca Lueꞌ, Xran.
Quebe nu zua benneꞌ szrente̱, benneꞌ naque̱ꞌ ca Lueꞌ.
7 Benneꞌ zaj zraꞌ xabáa dxelape̱ꞌ Dios ba láꞌana,
naꞌ xúgute̱ benneꞌ caꞌ zaj nazraga chee̱ꞌ dxelezrebe̱ꞌ Le̱ꞌ.
8 Xran, nacuꞌ Dios chee̱ benneꞌ zante̱, benneꞌ zaj zraꞌ xabáa.
Quebe nu zua, benneꞌ naque̱ꞌ ca Lueꞌ, Xran.
Nacuꞌ Benneꞌ wál-late̱, ne tu nácazquezuꞌ li lazreꞌ.
9 Xuꞌu lu naꞌu xeajxruza zren chee̱ nísadauꞌ.
Gate dxelasa xeajxruza caꞌ Lueꞌ dxebeque zriuꞌ na.
10 Bchúchujuꞌ benneꞌ Egipto caꞌ, naꞌ belexegáꞌane̱ꞌ
ca tu da gate.
Be̱se dínnajuꞌ benneꞌ caꞌ dxeledábague̱ꞌ lueꞌ nen naꞌu wál-late̱.
11 Chiuꞌ Lueꞌ naca xabáa, ne chiuꞌ Luéꞌqueze naca xe̱zr la xu.
Be̱nuꞌ xe̱zr la xu nigá, ne da caꞌ zaj nnita lawe na.
12 Be̱nuꞌ da de̱ chaláꞌa naga zaꞌ beꞌ zaga,
ne da de̱ chaláꞌa naga dxedé gubizra beuꞌ zaga caꞌ.
Xel-la dxelebé dxelul-la chiuꞌ xiꞌa Tabor, ne xiꞌa Hermón.
13 Benneꞌ wál-late̱ nacuꞌ Lueꞌ.
Da zrente̱ naca xel-la waca chiuꞌ, ne nagáꞌana szren na.
14 Lu da xrlátaje, ne lu da li lazreꞌ dxenná beꞌu.
Lu xel-la zriꞌi lazreꞌ, ne lu da li lazreꞌ zaj zua ca da dxunuꞌ.
15 Ba neza zrente̱ naca na chee̱ benneꞌ caꞌ dxelul-le̱ꞌ
da dxue láꞌana na Lueꞌ,
ne zaj zue̱ꞌ lu xel-la naxaníꞌ chiuꞌ, Xran.
16 Ne̱ chiuꞌ Lueꞌ dxelebéle̱ꞌe̱ne̱ꞌ du zra,
ne dxulucáꞌana szrene̱ꞌ Lueꞌ ca naca da xrlátaje chiuꞌ.
17 Luéꞌqueze nacuꞌ xel-la wal-la chee̱ benneꞌ caꞌ,
ne xel-la xrtan chee̱ꞌ.
Dxúnnadxuꞌ netuꞌ xel-laꞌ waca laweꞌ da caꞌ dxéquenuꞌ xrlátaje.
18 Xránadxu Dios dxucuꞌuje̱ꞌ dxiꞌu,
naꞌ Dios láꞌazxa chee̱ benneꞌ Israel caꞌ naque̱ꞌ
Wenná Bea chee̱dxu.
19 Nédxudaute̱ bchálajuꞌ lu da bléꞌenuꞌ benneꞌ
we̱n zrin chiuꞌ caꞌ, benneꞌ zaj naque̱ꞌ li lazreꞌ, gunnáuꞌ:
Ba gucáꞌa tu benneꞌ wal-la ládujla bénneache chiaꞌ,
ne ba bzuaꞌ le̱ꞌ gaque̱ꞌ wenná bea, ne dxácale̱naꞌ le̱ꞌ.
20 Ba gucáꞌa David, we̱n zrin chiaꞌ.
Bzúaquezaꞌ le̱ꞌ gaque̱ꞌ wenná bea.
21 Nedaꞌ tu gácale̱zquezaꞌ le̱ꞌ.
Xel-la waca chiaꞌ gutípaquezaꞌ lazre̱ꞌ.
22 Benneꞌ caꞌ guledábague̱ꞌ Le̱ꞌ quebe xelezéquene̱ꞌ
bi xelune̱ꞌ chee̱ꞌ,
naꞌ benneꞌ caꞌ dxelune̱ꞌ da cale̱la quebe xelezéquene̱ꞌ
xuluchúchuje̱ꞌ le̱ꞌ.
23 Guchúchujquezaꞌ benneꞌ dxeledábague̱ꞌ Le̱ꞌ, ne gucuasaꞌ
benneꞌ caꞌ lau le̱ꞌ.
Gunaꞌ we̱ꞌ benneꞌ caꞌ dxelecuídene̱ꞌ le̱ꞌ.
24 Tu zríꞌizquezaꞌ le̱ꞌ, ne gacaꞌ li lazreꞌ nen le̱ꞌ,
naꞌ ne̱ chiaꞌ nedaꞌ gápadxe̱ꞌ xel-laꞌ wal-la.
25 Gunaꞌ nna beꞌe̱ dute̱ dxuꞌa nísadauꞌ zren,
ne dute̱ dxuꞌa xe̱gu Eufrates.
26 Le̱ꞌ xe̱ꞌe̱ nedaꞌ: “Lueꞌ nacuꞌ Xraꞌ.
Nacuꞌ Dios chiaꞌ, dxucuꞌujuꞌ nedaꞌ, ne dxuseláuꞌ nedaꞌ.”
27 Nedaꞌ guzúaꞌ le̱ꞌ ca zriꞌinaꞌ blau,
naꞌ nna béꞌene̱ꞌ xúgute̱ benneꞌ wenná bea zaj zre̱ꞌe̱
lu xe̱zr la xu.
28 Tu chíꞌizqueze nuzúaꞌ chee̱ꞌ xel-laꞌ zriꞌi lazreꞌ chiaꞌ,
naꞌ ca naca xel-laꞌ wezría chiaꞌ gaca líqueze na nen le̱ꞌ.
29 Gunaꞌ tu cházqueze zriꞌine zre sue̱ꞌ,
naꞌ xelenná beꞌe̱ lu waláz chee̱ꞌ dxácate̱ ne zua xabáa.
30 Che xulusán zriꞌine zre sua David da nadxixruj beꞌa,
ne che quebe xelune̱ꞌ ca da nuchiꞌa chee̱ꞌ,
31 ne che xelecuase̱ꞌ lu da dxenná beꞌa,
ne che quebe xelune̱ꞌ ca da dxapaꞌ le̱ꞌ,
32 naꞌ guꞌa le̱ꞌ zrise laweꞌ da dxeledábague̱ꞌ nedaꞌ,
ne quinaꞌ le̱ꞌ xide laweꞌ da dxelune̱ꞌ da cale̱la.
33 Quebe gusanaꞌ ca nazríꞌidaꞌ David,
ne quebe gusanaꞌ gacaꞌ li lazreꞌ nen le̱ꞌ,
34 ne quebe gal-la lazraꞌ xel-laꞌ wezría da nunaꞌ,
ne quebe gucháꞌa ca da ba gunníaꞌ.
35 Tu lásaze bzetaj cuinaꞌ guche̱be lazraꞌ,
naꞌ cabataꞌ gun lazraꞌ chee̱ David,
36 gunniaꞌ: Tu cházqueze zriꞌine zre sue̱ꞌ,
naꞌ xelenná beꞌe̱ lu waláz chee̱ꞌ lawaꞌ nedaꞌ
dxácate̱ ne zua gubizra.
37 Xel-laꞌ dxenná bea chee̱ꞌ tu sua chúchuzqueze na
ca zua beuꞌ zran xabáa.
Tu sua chúchuzqueze na dxácate̱ ne zua xabáa.
38 Lueꞌ, Dios, guleaj xíchajuꞌ, ne bzuꞌ chaláꞌala bénneaꞌ gucaꞌu,
ne dxezráꞌle̱ꞌu le̱ꞌ.
39 Nuzúꞌ chaláꞌala xel-laꞌ wezría bé̱nle̱nuꞌ David,
we̱n zrin chiuꞌ,
ne nucáꞌana dítajuꞌ xel-laꞌ dxenná bea chee̱ꞌ.
40 Nuxrínnajuꞌ zeꞌe da naxechaj na xe̱zre zréntauꞌ chee̱ꞌ,
ne nuzría xiꞌu ca naca lataj wal-la chee̱ꞌ chee̱ wedil-la.
41 Xúgute̱ bénneache, benneꞌ dxeledaze ga naꞌ dxelebane̱ꞌ
chee̱ da zaj de̱ chee̱ꞌ,
naꞌ benneꞌ xe̱zre walízr chee̱ꞌ dxelún le̱ꞌ chee̱ꞌ.
42 Ba be̱nuꞌ bedxúaj chaweꞌ benneꞌ guledábague̱ꞌ Le̱ꞌ,
naꞌ dxelebéle̱ꞌe̱ne̱ꞌ.
43 Be̱n dítajuꞌ da caꞌ dxuchínene̱ꞌ lu wedil-la,
ne quebe gúcale̱nuꞌ le̱ꞌ lu wedil-la naꞌ.
44 Ba gudúꞌ ca naca da xrtante̱ chee̱ꞌ,
ne nucáꞌana dítajuꞌ xel-laꞌ dxenná bea chee̱ꞌ.
45 Be̱nuꞌ naque̱ꞌ ca tu benneꞌ gula gate ne zue̱ꞌ iza cuideꞌ chee̱ꞌ,
ne bsiꞌu le̱ꞌ xel-laꞌ stuꞌ.
46 Xranaꞌ Dios, ¿bátaqueze quebe xennuꞌ chee̱ntuꞌ?
¿Tu chíꞌizqueze dxezráꞌaquezuꞌ netuꞌ?
47 Bsa lazreꞌ látega suaꞌ lu xe̱zr la xu.
Látega nunuꞌ xel-laꞌ nabán chee̱ xúgute̱ bénneache.
48 Quebe zua nu benneꞌ gaca bane̱ꞌ tu chíꞌizqueze.
Xúgute̱ꞌ xelatie̱ꞌ.
Quebe zua nu benneꞌ le̱ꞌ lu naꞌ xel-laꞌ gute.
49 Xran, ¿ba bsanuꞌ David, ne québedxa nazríꞌinuꞌ le̱ꞌ,
ca bzetaj cuinuꞌ guche̱be lazruꞌ zríꞌiquezenuꞌ le̱ꞌ?
50 Gunnáꞌ xque, Xran, ca dxelún le̱ꞌ chiaꞌ nedaꞌ,
we̱n zrin chiuꞌ,
ne ca dxuchaga lawaꞌ da dxelún lala benneꞌ xúgute̱ xe̱zr la xu
chiaꞌ nedaꞌ.
51 Benneꞌ caꞌ dxeledábague̱ꞌ lueꞌ dxulucáꞌana dítaje̱ꞌ
bénneaꞌ gucaꞌu Lueꞌ, Xran.
Dxulucáꞌana dítaje̱ꞌ le̱ꞌ gátete̱ze zéaje̱ꞌ.
52 Ba neza zrente̱ gaca Xránadxu Dios chadía chacanna.
Caꞌ naca na, ne caꞌ gaca na.