88
Xran, nacuꞌ Dios dxuseláuꞌ nedaꞌ.Te zra, ne chizrela dxuláwizraꞌ Lueꞌ.
2 Bene da dxuchálajle̱naꞌ Lueꞌ,
ne bze̱ naga da dxuláwizraꞌ Lueꞌ.
3 Dxedú lazraꞌ lu da cale̱la caꞌ da dxaca na chiaꞌ,
ne ba zuaꞌ gatiaꞌ.
4 Dxeleque bénneache nedaꞌ ca tu benneꞌ gate,
laweꞌ da dxátele̱ꞌe̱ niꞌa naꞌa.
5 Nagáꞌanaꞌ cáꞌaze ládujla benneꞌ gate.
Nacaꞌ ca benneꞌ gulátie̱ꞌ lu wedil-la, ne zaj de̱ꞌ xe̱dxu ba caꞌ,
benneꞌ caꞌ québedxa dxajsá lazruꞌ, Dios,
ne québedxa zaj xuꞌe̱ lu naꞌu Lueꞌ.
6 Dxaca chiaꞌ cáte̱ze ba nuzúꞌ nedaꞌ tu xe̱dxu zren
naga naca chul-la, ne nácale̱ꞌe̱ situj.
7 Dxéquedaꞌ dxezráꞌle̱ꞌu nedaꞌ.
Da dxaca chiaꞌ naca na ca dxaziaꞌ zran xeajxruza zriꞌa
chee̱ nísadauꞌ.
8 Be̱nuꞌ belexebiga bi ljwezraꞌ caꞌ naga zuaꞌ.
Be̱nuꞌ nedaꞌ ca tu da dxusegute na benneꞌ caꞌ.
Nacaꞌ ca tu benneꞌ xuꞌe̱ lizre xia ne quebe gaca xedxúaje̱ꞌ.
9 Dxelechul-la xiaj lawaꞌ ne̱ chee̱ da dxezí dxezacaꞌ.
Xúgute̱ zra dxuláwizraꞌ Lueꞌ, Xranaꞌ Dios.
Dxechisa naꞌa lau Lueꞌ.
10 ¿Dxúnquezuꞌ xel-laꞌ waca chee̱ xabáa dxácale̱nuꞌ
benneꞌ gate caꞌ?
¿Dxelexasa benneꞌ gate caꞌ dxelúe láꞌane̱ꞌ Lueꞌ?
11 ¿Dxuluchalaj benneꞌ zaj nagache̱ꞌ lu xe̱dxu ba chee̱
xel-la zriꞌi lazreꞌ chiuꞌ,
naꞌ dxuluchalaj chee̱ da li lazreꞌ chiuꞌ benneꞌ zaj xuꞌe̱
lataj chul-la chee̱ benneꞌ gate caꞌ?
12 ¿Welexúnbea benneꞌ zaj xuꞌe̱ lataj chul-la naꞌ ca
naca da zrente̱ da dxunuꞌ,
naꞌ welexúnbea benneꞌ zaj xuꞌe̱ naga quebe nu dxajsá lazreꞌ le̱ꞌ
ca nacuꞌ xrlátaje?
13 Nedaꞌ dxuláwizraꞌ Lueꞌ, Xranaꞌ Dios.
Xúgute̱ zila dxezrín lauꞌ da dxenabaꞌ Lueꞌ.
14 ¿Bizr chee̱ naꞌ dxebéaj xíchajuꞌ nedaꞌ, Xran?
¿Bizr chee̱ naꞌ quebe dxennáꞌu nedaꞌ chee̱ gácale̱nuꞌ nedaꞌ?
15 Dxezí dxezacaꞌ, ne ba zuaꞌ gatiaꞌ.
Nácateaꞌ bi cuídeꞌte̱ dxedéaꞌ xel-laꞌ ziꞌ da dxudeuꞌ nedaꞌ,
naꞌ dxedú lazraꞌ.
16 Dxéquedaꞌ dxezráꞌle̱ꞌu nedaꞌ.
Da dxuchebuꞌ nedaꞌ ba bsedú na lazraꞌ.
17 Zaj naxechaj da caní nedaꞌ du zra.
Dxulusaca zi na nedaꞌ gátete̱ze naꞌ.
18 Be̱nuꞌ belexebiga bi ljwezraꞌ caꞌ naga zuaꞌ,
naꞌ tuze da naca chul-la dxedále̱ na nedaꞌ.