84
Nazríꞌile̱ꞌe̱daꞌ xudauꞌ chiuꞌ Lueꞌ, Dios, napuꞌ dute̱ xel-laꞌ waca.2 Dxaca lázrele̱ꞌe̱daꞌ suaꞌ ga naꞌ,
ne dxezá lazraꞌ suaꞌ lu xudauꞌ chiuꞌ, Xran.
Dute̱ da nacaꞌ, ne dute̱ lázrdawaꞌ dxul-laꞌ chiuꞌ Lueꞌ, Dios ban.
3 Ba belún chje̱gu caꞌ xrúꞌunebaꞌ,
naꞌ buchuj caꞌ zaj de̱ lataj naga dxuluzríabaꞌ biadu chee̱baꞌ caꞌ
naga zua lu cugu chiuꞌ Lueꞌ, Dios, napuꞌ dute̱ xel-laꞌ waca.
Nacuꞌ Lueꞌ Wenná Bea chiaꞌ, ne Dios chiaꞌ.
4 Ba neza zrente̱ naca na chee̱ benneꞌ caꞌ zaj zre̱ꞌe̱ xudauꞌ chiuꞌ.
Chadía chacanna xelúe láꞌanaqueze̱ꞌ Lueꞌ.
5 Ba neza zrente̱ naca na chee̱ benneꞌ caꞌ,
Lueꞌ dxuzúa chuchuꞌ le̱ꞌ,
benneꞌ caꞌ dxelezá lazre̱ꞌ chjaque̱ꞌ xiꞌa láꞌazxa chiuꞌ, xiꞌa Sión.
6 Gate dxeledée̱ꞌ lacheꞌ bizre nazí le na
Lacheꞌ Nisa Dxebézredxu,
dxexaca na lataj naga dxalaj nisa,
naꞌ gusezrá nisa xiuj ca zaj naca beaj caꞌ.
7 Dxelácadxe̱ꞌ benneꞌ wal-la dxácate̱ ne zaj xuꞌe̱ neza
laweꞌ da xeleléꞌene̱ꞌ Dios lu xiꞌa láꞌazxa chee̱ꞌ, xiꞌa Sión.
8 Bene, Xran, ca naca da dxenabaꞌ Lueꞌ, Dios, napuꞌ dute̱ xel-laꞌ waca.
Bene, Dios, nacuꞌ Dios chee̱ Jacob.
9 Be̱n da xrlátaje chee̱ benneꞌ wenná bea chee̱ntuꞌ, Dios,
benneꞌ wenná bea naꞌ gucaꞌu Lueꞌ.
10 Cháwedxa naca suaꞌ tu zraze lu xudauꞌ chiuꞌ
quézcala suaꞌ chi gaxúa iza naga xula.
Dxaca lazredxaꞌ suaꞌ dxa xuꞌa xudauꞌ chee̱ Dios chiaꞌ
ca tu benneꞌ nadaꞌu,
quézcala súaquezaꞌ tu lizraꞌ zaca naga quebe zua Dios.
11 Xránadxu Dios naque̱ꞌ Benneꞌ dxuxúe̱ꞌ dxiꞌu,
ne Benneꞌ Wenná Bea xabáa chee̱dxu.
Dxune̱ꞌ dxiꞌu da chaweꞌ dute̱ xel-laꞌ zriꞌi lazreꞌ chee̱ꞌ,
ne dxune̱ꞌ dxelapa bénneache dxiꞌu ba láꞌana.
Quebe xezúene̱ꞌ ziꞌ gune̱ꞌ da chaweꞌ chee̱ benneꞌ caꞌ zaj naque̱ꞌ du lazreꞌ.
12 ¡Dios, napuꞌ dute̱ xel-laꞌ waca!
¡Ba neza zrente̱ naca na chee̱ benneꞌ caꞌ dxuluxrén lazre̱ꞌ Lueꞌ!