85
Be̱nuꞌ da xrlátaje chee̱ bénneache chiuꞌ, Xranaꞌ Dios.Be̱nuꞌ belexelá zriꞌine zre sua Jacob,
benneꞌ caꞌ guluꞌe̱ lu naꞌ benneꞌ zituꞌ caꞌ.
2 Bnite lauꞌ da zrinnaj da belún bénneache chiuꞌ.
Bdeuꞌ chaláꞌala ca zaj naca dul-la chee̱ benneꞌ caꞌ.
3 Bzua zriuꞌ xel-la dxezráꞌa chiuꞌ,
ne bsanuꞌ xel-laꞌ xichaj zraꞌa chiuꞌ.
4 Be̱n xezúantuꞌ lu da ba neza chee̱ xel-laꞌ weselá chiuꞌ, Dios,
ne québedxa zraꞌu netuꞌ.
5 ¿Tu chíꞌizqueze zraꞌu netuꞌ?
¿Wazráꞌaquezuꞌ tu cuen tu cuen zriꞌine zre suantuꞌ?
6 ¿Québedxa gunuꞌ xexaca bantuꞌ,
chee̱ súantuꞌ lu da ba neza lau Lueꞌ?
7 ¡Xran, bexache lazreꞌ netuꞌ, ne bselá netuꞌ!
8 Guzé̱ nagaꞌ da nne̱ Xranaꞌ Dios.
Nne̱ꞌ da guzúa na bénneache chee̱ꞌ
lu xel-laꞌ dxebeza zri lazreꞌ,
chee̱ québedxa xelún benneꞌ láꞌazxa chee̱ꞌ da xálaze.
9 Da líqueze Le̱ꞌ zúate̱queze̱ꞌ guselé̱ꞌ benneꞌ caꞌ dxelezrebe̱ꞌ Le̱ꞌ,
chee̱ sua da xabáa chee̱ꞌ lu xe̱zr la xu chee̱dxu.
10 Zaj nazraga xel-la dxexache lazreꞌ, ne da li chee̱ Dios.
Zaj naca tuze da xrlátaje, ne xel-laꞌ dxebeza zri lazreꞌ.
11 Da li chee̱ꞌ gusezrá na xe̱zr la xu nigá,
naꞌ sel-le̱ꞌ da xrlátaje chee̱ꞌ da za xabáa.
12 Xránadxu gúnnaqueze̱ꞌ dxiꞌu da cháwedauꞌ,
naꞌ gúnnale̱ꞌe̱ xe̱zr la xu chee̱dxu.
13 Nu benneꞌ naque̱ꞌ xrlátaje waca xezrine̱ꞌ lau Dios,
naꞌ gune̱ꞌ gundxu ca da ba bléꞌene̱ꞌ gundxu.