92
Chaweꞌ naca dxue láꞌanantuꞌ Lueꞌ, Xranaꞌ Dios,ne gúl-lantuꞌ da dxucáꞌana szren na Lueꞌ, Dios szrente̱.
2 Chaweꞌ naca dxuzénentuꞌ bénneache tu zra tu zra
ca dxexache lazruꞌ netuꞌ,
naꞌ dxe̱la dxuléꞌentuꞌ nacuꞌ li lazreꞌ.
3 Dxúl-lantuꞌ da caní, dxínnentuꞌ da dxúl-lale̱ntuꞌ
da ze̱ chi du chee̱ na,
ne dxínnentuꞌ da con zríadiꞌi na du da dxenné̱le̱ꞌe̱ xrtandauꞌ.
4 Xranaꞌ Dios, ne̱ chee̱ da dxunuꞌ Lueꞌ, dxunuꞌ dxebéle̱ꞌe̱daꞌ.
Ca zaj naca da nun naꞌu zuaꞌ lu da ba neza.
5 Da zrente̱ zaj naca da nunuꞌ, Xranaꞌ Dios.
Da zrénle̱ꞌe̱ zaj naca da dxugúꞌu lazruꞌ gunuꞌ.
6 Québequeze neze benneꞌ lázxdau zideꞌ,
ne quebe dxéajniꞌi benneꞌ xala ca naca da nigá.
7 Gate dxelegula benneꞌ dxelebéaj xíchaje̱ꞌ Dios
ca dxegula xixreꞌ,
ne dxe̱pe ban da dxelún benneꞌ we̱n da zrinnaj,
naca na chee̱ xelebía xiꞌe̱ tu chíꞌizqueze.
8 Lueꞌ, Xranaꞌ Dios, tu nácazquezuꞌ Dios szrente̱.
9 Dxunna bea na ca gaca chee̱ benneꞌ dxedábague̱ꞌ Lueꞌ,
Xranaꞌ Dios.
Dxunna bea na xelebía xiꞌ benneꞌ caꞌ dxeledábague̱ꞌ Lueꞌ.
Xelase dinnaj xúgute̱ benneꞌ caꞌ dxelune̱ꞌ da zrinnaj.
10 Lueꞌ dxunuꞌ dxezrendxa xel-laꞌ wal-la chiaꞌ ca naca
xel-laꞌ wal-la chee̱ be̱zre.
Dxugúꞌu da za xíchajaꞌ da dxutipa na lazraꞌ.
11 Dxal-laꞌ leꞌedaꞌ xelezráꞌ zran niꞌa benneꞌ
dxeledábague̱ꞌ nedaꞌ,
naꞌ xendaꞌ xelebezre xacheꞌ benneꞌ caꞌ guledíl-lale̱ne̱ꞌ nedaꞌ,
benneꞌ caꞌ dxelune̱ꞌ da cale̱la.
12 Welexán benneꞌ xrlátaje caꞌ ca dxun xaga zinaꞌ.
Xelegule̱ꞌ ca dxun xaga cedro lu xiꞌa Líbano.
13 Zaj naque̱ꞌ ca tu xaga ze̱ na lu xudauꞌ chee̱ Xránadxu Dios,
da dxegúlale̱ꞌe̱ na lu chaleꞌaj chee̱ xuꞌu lizre Dios chee̱dxu.
14 Zaj naque̱ꞌ ca xaga caꞌ dxelebía da zixre chee̱ na gate
ba zaj nagula na, ne zaj naca na xaga xaꞌa wal-la.
15 Benneꞌ caní xuluzenne̱ꞌ bénneache naca li lazreꞌ
Xranaꞌ Dios, Bénneaꞌ dxuzé̱ chúchue̱ꞌ nedaꞌ,
ne quebe bi zúale̱ Le̱ꞌ da quebe naca xrlátaje.